Фільм «20 дзён у Марыупалі» ўвайшоў у шорт-лісты «Оскара»

Стужка Мсціслава Чарнова аб знішчэнні Марыупаля войскамі Расіі адзначана ў катэгорыях «Найлепшы дакументальны поўнаметражны фільм» і «Найлепшы фільм на замежнай мове», піша «Нямецкая хваля».

Дакументальная стужка ўкраінскага фотажурналіста Мсціслава Чарнова «20 дзён у Марыупалі» ўвайшла ў шорт-лісты амерыканскай кінапрэміі «Оскар». Пра гэта паведамляецца ў чацвер, 21 снежня, на сайце Амерыканскай кінаакадэміі.

Украінскі фільм адзначаны ў катэгорыі «Найлепшы дакументальны поўнаметражны фільм», дзе ўсяго ў спісе прэтэндэнтаў на галоўны прыз — 15 дакументальных стужак. Акрамя таго, «20 дзён у Марыупалі» пазначаны ў катэгорыі «Найлепшы фільм на замежнай мове».

Сярод 15 прэтэндэнтаў на ўзнагароду ў гэтай катэгорыі таксама адзначаны нямецкі фільм «Настаўніцкая» (Das Lehrerzimmer) рэжысёра Ількера Чатака (Ilker Catak) пра канфлікт у школе, які выйшаў з-пад кантролю, дзе ў цэнтры падзей — маладая настаўніца, якая хоча раскрыць серыю школьных крадзяжоў.

Акрамя таго, у шорт-лісце знаходзяцца фільм «Ідэальныя дні» (Perfect days), які прадстаўляе Японію, зняты нямецкім рэжысёрам Вімам Вендэрсам (Wim Wenders), і фільм «Амерыканец» (Amerikatsi), які прадстаўляе Арменію, у якім Майкл А. Гурджан выступіў у якасці сцэнарыста, рэжысёра і выканаўцы галоўнай ролі.

23 студзеня 2024 года будуць абвешчаны канчатковыя намінанты на прэмію «Оскар», 96-я цырымонія ўручэння якой прызначана на 10 сакавіка. 

Гісторыя стварэння фільма «20 дзён у Марыупалі»

Кадры разбурэння Марыупаля расійскімі вайскоўцамі, якія склалі фільм, здымала ў першыя дні нападу Расіі на Украіну каманда рэпарцёраў агенцтва «The Associated Press», у якую ўваходзілі, у прыватнасці, украінскія фотарэпарцёры Мсціслаў Чарноў, што стаў рэжысёрам карціны, Яўген Малалетка і прадзюсар Васіліса Сцепаненка.

Чарноў і Малалетка, калі прыехалі ў Марыупаль у дзень уварвання, 24 лютага 2022 года, асвятлялі працу лекараў у мясцовых шпіталях, фіксавалі шматлікія ахвяры сярод цывільнага насельніцтва і пакінулі горад 15 сакавіка ў складзе калоны, якая выехала пасля адкрыцця гуманітарнага калідора.

У студзені 2023 года фільм быў удастоены прыза глядацкіх сімпатый на фестывалі незалежнага кіно «Sundance» ў ЗША. У траўні 2022-га Яўгену Малалетку і Мсціславу Чарнову была прысуджана прэмія «DW» «За свабоду слова» («Freedom of Speech Award»), а ў снежні — прэмія «Рэпарцёраў без меж» «За свабоду прэсы». Яўген Малалетка ў 2023 годзе стаў лаўрэатам конкурсу «World Press Photo», раней ён быў прызнаны фатографам года па версіі брытанскай газеты «The Guardian».