«Першы вырак у Беларусі, калі смяротнае пакаранне не за забойства». Што стаіць за «справай Рыка Крыгера»
Паводле інфармацыі праваабаронцаў, сьмяротны прысуд Рыка Крыгеру вынесьлі ў канцы чэрвеня. Вядома пра гэта стала толькі цяпер.
19 ліпеня стала вядома пра сьмяротны прысуд у Беларусі для грамадзяніна Нямеччыны Рыка Крыгера (Rico Krieger), які быў вынесены 24 чэрвеня. Судзіць Крыгера пачалі ў Менску на пачатку таго ж месяца.
«Гэта першая выключная мера пакараньня для замежніка ў Беларусі. І калі сьмяротнае пакараньне — не за забойства», — сказаў у камэнтары «Свабодзе» праваабаронца Леанід Судаленка.
Ён лічыць, што такі вырак невыпадковы. На думку Судаленкі, улады Беларусі разьлічваюць на торг вакол гэтай справы.
«Бо Нямеччына захоча забраць яго сабе. Там жа, у Нямеччыне, няма сьмяротнага пакараньня», — зазначае юрыст.
Як паведамілі ў МЗС Нямеччыны ў адказ на запыт DW, ведамства і пасольства ФРГ у Менску аказваюць консульскую дапамогу гэтай асобе і інтэнсыўна працуюць зь беларускімі ўладамі ў яе інтарэсах.
«Сьмяротнае пакараньне – гэта жорсткая і бесчалавечная форма пакараньня, якую Нямеччына не прымае пры любых абставінах», – гаворыцца ў адказе нямецкага МЗС.
Суд над грамадзянінам Нямеччыны Рыка Крыгерам праходзіў у Менскім абласным судзе з 6 чэрвеня. Паводле інфармацыі «Вясны», Крыгера прызналі вінаватым ва «ўчыненьні выбуху ў мэтах аказаньня ўзьдзеяньня на прыняцьце рашэньняў органамі ўлады, застрашваньня насельніцтва, дэстабілізацыі грамадзкага парадку (акце тэрарызму), зьдзейсьненым асобай, якая раней учыніла злачынства, прадугледжанае ч. 4 арт. 295 КК, арганізаванай групай, то бок у зьдзяйсьненьні злачынства, прадугледжанага ч. 3 арт. 289 КК».
Таксама праваабаронцам стала вядома, што справа вайсковага лекара тычыцца палка Каліноўскага, а менавіта яго структурнага падразьдзяленьня — замежнага мэханізаванага батальёна «Western». Але Полк Каліноўскага гэтую сувязь адмаўляе.
Глядзіце таксама
Вядома, што Крыгер нарадзіўся ў Бэрліне і працаваў санітарам-ратавальнікам у «Нямецкім Чырвоным крыжы». У Нямеччыне ў мужчыны засталося непаўналетняе дзіця. Таксама вядома, што Рыка Крыгер нейкі час працаваў афіцэрам па спэцыяльнай бясьпецы Дзяржаўнага дэпартамэнту ЗША ў Бэрліне, дзе займеў досьвед збройных апэрацый бясьпекі. Пасьля гэтай пасады ён перайшоў у сфэру аховы здароўя, працаваў мэдбратам, спэцыялізаваўся на хуткай мэдычнай дапамозе.
Афіцыйна пра сьмяротны прысуд Крыгеру не паведамлялася. Улады Беларусі яго пакуль ніяк не камэнтавалі.
Расійскі тэлеграм-канал Readovka, які мае найбольшую
колькасць чытачоў сярод усёй Z-супольнасці (больш за 2,6 мільёна падпісчыкаў),
апублікаваў сваю версію наконт сітуацыі з грамадзянінам Германіі Рыка Крыгерам.
На гэта звярнула ўваг «Наша Ніва».
«У Беларусь ён трапіў, хутчэй за ўсё, дзякуючы працы спецслужбаў Расіі, якія яго злавілі і выдалі КДБ Беларусі. Справа ў тым, што праходзіў ён па артыкулах аб найміцтве, тэракце, наўмысным вывядзенні з ладу транспартнага сродку і іншым. Мяркуючы па абвінавачваннях, займаўся ён не чым іншым, як арганізацыяй дыверсій. Верагодней за ўсё — на тэрыторыі Расіі, дзесьці ў расійска-беларуска-ўкраінскім памежжы, гэта значыць у Бранскай, Гомельскай або Магілёўскай абласцях», — расказваюць сваім чытачам прапагандысты.