Зяленскі: Патрэбныя такія санкцыі, каб у РФ не было грошай разбураць жыццё

Прэзідэнт Украіны Уладзімір Зяленскі заявіў, што супраць РФ трэба ўвесці такія санкцыі, каб у расійскай дзяржавы не было грошай разбураць жыццё. Пра гэта ён сказаў у звароце да еўрапейцаў, адзначае UNN.

— У мяне пастаянна пытаюць у інтэрв'ю: як Еўропа можа дапамагчы Украіне? Я фармулюю пытанне інакш, а менавіта: як Еўропа можа дапамагчы сабе? Таму што гэта вайна — не толькі супраць нашага народа, не толькі супраць украінцаў. Гэта вайна супраць каштоўнасцяў, якія нас з вамі аб'ядноўваюць. Супраць нашага ўмення жыць. Жыць, а не забіваць, як рускія вайскоўцы на нашай зямлі, — сказаў Зяленскі.

Прэзідэнт Украіны таксама заявіў, што еўрапейцы імкнуцца спыніць вайну гэтак жа, як кожны ўкраінец. «І таму мой адказ аб дапамозе для Украіны, якая неабходная, гучыць лагічна, натуральна для мільёнаў людзей у дэмакратычных краінах. Трэба ціснуць. Патрэбныя такія санкцыі супраць Расіі, каб кожны расійскі салдат ведаў цану кожнага стрэлу ў мірных людзей. Патрэбна такая прынцыповасць еўрапейскага бізнесу, каб у расійскай дзяржавы не было грошай разбураць жыццё. Цісніце на кампаніі ў сваіх краінах, каб яны выходзілі з Расіі, каб вы ўскосна не былі спонсарамі гэтай вайны і трагедыі», — заклікаў Зяленскі.

Ён параіў казаць палітыкам, каб закрылі неба над Украінай ад расійскіх ракет і самалётаў.

— Ад тых, хто забіў 79 дзяцей і тысячы дарослых! Тысячы за 17 дзён! Гэта ўсё абароніць нас. Абсалютна такіх жа! Вы ведаеце гэта. Вы гэта адчуваеце. Вы бачыце мяне — і ўсе гэта разумееце. І вы ведаеце, што мы разам павінны быць у Еўрапейскім саюзе. Гэта звышважна для Украіны. І гэта звышважна для вас, для Еўропы. Таму што гэта ўзмоцніць Еўропу. Гэта абароніць Еўропу. Гэта спыніць вайну назаўжды. Гэта дакажа, што 79 жыццяў дзяцей, якія былі забраныя ў вайне за свабоду, не страчаныя дарэмна, — сказаў Зяленскі.