467-мы дзень вайны: Вагнер страляе па расійскай арміі, УСУ збівае іранскія дроны

Сабралі галоўнае, што адбылося да гэтай гадзіны на вайне.

У траўні 2023 года расійскае войска выпусціла па Украіне больш за 300 дронаў-камікадзэ «Шахед» — Мінабароны Вялікабрытаніі.
У штодзённай зводцы ваеннай разведкі зазначаецца, што мінулы месяц стаў самым інтэнсіўным з пункту гледжання выкарыстання такіх беспілотнікаў.
Верагодна, расійскія вайскоўцы запускаюць так шмат баражуючых боепрыпасаў у спробе прымусіць Украіну выдаткаваць на іх дарагія сучасныя ракеты.
Аднак арміі РФ, хутчэй за ўсё, не ўдалося дабіцца прыкметных поспехаў, лічаць аўтары зводкі. УСУ змаглі нейтралізаваць па меншай меры 90% "Шахедаў", у асноўным з дапамогай больш старых і танных сродкаў СПА і электронных перашкод.
Расейскія вайскоўцы таксама, верагодна, спрабавалі выявіць і нанесці ўдары па ўкраінскіх пазіцыях у тыле. Аднак з-за недасканалых працэсаў навядзення арміі РФ не ўдаецца эфектыўна паражаць такія мэты.
Ранішняя зводка Генштаба УСУ. Галоўнае
За мінулыя суткі расійскія войскі прымянілі крылатыя ракеты Х-101/Х-555 і ўдарныя беспілотнікі "Шахед". УСУ збілі чатыры з шасці ракет і шэсць з васьмі дронаў.
Усяго за мінулыя суткі армія РФ нанесла 14 ракетных і 40 авіяцыйных удараў, зрабіла 51 абстрэл з рэактыўных сістэм залпавага агню па пазіцыях УСУ і населеных пунктах Украіны.
Адбылося 29 баёў. УСУ адбілі атакі праціўніка на Купянскім (у раёне Навасёлаўскага), Ліманскім (Белагораўка), Бахмуцкім (Іванаўскае) і Мар'інскім (Мар'інка) напрамках.
На Северскім і Слабажанскім напрамках расійская дыверсійна-разведвальная група распачала няўдалую спробу пранікнення ў раёне вёскі Зялёнае Харкаўскай вобласці.
Украінская авіяцыя нанесла 15 удараў па раёнах засяроджання асабовага складу расейцаў. УСУ збілі шэсць расійскіх разведвальных беспілотнікаў.
Падраздзяленні ракетных войскаў і артылерыі Украіны паразілі тры пункты кіравання, два раёны засяроджання ўзбраення і ваеннай тэхнікі, чатыры склады боепрыпасаў, два зенітна-ракетныя комплексы і чатыры станцыі радыёэлектроннай барацьбы ворага.
Раніцай 5 чэрвеня УСУ выпусцілі больш за 70 снарадаў з «Града» па Новай Таволжанцы ў Белгарадскай вобласці Расіі, заявіў кіраўнік Шабекінскай акругі Уладзімір Жданаў.
"База" без спасылкі на крыніцу паведамляе, што група з 20 "ўкраінскіх дыверсантаў", якія атакавалі напярэдадні белгарадскае сяло Новая Таволжанка, трапілі ў населены пункт па рацэ Северскі Данец. Днём яны пераплылі раку і высадзіліся на пляжы ў раёне вуліцы Пясчаная.
Па даных «Базы», група заняла ў сяле тры дамы, дзе іх заблакавалі. Увечары, каля 17:00, у вёсцы пачаўся бой, у выніку якога "дыверсантаў" выцеснілі на тэрыторыю Украіны.
4 чэрвеня ваюючыя на баку Украіны фармаванні «Рускі добраахвотніцкі корпус» і легіён «Свабода Расіі» заявілі аб новым рэйдзе, падчас якога яны ўвайшлі ў сяло Новая Таволжанка. Яны таксама прапанавалі кіраўніку вобласці Вячаславу Гладкову сустрэцца з імі і "ў якасці жэсту добрай волі" паабяцалі аддаць двух палонных. Гладкоў заявіў, што гатовы сустрэцца, але ў іншым месцы — на МАВП «Шабекіна». У выніку сустрэча так і не адбылася.
У ПВК Вагнера заявілі, што найміты ўступілі ў бой з вайскоўцамі Мінабароны РФ і нібыта затрымалі п'янага падпалкоўнікаэ
Прэс-служба заснавальніка прыватнай ваеннай кампаніі Яўгена Прыгожына апублікавала рапарт камандзіра інжынерна-сапёрнай брыгады ПВК Вагнера, у якім гаворыцца, што найміты ўступілі ў бой з вайскоўцамі Мінабароны Расіі.
З рапарту вынікае, што 17 траўня інжынерна-сапёрная рота ПВК прыступіла да размініравання дарог, па якіх найміты выходзілі з Бахмута. Раней Прыгожын абвінаваціў "прадстаўнікоў Мінабароны РФ" у мініраванні шляхоў адыходу. ПВК была вымушана спыніць працы, бо ў раёне Сямігор'я патрапіла пад абстрэл з боку пазіцый Мінабароны РФ, гаворыцца ў дакуменце.
Байцы ПВК Вагнера «прынялі меры ў адказ да ліквідацыі агрэсіі і затрымання», гаворыцца ў рапарце. У ім сцвярджаецца, што найміты ЧВК нібыта затрымалі групу вайскоўцаў на чале з камандзірам 72-й мотастралковай брыгады, падпалкоўнікам, «які знаходзіўся ў стане алкагольнага ап'янення».
Прэс-служба Прыгожына таксама апублікавала відэа, на якім мужчына прадстаўляецца падпалкоўнікам Раманам Веневіціным і кажа, што разам са сваімі байцамі раззброіў групу хуткага рэагавання ПВК Вагнера і абстраляў машыну «вагнераўцаў». Паводле яго слоў, ён зрабіў гэта з-за "асабістай непрыязнасці". Мужчына на відэа сцвярджае, што быў у стане алкагольнага ап'янення.
Як паведаміў кіраўнік ваеннай адміністрацыі Днепрапятроўскай вобласці Сяргей Лысак, пад абстрэл з цяжкай артылерыі патрапіў Нікапаль. У горадзе пашкоджаны царква, прыватнае прадпрыемства, дзевяць жылых дамоў, гаспадарчая пабудова і лініі электраперадач. Людзі не пацярпелі.