935-ты дзень вайны. Расійцы абстралялі Харкаў. Авіябомба трапіла ў шматпавярховік

Прынамсі 30 пацярпелых у Харкаве. Пяць экс-міністраў абароны Вялікабрытаніі заклікалі Стармера дазволіць Кіеву выкарыстоўваць ракеты для ўдараў па Расіі без падтрымкі ЗША. Распавядаем пра галоўныя падзеі чарговага дня поўнамаштабнай вайны Расіі супраць Украіны. 

УСУ: У ноч на 15 верасня расійскія войскі атакавалі Адэскую вобласць

Акупанты ўдарылі па Адэскай вобласці дзьвюма балістычнымі ракетамі «Іскандэр-М» з акупаванага Крыму і адной кіраванай авіяцыйнай ракетай Х-59 з паветранай прасторы ТОТ Запарожскай вобласьці, а таксама 14 ударнымі БПЛА тыпу «Шахед» (раёны пускаў: Курск — РФ, Чауда — Крым), паведамілі ва УСУ. 

У выніку абстрэлу Нікапаля пацярпелі два чалавекі

Кіраўнік Днепрапятроўскай абласной ваеннай адміністрацыі Сяргей Лысак паведаміў, што ў выніку ўдару па Нікапаля пацярпелі два чалавекі — 37-гадовы мужчына і 75-гадовая жанчына.

Акрамя таго, у выніку атакі "знявечаны прыватны дом", пачаўся пажар, яго ўжо патушылі, напісаў Лысак у тэлеграме.

У выніку абстрэлу пацярпелі чатыры шматпавярховыя дамы, а таксама аўтамыйка, легкавы аўтамабіль, пашкоджана лінія электраперадачы.

Лысак удакладніў, што напярэдадні вечарам, ноччу і раніцай раён Нікапаля абстрэльваўся з артылерыі, таксама наносіліся ўдары дронамі-камікадзэ.

Нікапаль знаходзіцца ў Днепрапятроўскай вобласці фактычна на лініі фронту, якой служыць Днепр, удакладняе Бі-бі-сі. 

Тры чалавекі загінулі пры абстрэле ў Запарожскай вобласці

Расійскія вайскоўцы нанеслі два ўдары карэктаванымі авіяцыйнымі бомбамі (КАБ) па тэрыторыі фермерскай гаспадаркі ў Гуляйпольскім раёне ў Запарожскай вобласці, гаворыцца ў паведамленні МУС Украіны.

«Загінулі тры працаўнікі прадпрыемства», —  адзначаецца ў заяве. 

Абстрэл Харкава. Авіябомба трапіла ў шматпавярховік

«У Харкаве працягваецца выратавальная аперацыя. Расійская авіяцыя. Пашкоджаны звычайны жылы дом, шматпавярховік. Паміж 9-м і 12-м паверхамі — агонь і завалы. На гэты момант вядома пра амаль 30 параненых, сярод іх дзеці. У выратаванні людзей задзейнічаны ўсе службы», — напісаў Уладзімір Зяленскі ў сваім тэлеграм-канале. 

Мінабароны Расіі адчыталася, што ноччу расійская СПА збіла 29 украінскіх беспілотнікаў

15 — над Бранскай вобласцю, пяць — над Курскай, чатыры — над Смаленскай, два — над Арлоўскай, па адным — над Белгарадскай, Калужскай, Растоўскай і Разанскай. Пра гэта піша «Медуза».

Sunday Times: пяць экс-міністраў абароны Вялікабрытаніі заклікалі Стармера дазволіць Кіеву выкарыстоўваць ракеты для ўдараў па Расіі без падтрымкі ЗША

Брытанская газета Sunday Times піша, што пяць былых міністраў абароны — Грант Шаппс, Бэн Уоллес, Гэвін Уільямсан, Пені Мордаунт, Ліам Фокс — і былы прэм'ер-міністр Вялікабрытаніі Борыс Джонсан заклікалі Кіра Стармера дазволіць Украіне выкарыстоўваць брытанскія ракеты Stor нанясення ўдараў па тэрыторыі Расіі нават без падтрымкі ЗША. Публікацыю цытуе Бі-бі-сі.

Уоллес заявіў, што адмова ад падобных дзеянняў зробіць Брытанію «прымірацелем» Крамля, Уільямсан назваў гэта «невыкананнем абавязку», а Джонсан дадаў: «Няма ніякіх мажлівых падстаў для прамаруджвання».

Учора ў Вашынгтоне завяршыліся перамовы Кіра Стармера з прэзідэнтам ЗША Джо Байдэнам. Напярэдадні візіту Стармера ў заходняя прэса пісала, што ён мае намер пераканаць Байдэна дазволіць Украіне выкарыстоўваць пастаўленыя Брытаніяй ракеты Storm Shadow для нанясення ўдараў па цэлях у Расіі. Аднак па выніках перамоваў Стармер заявіў, што яны мелі стратэгічны, а не тактычны характар, і на іх не ішла гаворка «пра нейкае канкрэтнае рашэнне».

Па словах інсайдэраў Sunday Times, перамовы ў Белым доме доўжыліся 90 хвілін, былі "вельмі адкрытымі" і тычыліся "выбару, які стаіць перад намі". Аднак Байдэн і яго каманда далі зразумець, піша газета, што занялі «пазіцыю чакання»: перш чым даць сваю згоду на выкарыстанне ракет па тэрыторыі Расіі, яны жадаюць убачыць «план перамогі» Уладзіміра Зяленскага. Ён абяцаў прадставіць яго прэзідэнту ЗША падчас наведвання Генеральнай Асамблеі ААН у Нью-Йорку ў канцы верасня.

Як піша Sunday Times са спасылкай на крыніцы ў Лондане, адносна дазволу на выкарыстанне заходніх ракет па тэрыторыі Расіі ў камандзе Байдэна існуе раскол паміж Дзяржсакратаром Энтані Блінкенам і дарадца прэзідэнта ЗША па нацыянальнай бяспецы Джэйкам Саліванам. «Праблема ў Саліване, а не ў Блінкене», — цытуе выданне крыніца ў брытанскім абаронным ведамстве.

Адзін з высокапастаўленых чальцоў Кансерватыўнай партыі, знаёмы з меркаваннем Саллівана, сказаў Sunday Times, што дарадца па нацбяспецы ЗША скептычна ставіцца да здольнасці Украіны выйграць вайну з самага яе пачатку ў 2022 году.