Блінкен: Дзякуючы чэшскай ініцыятыве Украіна да канца года атрымае мільён снарадаў

Ва Украіне трывае вайна, развязаная Крамлём пры падтрымцы рэжыма Лукашэнкі. Пастаўкі заходняй зброі застаюцца надзённым пытаннем для Кіева.

Дзяржаўны сакратар ЗША Энтані Блінкен заявіў, што да канца 2024 года Украіна можа атрымаць да мільёна снарадаў дзякуючы чэшскай ініцыятыве. Пра гэта ён заявіў падчас візіту ў Чэхію, дзе ўдзельнічае ў пасяджэнні міністраў замежных спраў краін НАТО, паведамляе «Голас Амерыкі».

Блінкен адзначыў «жыццёва важную» ролю Чэхіі ў падтрымцы Украіны. У каментарах для журналістаў дзяржсакратар ЗША заявіў, што Чэхія дае Украіне зброю, удзельнічае ў навучанні ўкраінскіх байцоў, каардынуе пастаўкі снарадаў, а таксама дапамагае ўкраінскім уцекачам.

«Асабліва я хачу вітаць працу Чэхіі ў тым, каб знайсці па свеце неабходныя боепрыпасы, у якіх Украіна мае патрэбу на поле бою, уключаючы снарады калібраў 155 мм і 152 мм.гэта крытычна важна. Да канца года мы чакаем, што ініцыятыва пад кіраўніцтвам Чэхіі забяспечыць амаль мільён снарадаў для Украіны», — амерыканскі дзяржсакратар.

Паводле слоў Блінкена, Чэхія накіравала 600 млн долараў прамой ваеннай дапамогі Украіне. Таксама краіна дасць яшчэ 6 млрд долараў на тэхніку і да канца года навучыць прыкладна 9 тысяч украінскіх вайскоўцаў. Акрамя таго, чыноўнік адзначыў дапамогу Чэхіі ў рамонце савецкай тэхнікі для Украіны.

«Злучаныя Штаты высакародна далі нам кампенсацыю за нашы ваенныя пастаўкі Украіне. Я маю на ўвазе восем верталётаў Н-1 і фінансавую падтрымку на больш за 300 мільёнаў долараў», — адзначыла ў сваю чаргу міністр абароны Чэхіі Яна Чарнахова.

Яна выказала падзяку ЗША за падтрымку, якая не толькі дазваляе дапамагаць Украіне, а таксама праводзіць мадэрнізацыю чэшскіх войскаў, якая з'яўляецца найбуйнейшай за гісторыю.

Ці дажыве Расійская Федэрацыя да 2028 года? Малаверагодна

Украінскае выданне unian.net нагадвае, што Прага мае ўжо 1,6 млрд еўра на закупку снарадаў для ўкраінскай арміі.

«Падчас двухбаковай сустрэчы з прэм’ер-міністрам Чэхіі Пятром Фіялай абмеркавалі рэалізацыю артылерыйскай ініцыятывы, на якую сабрана ўжо больш за 1,6 млрд еўра. Для нас важна, каб боепрыпасы паступалі своечасова, сістэмна і згодна з графікам ўжо з чэрвеня», — заявіў 28 траўня прэм'ер-міністр Украіны Дзяніс Шмыгаль.

Таксама паведамлялася, што Чэхія выдзеліць грошы для дапамогі ўкраінскім уцекачам у вяртанні дадому. Такая праграма пачне дзейнічаць ужо з чэрвеня, аднак яна не звязаная з вайсковай службай грамадзян.