CNN: Чаму сотні адзінак ваеннай тэхнікі, знішчанай Расіяй ва Украіне, аказаліся муляжамі?
Украіна актыўна падмяняе сваю вайсковую тэхніку на полі бою падробленымі муляжамі, каб расійскае войска дарэмна выдаткоўвала снарады на знішчэнне несапраўдных цэляў, паведамляе CNN. Знішчэнне з дапамогай беспілотніка ці ракеты каштуе расійскім сілам столькі ж, колькі і знішчэнне сапраўднай зброі, якая каштуе мільёны долараў за адзінку.
Артыкул на сайце CNN
Паводле звестак тэлеканала CNN, вырабам дакладных копій вайсковай тэхнікі займаецца ўкраінская горна-металургічная кампанія «Метінвест», якая належыць бізнесоўцу Рынату Ахметаву.
«Метінвест» ужо зрабіла сотні рэплік тых ці іншых відаў заходніх узбраенняў, якія пасля былі знішчаныя войскамі РФ.
«Вайна абыходзіцца дорага, і нам трэба, каб расіяне трацілі грошы на выкарыстанне дронаў і ракет для знішчэння нашых несапраўдных цэляў, — распавёў журналістам прадстаўнік кампаніі, які пажадаў захаваць ананімнасць. — Урэшце, дроны і ракеты каштуюць дорага. Нашы мадэлі нашмат таннейшыя».
Так, з ягоных слоў, 155-міліметровая гаўбіца М777 брытанскай вытворчасці, якая ўжываецца ва Украіне, каштуе некалькі мільёнаў долараў, а «Метінвест» стварае яе рэпліку са звычайных каналізацыйных труб менш чым за тысячу долараў.
«Пасля кожнага трапляння вайскоўцы здаюць нам трафейныя абломкі. Мы іх збіраем. Калі наша прынада была знішчаная, значыць, мы працавалі нездарма», — растлумачыў прадстаўнік «Метінвеста».
З самага пачатку вайны, распавядае ён, супрацоўнікі кампаніі кінуліся ствараць копіі для адпраўкі на перадавую, каб Украіна выглядала больш узброенай, чым была на самай справе. Аднак спачатку макеты былі досыць грубымі і, калі муляжы доўга не прыцягвалі ўвагу праціўніка, інжынеры вярталіся да чарцяжоў, каб іх перарабіць.
Мера поспеху кожнай прынады — гэта тое, як доўга яны застаюцца ў полі. «Мы лічым не колькасць вырабленых несапраўдных цэляў, а колькасць знішчаных. Чым хутчэй нашы пасткі будуць знішчаныя, тым лепш для нас», — адзначыў суразмоўца журналістам.
Да гэтага часу, кажа прадстаўнік «Метінвеста», многія сотні прынадаў былі знішчаны, і кампанія з усіх сіл спраўляецца з патрабаваннямі арміі. Ён паказаў журналістам фотаздымкі ілжывых цэляў у полі на розных этапах іх кароткага жыцця, пакуль нарэшце не наткнуўся на здымак, якім ён асабліва ганарыцца.
На ім бачна, што на дрэве дзесьці ва Украіне звісае фігура прэзідэнта Расіі Уладзіміра Пуціна ў натуральную велічыню. Гэта таксама праца яго людзей, кажа ён з задавальненнем, і, як і зброя, як ён спадзяецца, хутка сыдзе ў мінулае.