ДПСУ: Беларусь уключае рэтранслятары для расійскіх беспілотнікаў падчас удараў па Украіне
Спікер памежнай службы Украіны Андрэй Дземчанка паведаміў пра новыя факты саўдзелу рэжыму Лукашэнкі ў вайне супраць Украіны. У той жа час у свеце намякаюць на магчымыя хуткія мірныя перамовы па спыненні вайны, але ўрад РФ выціскае грошы з сваіх грамадзян і бізнесаў на працяг бойкі. Ідуць 1680-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 221 баявое сутыкненне, паведамляе Генштаб УСУ ў ранішняй зводцы Генштаба УСУ.
На Канстанцінаўскім кірунку зафіксавана 28 атак расіян у раёнах населеных пунктаў Канстанцінаўка і ў бок Аляксеева-Дружкаўкі, Навасёлаўкі, Торскага, Раскошнага, Сцяпанаўкі, Тарэцкага, Вольнага і Кучарава Яру.
На Пакроўскім кірунку расійцы здзейснілі 17 атак у бок населеных пунктаў Біліцкае, Світлае, Чырвонападдолле, Навагрышына, Кучараў Яр, Сяргееўка і Маладзецкае.
На Паўднёва-Слабажанскім кірунку ўкраінскія падраздзяленні адбілі 10 атак у бок населеных пунктаў Старыца, Ахрымаўка, Малая Ваўча, Вільхаватка, Вільча, Хрыпуны і Чугунаўка.
На Ліманскім кірунку расіяне дзевяць разоў атакавалі ў бок населеных пунктаў Шыйкіўка, Навасёлаўка, Зарэчнае, Дробышава, Дзіброва і Новага Міру.
* * *
У ноч на 30 верасня Расія атакавала Украіну супрацькарабельнымі ракетамі Цыркон/Онікс, балістычнымі ракетамі Іскандэр-М/С-400, 188 ударнымі БпЛА тыпу Shahed (86 з іх — рэактыўныя), Гербера, дронамі-імітатарамі тыпу Пародыя. Супрацьпаветранай абаронай збіта/задушана 5 балістычных ракет Іскандэр-М/С-400 і Цыркон/Онікс; 155 БпЛА.
Атака працягваецца, у паветранай прасторы расійскія БпЛА, папярэджваюць Паветраныя Сілы Украіны.
У сераду раніцай стала вядома пра двух загінулых у Кіеве ў выніку расійскіх удараў. Чатыры чалавекі пацярпелі.
У ноч на 30 верасня Кіеўская вобласць была атакаваная. У Вышгарадзе пад заваламі дома загінула дзіця, трое чалавек атрымалі траўмы.
Расійскія войскі атакавалі Салтаўскі і Кіеўскі раёны Харкава. У выніку ўдараў пацярпела дзіця.
У Сумскай вобласці ў выніку расійскіх удараў загінулі двое людзей, яшчэ 13 пацярпелі, сярод іх дзеці.
Раніцай 30 верасня Польшча задзейнічала сваю авіяцыю для назірання за паветранай прасторай краіны ў сувязі з нападам Расіі на ўкраінскія рэгіёны.
* * *
* * *
Міністр замежных спраў Германіі Ёган Вадэфуль, адказваючы на пытанні дэпутатаў Парламенцкай асамблеі Савета Еўропы ў Страсбурзе заявіў, што перамовы аб спыненні вайны Расіі супраць Украіны могуць пачацца ў бліжэйшы час, піша DW.
«У нас няма ніякіх прэтэнзій да самой Расіі ці да расійскага народа. У нас ёсць сур'ёзная праблема з цяперашнім расійскім рэжымам, які развязаў і вядзе гэтую незаконную агрэсіўную вайну», — сказаў міністр.
Па словах Вадэфуля, еўрапейскім краінам ужо цяпер трэба вызначыць будучы фармат адносін з Расіяй. Для гэтага, на яго думку, Еўропа павінна ўдзельнічаць у перамоўным працэсе. «Цяпер ёсць прыкметы таго, што такія перамовы неўзабаве могуць пачацца… Мы павінны прымаць у іх удзел. Бо вайна ідзе на еўрапейскай тэрыторыі», — сказаў ён.
У той жа час ён падкрэсліў, што любыя дамоўленасці аб спыненні вайны перш за ўсё павінны быць ухваленыя Украінай. Вадэфуль таксама адзначыў, што ў цяперашні час Расія не дэманструе прыкмет гатоўнасці пачаць перамовы аб спыненні вайны.
* * *
Прэзідэнт Казахстана Касым-Жамарт Такаеў падчас сумеснай прэс-канферэнцыі з федэральным канцлерам Германіі Фрыдрыхам Мерцам у Берліне заклікаў Уладзіміра Пуціна замарозіць вайну супраць Украіны, паведамляе DWS News.
Па словах прэзідэнта Казахстана, цяперашні глава Крамля з'яўляецца найбольш прымальнай палітычнай фігурай і для Цэнтральнай Азіі, і для Еўропы, і для ўсяго свету. У той жа час Такаеў падкрэсліў, што Астана з пачатку паўнамаштабнага ўварвання Расіі ва Украіну прытрымліваецца палажэнняў Статута ААН. «Мы з вялікай павагай ставімся да ўкраінскага народа, яго гісторыі, культуры, традыцый і, вядома ж, да ўкраінскай мовы», — сказаў ён.
Такаеў лічыць неадкладнае спыненне вайны нерэалістычным, але выступае за спыненне баявых дзеянняў. «Я казаў пра замарожванніе баявых дзеянняў на тэрыторыі Украіны, каб перайсці да працэсу дыпламатычных ці любых іншых перамоў. Вось наша пазіцыя», — адзначыў прэзідэнт Казахстана.
Па яго словах, Казахстан імкнецца захоўваць дружалюбныя адносіны з Расіяй, бо ў дзяржаў агульная мяжа працягласцю 7597 кіламетраў, у Казахстане пражывае 2,7 мільёна этнічных рускіх.
«Усе гэтыя моманты варта ўлічваць. Нельга рубіць з пляча. Казахстану патрэбны мір і стабільнасць», — заявіў ён.
* * *
Расійскі кіруючы рэжым запланаваў на 2027 год чарговае павышэнне падаткаў, каб скараціць дэфіцыт бюджэту і аплаціць рэкордны рост выдаткаў на вайну, сведчыць ацэнка Мінфіна РФ, якую ён заклаў у праект закона аб бюджэце, які на мінулым тыдні зацвердзіў урад і які 1 кастрычніка павінен быць унесены ў Дзярждуму, паведамляе Reuters.
З 2027 года ўрад РФ уводзіць «падатак на звышдаходы» для вытворцаў цэменту, угнаенняў і золатаздабываючых кампаній; да 22% павышае максімальную стаўку ПДФА на «пасіўныя даходы» фізічных асоб, уключаючы банкаўскія ўклады, а таксама ўсталёўвае 22% ПДВ для пакупак у замежных інтэрнэт-крамах.
Металургічныя кампаніі будуць плаціць каля 200 млрд рублёў у год. Расіянам прыйдзецца аддаць 500-700 млрд рублёў у год з-за павышанага ПДФА на «пасіўныя даходы». Грошы расіян і бізнесу патрэбныя, каб фінансаваць чарговае павышэнне ваенных выдаткаў, на якія ў наступным годзе Крэмль патраціць кожны трэці рубель.
Усяго ваенны бюджэт за 2027-29 гг. дасягне 50 трыльёнаў рублёў. «Збіраецца ўсё, выпальваецца ўсё, каб сёння закрыць дзіру ў бюджэце», — тлумачаць эканамісты.
* * *
Беларусь перыядычна ўключае рэтранслятары, якія ўзмацняюць сігнал для расійскіх беспілотнікаў падчас удараў па Украіне, заявіў спікер ДПСУ Андрэй Дземчанка ў эфіры Дзень.LIVE.
Ён расказаў, што рэтранслятары ўключаюць, калі РФ запускае беспілотнікі па заходніх абласцях Украіны.
«Прыклад дзеяння Расіі па ўдарах па нашых заходніх абласцях паказвае тое, што на тэрыторыі Беларусі працягваюць працаваць або ўключацца перыядычна рэтранслятары, якія сілкавалі сігнал для расійскіх дронаў», — сказаў ён.
У той жа час Дземчанка адзначыў, што памежнікі пакуль не фіксуюць назапашванне войскаў, асабовага складу ці перамяшчэнне тэхнікі на мяжы з Беларуссю.