Егіпет не прыняў расійскі карабель са скрадзеным украінскім збожжам
Егіпет разгарнуў расійскі карабель са скрадзеным украінскім збожжам
Фота wffw.info
Егіпет адмовіўся прымаць расійскі карабель, які перавозіў скрадзенае ўкраінскае збожжа. Пра гэта паведаміў міністр замежных спраў Украіны Дзмітрый Кулеба.
"Пагаварыў з маім егіпецкім калегам Самехам Шукры. Удзячны Егіпту за адмову ад расійскага судна з выкрадзеным ва Украіне збожжам", — напісаў украінскі міністр.
Кулеба са сваім егіпецкім калегам дамовіліся каардынаваць намаганні, накіраваныя на тое, каб Расія разблакавала экспарт прадуктаў харчавання з Украіны.
Нагадаем, 23 красавіка ўпаўнаважаная Вярхоўнай Рады Украіны па правах чалавека Людміла Дзянісава паведаміла, што расійскія войскі вывозяць у анексаваны Крым збожжа з Херсонскай вобласці. І ў наступныя тыдні Расія таксама працягвала вываз скрадзенага ва Украіне збожжа на сваю тэрыторыю і ў анексаваны Крым.