«Ідзіце нах*й"»: Расія нецэнзурна адказала на прапанову Еўропы па ўдзеле ў мірных перамовах
Паколькі Амерыка занятая Іранам, Францыя прапанавала Расіі прыцягнуць Еўропу да мірных перамоў па заканчэнні вайны ва Украіне. У Маскве французскіх дыпламатаў паслалі адкрытым тэкстам. Таму ў ЕС лічаць, што ціск на РФ трэба ўзмацняць, але Дональду Трампу гэта нецікава. Ідуць 1482-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
Фота GettyImages
На працягу мінулых сутак ва Украіне зафіксавана 167 баявых сутыкненняў, паведамляе Генштаб УСУ ў ранішняй зводцы 16 сакавіка.
На Пакроўскім кірунку абаронцы Украіны спынілі 36 штурмаў расіян ў раёнах Зацішак, Ніканораўкі, Котліна, Новамікалаеўкі, Удачнага, Новападгароднага, Мірнаграду, Радзінскага, Маладзецкага, Філіі і іншых.
На Канстанцінаўскім кірунку расійцы здзейснілі 23 атакі ў кірунку Канстанцінаўкі, Іллінаўкі, Навапаўлаўкі і ў раёне Плешчыеўкі, Берастоку, Русінага Яру.
На Гуляйпільскім кірунку адбылося 20 атак у раёне Гуляйполя і ў бок Залізнічнага, Варвароўкі, Святапятроўкі, Аленаканстанцінаўкі, Чароўнага.
На Славянскім кірунку зафіксавана 13 спроб арміі РФ прасунуцца ў раёнах Ямпалю, Закітнага, Платонаўкі і ў кірунках Азёрнага, Рэзнікаўкі, Рай-Аляксандраўкі.
На Аляксандраўскім кірунку расійцы атакавалі 12 разоў у раёнах Зялёнага Гаю, Аляксандраграду, Калінаўскага, Бярозавага, Новамікалаеўкі, Злагоды і ў кірунку Вербавага.
* * *
Расійская армія прасунулася па некалькіх кірунках, паведамляе ўкраінскі аналітычны маніторынгавы рэсурс DeepState. Паводле яго даных, расіяне маюць поспех на Купянскім кірунку каля населенага пункта Пясчанае Харкаўскай вобласці. Прасоўванне войскаў РФ зафіксавана каля вёскі Макееўка Луганскай вобласці на Ліманскім кірунку і каля вёскі Загорнае Запарожскай вобласці на Гуляйпільскім кірунку. Таксама прасоўванне зафіксавана ў раёне Мірнага, якое размешчана ў Запарожскай вобласці.
* * *
Расія ў ноч на 16 сакавіка атакавала Харкаў беспілотнікамі тыпу «Шахед». Пра наступствы не паведамляецца.
У ноч на 16 сакавіка было атакаванае Запарожжа, у выніку чаго пацярпелі тры чалавекі. Абясточана больш за 7500 абанентаў.
Адзін чалавек пацярпеў у выніку расійскіх удараў артылерыяй і беспілотнікамі па Днепрапятроўскай вобласці.
У ноч на 16 сакавіка Краснадарскі край РФ апынуўся пад масіраваным ударам беспілотнікаў. Галоўнай мэтай стала нафтабаза. Паводле папярэдняй інфармацыі, пацярпелых няма. На тэрыторыі нафтабазы назіраецца адкрытае гарэнне: слуп чорнага дыму бачны за некалькі кіламетраў.
Нафтабазы Краснадарскага края з'яўляюцца стратэгічным хабам для расійскай арміі і выконваюць ролю «бензакалонак» для расійскіх акупацыйных войскаў, якія ваююць на поўдні Украіны.
* * *
* * *
Прэзідэнт Украіны Уладзімір Зяленскі ў інтэрв'ю CNN заявіў, што Сілы абароны прадухілілі маштабны наступ РФ, які яна планавала працягнуць гэтай вясной.
«Расія падрыхтавала буйную наступальную аперацыю, якую яны хацелі пачаць у канцы мінулага года і працягнуць гэтай вясной. У адказ мы правялі ўласныя контрнаступальныя дзеянні, каб не дапусціць маштабнага расійскага наступу. Гэта быў поспех не толькі з-за тэрыторыі, але і з-за нашых людзей, а таксама таму, што мы прадухілілі маштабны расійскі наступ», — сказаў Зяленскі.
Паводле яго, гэта шмат у чым стала магчымым дзякуючы ўкраінскім дронавым тэхналогіям. Расія пачала губляць 30–35 тысяч вайскоўцаў штомесяц з-за FPV і іншых тыпаў дронаў.
* * *
Каманды Украіны і ЗША вядуць актыўныя кансультацыі па санкцыйнай палітыцы і гарантыях бяспекі, аднак для вырашэння ключавых праблем неабходная асабістая сустрэча двух прэзідэнтаў. Пра гэта заявіў прэзідэнт Украіны Уладзімір Зяленскі падчас размовы з журналістамі, перадае РБК-Украіна.
Цяпер дыялог працягваецца на ўзроўні перамоўных груп. Паводле слоў Зяленскага, каманды абмяркоўваюць шырокае кола пытанняў, у тым ліку і па санкцыйным ціску.
Зяленскі адзначыў, што ён не абмяркоўваў з Трампам пытанні санкцый супраць Расіі і аслаблення амерыканскіх абмежаванняў. Пры гэтым ён падкрэсліў, што ўжо ёсць канкрэтная неабходнасць прамога кантакту з лідарам ЗША.
«Я думаю, што ў нас шмат пытанняў: і па перамовах, і па дронах, і па Блізкім Усходзе. Я думаю, нам трэба сустракацца ўжо з прэзідэнтам. Таму што каманды працуюць, але ў нас ёсць некаторыя пытанні, якія стаяць на месцы. Нашым камандам трэба больш працаваць над нашай сустрэчай», — рэзюмаваў прэзідэнт Украіны.
* * *
Францыя прапанавала Расіі прыцягнуць Еўропу да мірных перамоў па завяршэнні вайны ва Украіне. У Маскве адказалі нецэнзурна, піша Financial Times.
Як паведамляе выданне, у лютым саветнікі прэзідэнта Францыі па нацыянальнай бяспецы Эмануэль Бон і Бертран Бухвальтэр наведалі Маскву для перамоў з памочнікам расійскага дыктатара Юрыем Ушаковым. Паводле слоў крыніц FT, французскія чыноўнікі настойвалі, каб Масква пагадзілася на тое, што еўрапейцы павінны мець месца за сталом перамоў.
«Адказ Ушакова на гэтае пытанне быў фактычна такім: «Выбачайце, насамрэч не, мы не хочам, ідзіце вы нах*й», — распавёў высокапастаўлены еўрапейскі дыпламат.
Прэс-сакратар расійскага дыктатара Дзмітрый Пяскоў заявіў FT, што «еўрапейцы не хочуць дапамагаць мірнаму працэсу», і калі прыехаў прадстаўнік Францыі, ён «не прынёс ніякіх пазітыўных сігналаў, таму сапраўды не пачуў нічога станоўчага».
* * *
Мірныя перамовы па Украіне пры пасрэдніцтве ЗША фактычна праваліліся, паколькі амерыканскі прэзідэнт Дональд Трамп страціў цікавасць да перамоўнага працэсу з-за вайны ў Іране, піша Financial Times.
Як распавялі выданню чатыры дыпламаты ЕС, якія ўдзельнічаюць у перамовах з Украінай, канфлікт на Блізкім Усходзе адцягнуў увагу Вашынгтона ад мірнага пагаднення. Адзін з прадстаўнікоў Еўрапейскага Саюза адзначыў, што перамоўны працэс фактычна знаходзіцца ў «небяспечнай зоне».
«Блізкі Усход сур'ёзна пераарыентаваў палітычную ўвагу з Украіны. Для нас і для Украіны гэта катастрофа», — сказаў ён.
Дыпламаты таксама паведамілі, што еўрапейскіх партнёраў папярэдзілі аб магчымых затрымках у пастаўках амерыканскай зброі Украіне. У прыватнасці, гаворка ідзе пра сістэмы супрацьпаветранай абароны, паколькі Вашынгтон зараз аддае прыярытэт заказам з Блізкага Усходу.
Адзін з удзельнікаў неафіцыйных перамоў заявіў, што ў бліжэйшы час новых перамоў можа не быць. «Я не думаю, што расіяне хочуць зноў весці перамовы ў бліжэйшы час. Таму што гаварыць няма пра што», — сказаў ён.
У ЕС усё больш сумняваюцца, што мірныя перамовы могуць быць паспяховымі без дадатковага ціску на Маскву. У прыватнасці, канцлер Германіі Фрыдрых Мерц падчас візіту ў Белы дом спрабаваў пераканаць Трампа ўзмацніць ціск на Расію. Аднак, як адзначаюць суразмоўцы выдання, прэзідэнт ЗША не праявіў цікавасці да абмеркавання гэтага пытання, і не было прыкмет гатоўнасці Вашынгтона ўзмацніць ціск на Крэмль.
* * *
Міністэрства юстыцыі ЗША можа ўзбудзіць крымінальную справу супраць Такера Карлсана. Пра гэта сам блогер і былы вядучы Fox News заявіў у сацсетцы Х.
У сваім выступе Такер Карлсан заявіў, што ЦРУ «рыхтуе пэўны крымінальны акт» супраць яго ў Міністэрства юстыцыі «на аснове меркаванага злачынства». Следчых нібыта зацікавілі яго размовы з афіцыйнымі асобамі ў Іране, якія адбыліся яшчэ да пачатку адкрытага ваеннага супрацьстаяння.
Журналіст мяркуе, што яго хочуць прызнаць замежным агентам (згодна з законам FARA), які дзейнічаў у інтарэсах варожай ЗША дзяржавы. Разам з тым ён падкрэсліў, што яго праца заключаецца ў камунікацыі з рознымі людзьмі для высвятлення падзей у свеце, і ён не мае намеру спыняць гэтую дзейнасць.
Такер Карлсан выказваў сваю нязгоду з вайной у Іране падчас трох сустрэч з прэзідэнтам ЗША Дональдам Трампам у Авальным кабінеце на працягу тыдняў, што папярэднічалі ваеннай кампаніі, якая пачалася 28 лютага.
Таксама Карлсан вядомы як адзін з галоўных транслятараў расійскай прапаганды на Захадзе. У 2024 годзе ён стаў першым журналістам, які надаў пляцоўку Уладзіміру Пуціну для апраўдання агрэсіі супраць Украіны, і браў інтэрв'ю ў Аляксандра Лукашэнкі.