Расійскія войскі страцілі больш за 200 кв. км у Данецкай вобласці

Пуцін не захопіць Данбас ні да канца года, ні праз шэсць месяцаў: украінскія войскі адкінулі армію РФ з-пад Лімана, што зацягне «вызваленне Данбаса» яшчэ невядома на колькі. Разумеючы гэта, Масква пачынае тэрор у дачыненні да заходніх саюзнікаў Украіны. Ідуць 1664-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

На працягу мінулых сутак ва Украіне зафіксавана 208 баявых сутыкненняў, паведамляе Генштаб УСУ ў ранішняй зводцы 14 верасня.

На Пакроўскім кірунку расійцы здзейснілі 26 атак у кірунку Дабраполля, Мірнага, Сяргееўкі і раёнах населеных пунктаў Дарожнае, Шаўчэнка, Удачнае, Новамікалаеўка.

На Канстанцінаўскім кірунку зафіксавана 20 атак паблізу Канстанцінаўкі, Доўгай Балкі, Русінага Яру, Тарэцкага, Кучарава Яру і ў бок Мікалаеўкі.

На Гуляйпільскім і Славянскім кірунках расіяне па восем разоў на кожным атакавалі пазіцыі УСУ.

На Паўднёва-Слабажанскім кірунку ўкраінскія падраздзяленні адбілі шэсць атак.

* * *

Расійскія войскі страцілі больш за 200 кв. км на галоўным напрамку наступу ў Данецкай вобласці і ключавы плацдарм каля Лімана. Гэта сарвала планы РФ па акружэнні Славянска-Краматорскай агламерацыі з поўначы, паведамляе амерыканскі Інстытут вывучэння вайны (ISW), OSINT-аналітык Клеман Молен, а пазней пацвердзілі ў Rochan Consulting.

Украінскае контрнаступленне доўжылася чатыры месяцы. Пасля некалькіх механізаваных штурмаў УСУ паслядоўна вызвалілі Новае ў чэрвені, да сярэдзіны жніўня дасягнулі Калодзежаў, а затым правялі яшчэ адзін штурм паміж Кацярынаўкай і Навалюбаўкай. Гэта фактычна адрэзала расійскую групоўку, якая наступала.

Па ацэнцы кіраўніка Rochan Consulting Конрада Музікі, расійская армія страціла 240 кв. км і праваліла аперацыю па акружэнні Славянска-Краматорскай агламерацыі з поўначы.

ISW піша, што вынікам украінскай аперацыі стала поўнае абнуленне тэрытарыяльных набыткаў Расіі з пачатку сакавіка.

Ваенныя эксперты РФ таксама прызнаюць, што Сілам абароны Украіны ўдалося прарваць «вельмі старую лінію абароны», і яны фактычна выйшлі ў тыл групоўкі расійскіх войскаў, якая дзейнічае ў Лімане. Войскі РФ у гэтай зоне аказаліся «фактычна ў акружэнні».

* * *

У ноч на 14 верасня Расія атакавала Украіну 108 ударнымі БпЛА тыпу Shahed, Гербера, дронамі-імітатарамі тыпу «Пародыя». Супрацьпаветранай абаронай збіта/задушана 85 БпЛА.

У Канатопскім раёне Сумскай вобласці ў выніку атакі дрона загінуў энергетык, які выехаў на рамонт пашкоджанай электрасеткі, яшчэ адзін работнік атрымаў раненні.

Расія атакавала ноччу Ізюм Харкаўскай вобласці кіраванымі авіябомбамі. Пацярпелі двое дарослых і 2-месячнае дзіця.

* * *

Цягнік, у якім знаходзіліся адзін з бліжэйшых саветнікаў канцлера Германіі Фрыдрыха Мерца Гюнтэр Заўтэр, саветнікі па пытаннях бяспекі іншых еўрапейскіх краін, экс-прэм'ер Вялікабрытаніі Борыс Джонсан, мог падвергнуцца ўдару расійскага беспілотніка, піша Spiegel.

Уся гэтая дэлегацыя ў суботу ноччу ехала на цягніку з Кіева ў Польшчу. Каля 5 гадзін раніцы цягнік спыніўся паблізу польскай мяжы ў Ягодзіне. Там быў атакаваны іншы састаў — беспілотнік трапіў у лакаматыў цягніка.

Праваднікі пабудзілі пасажыраў для эвакуацыі, аднак хутка была абвешчана адмена трывогі, бо іншых дронаў выяўлена не было.

«Укрзалізніца» мяркуе, што мэтай атакі РФ мог быць менавіта дыпламатычны цягнік. Аднак ён адправіўся са станцыі раней за запланаваны час, што дазволіла пазбегнуць атакі.

«Цалкам верагодна, што мэтай гэтага расійскага дрона мог быць дыпламатычны цягнік, які адправіўся са станцыі раней прадугледжанага для яго часу ў рамках перагляду графіка руху цягнікоў у рэжыме рэальнага часу з-за пастаяннай пагрозы расійскіх удараў», — адзначылі ва «Укрзалізніцы».

* * * 

* * *

Расія ўжо з'яўляецца пагрозай для ўсяго еўрапейскага кантынента, таму падтрымка Украіны з боку партнёраў — гэта інвестыцыя ва ўласную бяспеку, а не дабрачыннасць, заявіў міністр замежных спраў Эстоніі Маргус Цахкна ў сетцы X.

Па яго словах, у час свайго трохдзённага візіту ва Украіну ён сваімі вачыма бачыў, як украінцы вымушаны жыць пад пастаяннымі расійскімі атакамі і паветранымі трывогамі.

Ён адзначыў, што пагроза ад дзеянняў Крамля не абмяжоўваецца ўкраінскай тэрыторыяй, і прывёў у прыклад расійскі ўдар па цягніку каля мяжы ў Ягодзіне, які адбыўся побач з мяжой ЕС і НАТА неўзабаве пасля таго, як яе праехалі члены эстонскай дэлегацыі. А Еўропа ўжо сутыкаецца з сабатажам, кібератакамі, дэзінфармацыяй і спробамі Расіі размясціць выбухоўку ў еўрапейскіх лагістычных ланцугах.

Эстонскі чыноўнік выказаў перакананне, што ваенная дапамога Сілам абароны Украіны з'яўляецца непасрэднай абаронай самой Еўропы.

* * *

Прэм'ер-міністр Польшчы Дональд Туск склікаў экстраннае пасяджэнне з прадстаўнікамі ўрада, арміі і спецслужбаў пасля расійскіх удараў па станцыі Ягодзін каля польскай мяжы. Варшава не выключае, што далейшая эскалацыя з боку Масквы можа закрануць тэрыторыю Польшчы, паведамляе RMF24.

Пасяджэнне адбылося 13 верасня ва Урадавым цэнтры бяспекі. У ім прынялі ўдзел прадстаўнікі Міністэрства ўнутраных спраў, Міністэрства нацыянальнай абароны і сілавых структур краіны.

Туск заявіў, што Польшча павінна быць гатовая да магчымага пагаршэння сітуацыі.

Асобна Туск звярнуў увагу на прымяненне Расіяй новых тыпаў беспілотнікаў. «Атакі гэтай ноччу паказваюць, што расіяне гатовыя выкарыстоўваць больш небяспечнае абсталяванне, чым калі-небудзь раней. Я маю на ўвазе рэактыўныя дроны. Іх далёкасць і дакладнасць выклікаюць трывогу», — заявіў ён.

Прэм'ер адзначыў, што нават Украіна, якая добра падрыхтаваная да процідзеяння беспілотнікам, не здольная на 100% эфектыўна іх збіваць.

«Мы павінны ўсведамляць, што Расія мае такія магчымасці. Таму я таксама буду чакаць інфармацыі пра тое, наколькі мы гатовыя да магчымага выкарыстання беспілотнікаў і звязаных з гэтым спробаў сарваць нашу дзейнасць — ці то на чыгунках, ці то на працоўных месцах», — дадаў Туск.

* * *

Кіраўнік Белага дома Дональд Трамп пры зносінах з журналістамі заявіў, што папрасіў прэзідэнта Украіны Уладзіміра Зяленскага не наносіць удары па прадпрыемствах па вытворчасці дызельнага паліва ў РФ.

«Праблема, якая ў мяне ёсць з Украінай і РФ, заключаецца ў тым, што на дызельнае паліва цяпер назіраецца значны рост цэн. Значная яго частка паступае з Расіі. І расійскія прадпрыемствы падвяргаюцца ўдарам з боку Украіны. І я папрасіў прэзідэнта Зяленскага не наносіць удары па прадпрыемствах па вытворчасці дызельнага паліва, НПЗ», — сказаў Трамп.

Пры гэтым Трамп нічога не сказаў пра тое, ці заклікаў ён Пуціна адказаць люстэркава і спыніць удары па ўкраінскай энергетыцы. Ці ў прынцыпе спыніць несправакаваную поўнамаштабную вайну супраць Украіны, якую Расія вядзе ўжо пяты год.