Вызваленні не спыняюць пераслед. Хронікі рэпрэсій 5 кастрычніка
Праваабарончы цэнтр «Вясна» адзначае, што ў верасні сітуацыя з правамі чалавека ў Беларусі заставалася крытычнай: на канец месяца ў зняволенні знаходзіліся 876 палітвязняў, а 25 чалавек за месяц прызналі палітычнымі зняволенымі. Пры гэтым працягваліся новыя крымінальныя справы, трансгранічны пераслед і ціск на грамадзянскую супольнасць.
Праваабаронцы: у верасні рэпрэсіі ў Беларусі не саслаблі
Праваабарончы цэнтр «Вясна» апублікаваў агляд сітуацыя з правамі чалавека ў Беларусі ў верасні. Паводле яго, сітуацыя з правамі чалавека застаецца крытычнай, а сістэмныя палітычна матываваныя рэпрэсіі працягваюцца.
На канец верасня ў беларускіх месцах пазбаўлення волі знаходзіліся 876 палітвязняў, у тым ліку 113 жанчын. За месяц праваабаронцы прызналі палітычнымі зняволенымі яшчэ 25 чалавек. Адначасова ў верасні па памілаванні былі вызваленыя 38 палітвязняў. «Вясна» адзначае, што вызваленні не азначаюць аднаўлення справядлівасці і рэабілітацыі.
Працягваліся пераслед удзельнікаў пратэстаў 2020 года, ціск на былых палітвязняў, праваабаронцаў і іх сваякоў, а таксама трансгранічныя рэпрэсіі. Праваабаронцы фіксавалі спробы схіліць беларусаў у выгнанні да супрацоўніцтва, сачэнне і ціск праз іх родных, якія засталіся ў Беларусі.
Захоўваўся і ціск на грамадзянскую супольнасць: працягваліся ліквідацыя арганізацый, пераслед за ўдзел у мірных пратэстах і выказванне меркаванняў, а таксама прызнанне людзей і рэсурсаў «экстрэмісцкімі». У месцах зняволення праваабаронцы працягвалі фіксаваць катаванні, жорсткае абыходжанне і неналежную медыцынскую дапамогу. У асабліва ўразлівым становішчы праз стан здароўя, узрост або ўмовы зняволення знаходзіліся 170 палітвязняў.
Такім чынам, у верасні вызваленні палітвязняў адбываліся адначасова з працягам сістэмных рэпрэсій — новымі крымінальнымі справамі, пераследам за пратэсты і выказванні, ціскам на грамадзянскую супольнасць і трансгранічным пераследам.
26-гадовую жыхарку Пінска асудзілі за «садзейнічанне экстрэмісцкай дзейнасці»
Галіне Федаровіч 26 гадоў. Яна родам з Горак, пасля замужжа разам з сям'ёй пераехала ў Пінск.
Справу жанчыны разглядаў Брэсцкі абласны суд. Яе прызналі вінаватай паводле ч. 1 і ч. 2 арт. 361-4 КК — «садзейнічанне экстрэмісцкай дзейнасці».
Паводле «Нашай Нівы», Федаровіч прысудзілі «хатнюю хімію». У сакавіку 2026 года жанчына знікла з сацыяльных сетак — магчыма, менавіта тады яе затрымалі. Дакладна невядома, ці знаходзілася яна ў СІЗА да суда.
У Беларусі працягваюць прадаваць маёмасць палітвязняў
На аўкцыён выставілі два аўтамабілі, якія, верагодна, належаць палітвязням Святлане Пазняк і Аляксандру Карнееву, раней асуджаным па палітычна матываваных крымінальных справах. На гэта звярнула ўвагу «Люстэрка».
У Мінску прадаюць Peugeot 307 2001 года выпуску. Уладальніцай аўтамабіля пазначаная Святлана Пазняк. Сярод абцяжаранняў указана забарона на рэгістрацыйныя дзеянні з боку судовага выканаўцы.
Другі аўтамабіль — Volkswagen Passat 2008 года. На яго накладзены арышт следчых органаў і судовага выканаўцы. Уладальнікам пазначаны Аляксандр Карнееў.