Рэха вайны: Расіяне рыхтуюцца з'язджаць з РФ і выводзяць грошы з краіны

Расіяне пачалі актыўна выводзіць зберажэнні за мяжу і скупляць валюту на фоне санкцый і чаканняў новых абмежаванняў. Са снежня 2024 па чэрвень 2026 хатнія гаспадаркі РФ перавялі нерэзідэнтным брокерам амаль 600 млрд рублёў. Гэта сума перавышае аб'ём аналагічных пераводаў за папярэднія сем гадоў разам узятых. Ідуць 1635-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

На працягу мінулых сутак ва Украіне зафіксавана 212 баявых сутыкненняў, паведамляе Генштаб УСУ ў ранішняй зводцы 16 жніўня.

На Пакроўскім кірунку расійцы здзейснілі 34 атакі ў раёнах Васільеўкі, Удачнага, Котліна, Новападгароднае і ў бок Біліцкага, Новага Донбаса, Шаўчэнкі, Сяргееўкі, Новапаўлаўкі і іншых

На Канстанцінаўскім кірунку зафіксавана 28 атак у раёнах Канстанцінаўкі, Іванаполля, Іллінаўкі, Навасёлаўкі, Сафіеўкі, Русінага Яру.

На Славянскім кірунку расіяне здзейснілі 21 штурм у раёнах Рэзнікоўкі, Крывой Лукі, Закітнага і ў бок Рай-Аляксандраўкі і Піскунаўкі.

На Купянскім кірунку адбылося 10 наступальных дзеянняў арміі РФ ў бок Радзькоўкі і Курылаўкі.

Спробы ўклиніцца ў абарону Украіны адбіты на Ліманскім кірунку, дзе расійцы дзевяць разоў атакавалі ў бок Чарнешчыны, Новага Міру, Дробышава, Ліману, Дзібровы.

* * *

У ноч на 16 жніўня Расія атакавала Украіну 106 ударнымі дронамі і ракетамі розных тыпаў. Супрацьпаветранай абаронай збіта/задушана тры кіраваныя авіяцыйныя ракеты Х-59/69, а таксама 85 беспілотнікаў, у тым ліку рэактыўных.

Ноччу 16 жніўня Расія нанесла ўдар па прамысловых аб'ектах Крывога Рогу. У выніку атакі загінуў адзін чалавек, яшчэ шасцёра атрымалі раненні.

Колькасць пацярпелых у выніку начной атакі па Кіеве ўзрасла да трох. Ратавальнікі працягваюць ліквідаваць наступствы начной атакі ў Абалонскім і Галасееўскім раёнах, і ўдакладняць маштабы разбурэнняў.

Самалёт F-18 ВПС Іспаніі збіў невядомы беспілотнік у небе над Румыніяй — дрон заляцеў з боку Малдовы. Пра гэта паведамілі ў Міністэрстве нацыянальнай абароны Румыніі 16 жніўня.

Сілы абароны Украіны ноччу 16 жніўня паразілі лагістычны хаб Wildberries у Каледзіне Маскоўскай вобласці ўкраінскімі дронамі FP-1. Гэта адзін з самых вялікіх лагістычных комплексаў кампаніі — яго плошча складае каля 250 000 кв.м.

* * * 

* * *

Крэмль імкнецца стварыць уражанне маштабнага прасоўвання сваіх войскаў, а для пацвярджэння поспехаў выкарыстоўвае сумнеўныя відэаматэрыялы, піша амерыканскі Інстытут вывучэння вайны (ISW).

15 жніўня міністр абароны РФ Андрэй Белавусаў правёў публічную інспекцыю Усходняй групоўкі войскаў. Пасля гэтага расійскае Мінабароны заявіла, што вайскоўцы нібыта захапілі Рыбальскае паўднёва-заходней Аляксандраўкі, а ўсяго ў летнюю кампанію ўзялі пад кантроль 19 населеных пунктаў. Паралельна расійскі ваенны блогер «Воін ДВ», які рэгулярна публікуе матэрыялы з зоны адказнасці Усходняй групоўкі войскаў, 14 і 15 жніўня апублікаваў вялікую колькасць відэа. Па яго сцвярджэнні, кадры былі зроблены ў перыяд з 12 па 14 жніўня. На іх расійскія ваеннаслужачыя з сцягамі нібыта знаходзяцца ў шэрагу населеных пунктаў паблізу Аляксандраўкі і Гуляйполя.

У ISW маюць падставы меркаваць, што значная частка матэрыялаў «Воіна ДВ» не адпавядае рэчаіснасці: некаторыя фрагменты, верагодна, створаны або зменены з дапамогай штучнага інтэлекту. Іншыя відэа могуць утрымліваць старыя кадры, якія выдаюцца за нядаўнія. Такім чынам, відэаматэрыялы не могуць служыць надзейным пацвярджэннем заяўленага расійскага прасоўвання.

Такім чынам, Масква імкнецца стварыць памылковае ўражанне аб нібыта маштабным прасоўванні войскаў і магчымым абвале ўкраінскай абароны. Расійскі бок спрабуе ўплываць не толькі на ўспрыманне сітуацыі ўнутры РФ, але і на ацэнку працякання вайны за межамі Расіі.

* * *

Расіяне пачалі актыўна выводзіць зберажэнні за мяжу і скупляць валюту на фоне санкцый і чаканняў новых абмежаванняў з боку Крамля, паведамляе Служба знешняй выведкі Украіны.

Расіяне рэзка нарасцілі пераводы грошай на рахункі замежных брокераў, спрабуючы вывесці частку капіталу з краіны, перш чым гэта можа стаць складаней. Па даных выведкі, са снежня 2024 па чэрвень 2026 хатнія гаспадаркі РФ перавялі нерэзідэнтным брокерам амаль 600 млрд рублёў. Гэта сума перавышае аб'ём аналагічных пераводаў за папярэднія сем гадоў разам узятых.

Асабліва прыкметна пераводы выраслі вясной 2026 года. У красавіку-чэрвені расіяне штомесяц пераводзілі замежным брокерам каля 42-45 млрд рублёў, што эквівалентна больш за 500 млн долараў.

Па ацэнцы СЗРУ, прыкладна 40% гэтых сродкаў з'яўляюцца фактычным вывадам грошай з Расіі. Тры чвэрці гэтай сумы прыпадае на так званыя «парковачныя» рашэнні, калі брокерскі рахунак фактычна выкарыстоўваецца замест валютнага банкаўскага рахунку. Яшчэ каля чвэрці пераводаў звязана з падрыхтоўкай да магчымага пераезду за мяжу.

Паралельна насельніцтва РФ вярнулася да актыўнай куплі наяўнай замежнай валюты. У чэрвені чыстыя пакупкі валюты расіянамі склалі 54,9 млрд рублёў. У траўні паказчык дасягнуў 52,2 млрд, а ў красавіку – 51,8 млрд рублёў.

Такім чынам, усяго за тры месяцы расіяне набылі наяўную валюту амаль на 159 млрд рублёў. Гэта рэкордны паказчык з пачатку поўнамаштабнага ўварвання Расіі ва Украіну.

У той жа час грамадзяне РФ пачалі больш актыўна забіраць грошы з банкаўскіх рахункаў. За студзень-ліпень з банкаўскай сістэмы Расіі ў наяўныя сышло каля 2 трлн рублёў. Толькі ў ліпені насельніцтва зняло каля 620 млрд рублёў. Расіяне рыхтуюцца з'язджаць.

* * *

Дзярждэп ЗША паведаміў Кангрэсу аб намеры дазволіць Турцыі перадаць Украіне з уласных запасаў 12 пускавых установак M270 MLRS, 70 ракет M39 ATACMS, больш за 2,5 тыс. няўзброеных рэактыўных снарадаў M26 з касетнымі боепрыпасамі і 47 тысяч касетных артылерыйскіх снарадаў M509A1 калібра 203 мм.

У расійскім МЗС назвалі «адкрыццём скрыні Пандоры» запланаваную перадачу Украіне амерыканскіх ракет і артылерыйскіх боепрыпасаў з турэцкіх арсеналаў, адобраную Дзярждэпартаментам ЗША. Пра гэта паведаміла афіцыйны прадстаўнік ведамства Марыя Захарава ў Тэлеграм.

Па яе словах, дзеянні Анкары і Вашынгтона, якія «выкарыстоўваюць міратворчую рыторыку» і адначасова пастаўляюць зброю Кіеву, «непазбежна падрываюць узаемны давер, асабліва на фоне неаднаразовых запэўніванняў турэцкіх прадстаўнікоў у тым, што Турцыя пазбягае "летальных" паставак Кіеву». Захарава заявіла, што перадача зброі «няздольная неяк сур'ёзна паўплываць на развіццё» вайны па расійскім сцэнарыі, але гэта прывядзе да «сур'ёзнага ўрону двухбаковым адносінам РФ з Вашынгтонам і Анкарой». Пры гэтым яна заявіла, што ў выпадку ўхвалення паставак Украіна паспрабуе «маштабаваць ахвяры і разбурэнні» — у Расіі.

* * *

Расія можа ўзмацніць баявыя дзеянні супраць Украіны зімой і паспрабаваць пачаць новае наступленне. Заходнія чыноўнікі і аналітыкі таксама чакаюць павелічэння расійскіх удараў па ўкраінскай грамадзянскай інфраструктуры, піша The New York Times.

Па ацэнках суразмоўцаў выдання, прэзідэнт РФ Уладзімір Пуцін можа скарыстацца дэфіцытам сродкаў супрацьпаветранай абароны ва Украіне, каб павялічыць інтэнсіўнасць ракетных і дронавых атак у зімовы перыяд.

На Захадзе таксама не выключаюць, што Крэмль можа аб'явіць абмежаваную мабілізацыю для папаўнення расійскай арміі. Па словах асобных чыноўнікаў, такое рашэнне можа быць прынята ўжо пасля парламенцкіх выбараў у Расіі, якія павінны адбыцца ў верасні.

У той жа час заходнія краіны асцерагаюцца далейшага пашырэння канфлікту. У прыватнасці, Пуцін можа паспрабаваць праверыць гатоўнасць НАТА супрацьстаяць расійскаму ціску, выйшаўшы за межы цяперашніх гібрыдных атак у Еўропе.

Па даных NYT, у цяперашні час практычна няма прыкмет таго, што расійскі прэзідэнт гатовы да сур'ёзных перагавораў аб заканчэнні вайны.

Пуцін працягвае настойваць як мінімум на ўстанаўленні поўнага кантролю Расіі над Данбасам. Заходнія чыноўнікі і аналітыкі мяркуюць, што пазіцыя Крамля можа змяніцца, калі Расія не зможа дасягнуць гэтай мэты да восені 2027 года. У такім выпадку, на іх думку, верагоднасць пачатку перагавораў можа ўзрасці.