The Hill: Заклік ЗША не атакаваць расійскія НПЗ жахлівы
Поспех Байдэна на выбарах у лістападзе нельга лічыць больш важным, чым выратаванне жыццяў украінцаў. Каб выйграць вайну, Украіна павінна скараціць магчымасці Крамля забяспечваць войскі, піша выданне The Hill.
Поспех Байдэна на выбарах у лістападзе нельга лічыць больш важным, чым выратаванне жыццяў украінцаў. Фота President.gov.ua
Заклік Белага дома спыніць атакі на расійскія нафтаперапрацоўчыя заводы з-за магчымага росту цэнаў на нафту з'яўляецца абсурдным і асуджаным на правал палітычным рашэннем адміністрацыі Джо Байдэна, піша амерыканская газета The Hill.
«Падчас Другой сусветнай вайны саюзнікі пачалі бамбіць нафтаперапрацоўчыя заводы нацысцкай Германіі ў 1942 годзе і працягвалі гэта рабіць несупынна да канца вайны ў маі 1945 года. Гэта было ключом да перамогі ў вайне, таму што гэта парушала здольнасць немцаў дазапраўляць танкі, знішчальнікі, бамбардзіроўшчыкі, бронетэхніку і грузавікі забеспячэння. Для перамогі ў вайне Украіна таксама павінна скараціць здольнасць Крамля пастаўляць войскам боепрыпасы і зброю на лінію фронту ў Данбасе і на Крымскім паўвостраве», — гаворыцца ў публікацыі.
Пазіцыя адміністрацыі Байдэна, што ставіць цану на бензін вышэй за жыцці і суверэнітэт украінцаў, у публікацыі названая «жахлівай»: «Поспех Байдэна на выбарах у лістападзе нельга лічыць больш важным, чым выратаванне жыццяў украінцаў».
Глядзіце таксама
Газета таксама падкрэсліла той факт, што ў той жа час Белы дом не выступаў з асуджэннем нядаўніх удараў расійскімі крылатымі ракетамі і беспілотнікамі па ўкраінскіх грамадзянскіх аб’ектах і энергетычнай інфраструктуры. А Байдэн, як і раней, працягвае прытрымліваць найважнейшую зброю і боепрыпасы, неабходныя Украіне для барацьбы і перамогі ў вайне.
«Зяленскі супраціўляецца тым, што мае, — беспілотнікамі. І б’е Расію па балючым месцы, па кашальку. Ён атакуе глабальныя сродкі Крамля для фінансавання пуцінскай вайны», — піша The Hill.
Тым часам Пуцін не адмаўляецца ад сваёй ідэі па знішчэнні Украіны і не мае намеру здавацца, адзначае газета, пакуль ЗША і NATO не змогуць даць Украіне ўсё неабходнае для эфектыўнага супрацьстаяння:
«Па-ранейшаму няма плана перамогі над Расіяй. Міністр абароны ЗША Лойд Осцін адкрыў 20-ю канферэнцыю кантактнай групы па абароне Украіны ў Рамштайне заявай: «ЗША і гэтая кааліцыя не дазволяць Украіне пацярпець няўдачу». Але менавіта гэта адбудзецца, калі яны не забяспечаць Украіну неабходным узбраеннем, што трэба для разгрому і гвалтоўнага выцяснення расійскіх вайскоўцаў з краіны. Абарончая зброя з гэтай задачай не справіцца».
Украіна цяпер стаіць перад выбарам: перамагчы або памерці. І менавіта з-за вычарпання боепрыпасаў, неабходных для блізкага бою, Узброеныя сілы Украіны вымушаныя наносіць удары па стратэгічных аб'ектах, каб аслабіць Расію, піша выданне: «Эфектыўнага адказу на Захадзе няма. Ва Украіны ён ёсць, але Беламу дому гэта не падабаецца. Вашынгтону і Бруселю трэба пачаць прымаць больш узважаныя рашэнні, таму што Пуцін не збіраецца здавацца».
Глядзіце таксама
ЗША заклікалі Украіну спыніць атакі на расійскія нафтаперапрацоўчыя заводы: Што пра гэта вядома?
- Financial Times пісала, што ЗША заклікалі Украіну спыніць атакі на энергетычную інфраструктуру Расіі. І папярэджваюць, што ўдары беспілотнікаў могуць падняць сусветныя цэны на нафту і справакаваць меры ў адказ.
- Адзначаецца, што папярэджанне Вашынгтона было перададзенае высокапастаўленым чыноўнікам Службы бяспекі Украіны і яе Галоўнага выведвальнага ўпраўлення.
- Адразу пасля гэтага ў Офісе прэзідэнта Украіны гэтую інфармацыю назвалі выдуманай: «Пасля двух гадоў поўнамаштабнай вайны ніхто не будзе дыктаваць Украіне ўмовы вядзення гэтай вайны».
Паводле www.unian.ua, thehill.com