Толькі адзін дыпламат афіцыйна сустрэўся з Лаўровым на G20
Кіраўнік МЗС Кітая правёў перамовы з Лаўровым — дзясяты раз з пачатку года. Пазней кітайскі дыпламат падпісаў камюніке паводле вынікаў саміту, у якім асуджаецца агрэсія РФ.
На саміце «Вялікай дваццаткі», які прайшоў на Балі, толькі адзін дыпламат сустрэўся з кіраўніком МЗС РФ Сяргеем Лаўровым — кітайскі міністр замежных спраў Ван І. Пра гэта паведамляе korrespondent.net са спасылкай на «Bloomberg».
«Міністр замежных спраў Ван І быў адзіным дыпламатам у G-20, які афіцыйна сустракаўся са сваім расійскім калегам Сяргеем Лаўровым, які замяняў Пуціна. Гэта былі іх дзясятыя перамовы ў гэтым годзе», гаворыцца ў паведамленні.
Кіраўнік МЗС Кітая заявіў, што Пекін будзе «і далей прытрымлівацца аб'ектыўнай і справядлівай пазіцыі і адыгрываць канструктыўную ролю» ў садзейнічанні «мірным перамовам».
«Bloomberg» звяртае ўвагу, што Кітай падпісаў камюніке паводле вынікаў саміту G20, у якім сказана, што большасць чальцоў дваццаткі «рашуча асуджаюць вайну ва Украіне». Прэзідэнт Францыі Эмануэль Макрон, які сустракаўся з кіраўніком КНР Сі Цзіньпінам на палях G20, назваў «шчырай» прыхільнасць Кітая Статуту ААН.
На гэтым жа саміце G20 Уладзімір Зяленскі агучыў украінскую формулу міру, якая ўтрымлівае 10 пунктаў. У адказ Лаўроў назваў рыторыку прэзідэнта Украіны «русафобскай і агрэсіўнай», а таксама абвінаваціў Кіеў у нежаданні весці перамовы. Пазней ён пакінуў саміт. Расійскія СМІ паведамлялі, што Лаўроў выступіў на двух пасяджэннях і правёў шэраг двухбаковых сустрэч.