У Латвіі дазволілі перадаваць канфіскаваныя ў п'яных кіроўцаў аўто на патрэбы ўкраінскага войска
Сейм Латвіі ў чацвер у канчатковым чытанні прыняў папраўкі да закону аб падтрымцы цывільнага насельніцтва Украіны, якія прадугледжваюць магчымасць бязвыплатнай перадачы транспартных сродкаў, якія належаць дзяржаве, ва ўласнасць урада Украіны.
Ілюстрацыйнае фота
«Цяпер мы можам рэалізаваць канфіскаваныя ў п'яных кіроўцаў транспартныя сродкі, прадаўшы іх, здаўшы на перапрацоўку або разабраўшы на запчасткі, аднак мы бачым, што ў цяперашніх умовах яны былі б карыснай падтрымкай для народа Украіны», — заявіў агенцтву LETA старшыня камісіі па абароне, унутраных спраў і прадухіленню карупцыі Раймандс Бергманіс, які адказвае за прасоўванне законапраекта ў Сейме.
Рашэнне аб перадачы транспартных сродкаў, якія належаць дзяржаве, у кожным канкрэтным выпадку будзе прымаць урад згодна з Палажэннем аб парадку бязвыплатнай перадачы дзяржаўнай рухомай маёмасці ва ўласнасць замежных урадаў і міжнародных арганізацый.
Працэс перадачы транспартных сродкаў плануецца наладзіць праз арганізацыю, якая супрацоўнічае з урадам Украіны і атрымала канкрэтныя запыты аб дапамозе, гаворыцца ў анатацыі да закона.
Кааліцыя ў Сейме Латвіі раней дасягнула дамоўленасці аб тым, што аўтамабілі, канфіскаваныя ў п'яных кіроўцаў, могуць быць перададзеныя для патрэб украінскай арміі.
У кастрычніку Сейм Латвіі ўхваліў закон аб крыміналізацыі кіравання аўто ў нецвярозым стане.
Зрэшты яшчэ ўвесну такая практыка ўзнікла ў самой Украіне. Так, да пачатку красавіка ў нецвярозых украінскіх кіроўцаў забралі больш за 200 машын — і перадалі іх украінскай арміі.
У Беларусі таксама могуць канфіскаваць аўто за кіраванне ім у стане ап'янення. Да таго ж штраф за кіраванне ў нецвярозым стане з 1студзеня паднялі да сум ад 1600 да 3200 рублёў (раней — ад 1450 да 2900 рублёў). Гэта звязана з тым, што з 1 студзеня базавую велічыню павысілі з 29 да 32 рублёў. Услед за ростам базавай велічыні змяніліся сумы штрафаў а таксама іншых выплат.
Паводле «Еўрапейскай праўды», Delfi