Украіна: У Белгародскай вобласці — аперацыя па вызваленні тэрыторый ад рэжыму Пуціна

Што адбываецца ў Белгародскай вобласці? Галоўнае ўпраўленне выведкі Украіны патлумачыла, што там проста робіцца «паласа бяспекі».

У панядзелак, 22 траўня, у Белгародскай вобласці прагрымелі выбухі, пазней украінскія і расійскія СМІ паведамілі, што ў гэты раён прыбылі расійскія добраахвотнікі.

У Галоўным упраўленні выведкі Украіны заявілі, што ў гэтым рэгіёне РФ праводзіцца аперацыя па «стварэнні зоны бяспекі» выключна з удзелам грамадзян Расіі.

У каментары «Суспільне» прэс-сакратар Галоўнага ўпраўлення разведкі Мінабароны Украіны Андрэй Юсаў адзначыў, што на тэрыторыі Белгародскай вобласці легіён «Свабода Расіі» і «Рускі добраахвотніцкі корпус» праводзяць аперацыю па стварэнні «паласы бяспекі», каб абараніць мірнае насельніцтва Украіны. Паводле яго слоў, аперацыю праводзяць выключна грамадзяне Расіі.

«Так, сёння «Рускі добраахвотніцкі корпус» і Легіён «Свабода Расіі», якія складаюцца з грамадзян Расійскай Федэрацыі, пачалі аперацыю па вызваленні гэтых тэрыторый Белгародскай вобласці ад так званага рэжыму Пуціна і адцісканні ворага з мэтай стварыць пэўную зону бяспекі для абароны мірнага насельніцтва Украіны», — сказаў Юсаў.

Ён дадаў, што ў цяперашні час спецслужба не будзе каментаваць наўпрост планаў гэтай аперацыі, але, па словах прадстаўніка ГУР, «задачай і вынікам павінна стаць павышэнне бяспекі і абарона мірнага насельніцтва Украіны ад нападаў тэрарыстаў і абстрэлаў з боку тэрарыстычных груповак».

Юсаў таксама адзначыў, што інфармацыя аб пацярпелых у цяперашні час удакладняецца.

«Адзінае, што падкрэсліваюць прадстаўнікі РДК і легіёна «Свабода Расіі»: іх дзеянні не ўяўляюць пагрозы мірнаму насельніцтву, мірным грамадзянам, а мэта — адціснуць тэрарыстычныя групоўкі ад мяжы і вызваліць тэрыторыю ад рэжыму Пуціна», — адзначыў прадстаўнік ГУР.

Што адбываецца ў Белгародскай вобласці

Каля 14:00 легіён «Свабода Расіі» і РДК заявілі, што «вызвалілі» Казынку Белгародскай вобласці і ўвайшлі ў пасёлак Грайваран.

Раніцай губернатар Белгародскай вобласці Вячаслаў Гладкоў паведаміў аб нібыта абстрэлах некалькіх вёсак Грайваронскай гарадской акругі.

«Спрацавала наша сістэма супрацьпаветранай абароны. Частка ракеты ўпала на сад прыватнага жылога дома ў вёсцы Антонаўка. На месцы працуюць выбухатэхнікі і аператыўныя службы, якія вядуць дэзактывацыю», — напісаў ён у Telegram.

Акрамя таго, ён паведаміў аб абстрэлах яшчэ некалькіх населеных пунктаў: Грайварана, а таксама вёсак Козінка, Гара-Падол і Замосце.

У Новай Тавалжанцы, па словах Гладкова, беспілотнік скінуў выбухоўку каля жылога дома, а сам БПЛА ўпаў за 100 метраў ад жылога дома.

Каля 12:00 Telegram-канал «Выстрал» паведаміў, што на мяжы Белгародскай вобласці ў раёне вёскі Дронаўка ішоў бой з украінскай ДРГ.

«З абодвух бакоў перакінута баявая тэхніка, у небе заўважана некалькі беспілотнікаў. Працуе супрацьпаветраная абарона», — гаворыцца ў паведамленні.



У расійскіх СМІ з'явіліся відэа нібыта нападаў на пункт пропуску на мяжы ў Грайваронскім раёне Белгародскай вобласці. На адным з відэа на блокпост заязджае танк пад сцягам Украіны.

Губернатар Белгародскай вобласці Вячаслаў Гладкоў абвінаваціў Украіну ў «інфармацыйнай атацы на Белгародскую вобласць з мэтай сеяць паніку».

У 14.20 Гладкоў паведаміў, што на тэрыторыю Грайваронскага раёна ўвайшла дыверсійна-разведвальная група Узброеных сіл Украіны.

«Узброеныя сілы Расійскай Федэрацыі сумесна з памежнікамі, Расгвардыяй і ФСБ прымаюць неабходныя меры для ліквідацыі праціўніка», — напісаў ён у Telegram.

Прэс-сакратар Пуціна Пяскоў пракаментаваў сітуацыю ў Белгародскай вобласці: «Мэта ўкраінскай дыверсіі ў Белгародскай вобласці — адцягнуць увагу ад бахмуцкага кірунку, мінімізаваць палітычны эфект ад страты ўкраінскім бокам Арцёмаўска… Ідзе праца па выцісканні ўкраінскіх дыверсантаў з расійскай тэрыторыі і знішчэнні гэтай дыверсійнай групы, сіл і сродкаў на месцы дастаткова».

Паводле suspilne.media, ua.korrespondent.net, сацсетак