Украінскія вайскоўцы патапілі расійскую падводную лодку ў акупаваным Крыме
Таксама істотна пашкоджаныя чатыры пускавыя ўстаноўкі зенітна-ракетнага комплексу «Трыумф».
Фота reuters
Сілы абароны Украіны паспяхова ўразілі і затапілі падводную лодку «Растоў-на-Доне» ў часова акупаваным Крыме. Пра гэта паведамляе Генеральны штаб УСУ ў сацыяльнай сетцы Facebook.
«Сілы абароны Украіны нанеслі ўдары па падводнай лодцы і зенітным ракетным комплексе С-400 ворага ў часова акупаваным Крыме», — адзначаецца ў паведамленні.
У прыватнасці, паводле пацверджанай інфармацыі, учора падраздзяленнямі ракетных войскаў, ва ўзаемадзеянні з падраздзяленнямі ваенна-марскіх сіл Узброеных сіл Украіны істотна пашкоджаныя чатыры пускавыя ўстаноўкі ЗРК «Трыумф». Таксама ў порце Севастопаля паспяхова ўражаная падводная лодка Чарнаморскага флоту РФ «Растоў-на-Доне».
«У выніку траплення лодка затанула на месцы», — гаворыцца ў паведамленні.
Як удакладнілі ў Генштабе, падводная лодка Б-237 «Растоў-на-Доне» (паводле класіфікацыі НАТО — клас Kilo) з'яўляецца адной з чатырох падводных лодак класа Kilo, здольных прымяняць ракеты «Калібр».
Вядома, што «Растоў-на-Доне» быў уведзены ў эксплуатацыю 26 снежня 2014 года.
Глядзіце таксама
Раней, 13 верасня 2023 года, у выніку ўкраінскай ракетнай атакі судна атрымала істотныя пашкоджанні.
«У далейшым ажыццяўляўся яго рамонт і праходзілі выпрабаванні ў акваторыі севастопальскай гавані. Кошт падводнай лодкі ацэньваецца ў 300 мільёнаў долараў. Знішчэнне «Растова-на-Доне» чарговы раз даказвае, што для расійскага флоту няма бяспечнага месца ва ўкраінскіх тэрытарыяльных водах Чорнага мора», — сказана ў паведамленні.
Як паведамляў УНІАН, у ноч на пятніцу, 2 жніўня, у часова акупаваным Крыме прагрымелі выбухі, якія чулі ад Севастопаля да Балаклавы. Над цэнтрам Севастопаля быў бачны дым. Распаўсюджвалася інфармацыя, што адбыўся прылёт у раёне 13-га суднарамонтнага завода Чарнаморскага флоту РФ у Кілен-бухце.
Пазней тэлеграм-канал «Крымскі вецер» са спасылкай на свае крыніцы паведаміў, што ноччу ў Севастопалі на вышынях Кая-Баш ўразілі пазіцыю ЗРК С-400 «Трыумф».