Вялікабрытанія запросіць экспертаў з Украіны, каб абараняць саюзнікаў ад іранскіх дронаў
Вайна ва Украіне мае глабальны маштаб. З-за яе Пуцін не здольны дапамагаць сваім хаўруснікам, а досвед Украіны ў абароне ад дронаў будзе выкарыстаны ў іншых канфліктах. Ідуць 1468-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
Фота Getty Images
На працягу мінулых сутак ва Украіне зафіксавана 145 баявых сутыкненняў, паведамляе Генштаб УСУ ў ранішняй зводцы 2 сакавіка.
На Гуляйпольскім кірунку адбыліся 34 атакі расіян у раёнах Гуляйполя, Мірнага і ў бок Святопетраўкі, Залізнычнага, Дабраполля і Стараўкраінкі.
На Пакроўскім кірунку абаронцы Украіны спынілі 22 штурмы расійцаў у раёнах Шахава, Чырвонага Ліману, Радзінскага, Пакроўску, Котліна, Удачнага, Маладзецкага.
На Славянскім кірунку УСУ спынілі 20 спроб арміі РФ прасунуцца ў раёнах Ямпалю, Дронаўкі, Платонаўкі, Закітнага і ў кірунку Рай-Аляксандраўкі.
На Канстанцінаўскім кірунку расіяне здзейснілі 14 атак у раёнах Канстанцінаўкі, Пляшчыеўкі, Іванаполля, Берастоку, Русінага Яру, Сафіеўкі.
На Аляксандраўскім і Ліманскім кірунках зафіксавана па сем боесутыкненняў на кожным.
* * *
Наземныя баявыя групы разведкі CG132 132-га асобнага разведвальнага батальёна 7-га корпуса хуткага рэагавання Дэсантна-штурмавых войскаў УСУ прарвалі лінію абароны расіян на Аляксандраўскім кірунку, паведаміла прэс-служба ДШВ.
«У ходзе аперацыі былі знішчаны варожыя агнявыя збудаванні, жывая сіла, месцы захоўвання боепрыпасаў акупантаў», — гаворыцца ў паведамленні.
Адзначаецца, што дзякуючы прафесійным дзеянням разведчыкаў сарваны планы расійскіх войскаў па далейшым наступе. «Гэта дазволіла адкрыць плацдарм для тактычнага прасоўвання дружалюбных падраздзяленняў», — заявілі вайскоўцы.
* * *
Расійскія войскі ў ноч на 2 сакавіка масіравана атакавалі дронамі Крывы Рог. Пад удар трапіла прадпрыемства, пасля чаго адбыліся некалькі пажараў. Людзі не пацярпелі.
У ноч з 1 на 2 сакавіка расійскі Наварасійск падвергся атакам невядомых дронаў. Пасля серыі выбухаў у раёне порта ўзнік пажар, загарэўся нафтавы тэрмінал.
* * *
Прэзідэнт Украіны Уладзімір Зяленскі ў сваім звароце заявіў, што Украіна прайшла самую складаную зіму за ўсе гады вайны, аднак расіяне рыхтуюць новыя атакі па інфраструктуры.
«Сёння дзень, калі кожны з нас можа цалкам справядліва сказаць: мы прайшлі гэтую зіму, самую складаную за ўсе гады вайны. Расіяне хацелі ператварыць гэтую зіму ў знішчэнне Украіны і ўкраінцаў. Але Украіна не зламалася. Мы захавалі нашу энергетычную сістэму», — сказаў прэзідэнт Украіны.
Зяленскі адзначыў, што «расіяне не збіраюцца спыняцца з ударамі». «Яны рыхтуюць новыя атакі па інфраструктуры. Разведка дае адпаведную інфармацыю. Таму кожны, чыя служба — абараняць Украіну ад удараў, павінен быць гэтак жа засяроджаны вясной цяпер, як і зімой. На кожную пагрозу трэба рэагаваць і збіваць расійскія мэты, максімум з магчымага», — сказаў ён.
* * *
* * *
Намеснік кіраўніка Офіса прэзідэнта Украіны Павел Паліса заявіў у інтэрв’ю для «Радыё Свабода», што Расіі спатрэбіцца паўтара года, каб захапіць увесь Данбас. Аднак гэта будзе магчыма толькі цаной страты ўсёй групоўкі арміі РФ, якая цяпер знаходзіцца на акупаваных тэрыторыях Украіны.
Ён адзначыў, што за 2025 год расіяне захапілі менш за 1% ад агульнай тэрыторыі Украіны, а цана за гэта была — больш за 450 тысяч расійскіх салдат. Цяпер пад кантролем Сіл абароны Украіны знаходзіцца прыкладна 6 тысяч квадратных кіламетраў Данецкай вобласці. З улікам цяперашняй дынамікі, Расіі для акупацыі спатрэбіцца яшчэ час і толькі пры ўмове вельмі вялікіх страт.
«Улічваючы цяперашнюю дынаміку, ім спатрэбіцца арыентыровачна паўтара года для гэтага. І рэсурс, які роўны сённяшняй групоўцы РФ на тэрыторыі Украіны. Ім будзе вельмі цяжка гэта зрабіць. І гэта будзе зусім не так хутка, як яны хочуць», — рэзюмаваў Паліса.
* * *
Вялікабрытанія плануе прыцягнуць экспертаў з Украіны для таго, каб знішчаць іранскія беспілотнікі над краінамі Персідскай затокі, заявіў прэм’ер-міністр Кір Стармер.
Ён адзначыў, што Брытанія не далучаецца да ўдараў ЗША і Ізраіля па Іране. Але брытанцы будуць аказваць дапамогу партнёрам у адбіцці іранскіх атак.
«Мы не далучаемся да гэтых удараў, але працягнем нашы абарончыя дзеянні ў рэгіёне. А таксама прыцягнем экспертаў з Украіны разам з нашымі ўласнымі экспертамі, каб дапамагчы партнёрам з Персідскай затокі збіваць іранскія дроны, якія атакуюць іх», — адзначыў ён.
Стармер дадаў, што Брытанія памятае «памылкі Ірака», таму не будзе атакаваць Іран. Але паколькі Іран праводзіць тактыку «выпаленай зямлі», то калектыўная самаабарона саюзнікаў падтрымліваецца.
* * *
Кіраўнік МЗС Украіны Андрэй Сібіга у X (Twitter)заявіў пра імклівае падзенне ўплыву Расіі ў свеце пасля краху рэжымаў былога прэзідэнта Сірыі Башара аль-Асада, экс-прэзідэнта Венесуэлы Нікаласа Мадура і вярхоўнага лідара Ірана Алі Хаменеі.
Ён падкрэсліў, што расійскі дыктатар Уладзімір Пуцін аказаўся ненадзейным саюзнікам, які не здолеў дапамагчы сваім найбліжэйшым партнёрам.
Сібіга заўважыў, што за крыху больш чым год расійскі дыктатар страціў трох ключавых паплечнікаў — Асада, Мадура і Хаменеі. Пры гэтым Масква не аказала дзейнай дапамогі ніводнаму з іх у крытычны момант.
На думку міністра, гэтая дынаміка паказвае на важныя факты. Па-першае, Расія не з’яўляецца надзейным саюзнікам нават для тых рэжымаў, якія цалкам ад яе залежаць. Па-другое, пакуль РФ загразла ў «бессэнсоўнай вайне» супраць Украіны, якую яна ніколі не выйграе, яе глабальны ўплыў драматычна скарачаецца.
Міністр падкрэсліў, што працэс звяржэння дыктатараў з’яўляецца «эфектам даміно», які ўрэшце прывядзе да краху самога Пуціна.
«Падзенне Пуціна аднойчы з’яўляецца непазбежным. Разам мы павінны прыкласці ўсе намаганні, каб наблізіць гэты радасны дзень і забяспечыць адказнасць за ўсе расійскія злачынствы. Справядлівасць непазбежная», — заявіў Сібіга.