Замежныя СМІ пра Беларусь: 14–22сакавіка
Акрамя вучэнняў сіл СПА, у пятніцу побач з Польшчай былі праведзены манеўры сухапутных войскаў. Па словах Міністэрства абароны Беларусі, яны былі планавымі, і ў іх рамках бранятанкавыя войскі, якія належаць да падраздзяленняў Заходняга аператыўнага камандавання беларускага войска, адпрацоўвалі вядзенне агню.
Відавочна, што ініцыятыва іх правядзення зыходзіла ад Расіі. Гэта частка кампаніі ціску, якую Крэмль вядзе ў адносінах да Украіны. Лукашэнка паводзіў сябе як адданы саюзнік Расіі, і паказаў, што, нягледзячы на заявы пра прызнанне тэрытарыяльнай цэласнасці Украіны, гатовы рухацца ў кірунку, паказаным Крамлём.
«Gazeta Wyborcza» (Польшча)
Больш за іншых, верагодна, занерваваўся лідар Беларусі Аляксандр Лукашэнка. Па словах экспертаў, у палітычных кругах паўсталі асцярогі, што ўсёдазволенасць Пуціна распаўсюдзіцца і на Мінск. Чыннік у настроях, якія паўсталі ў нашым грамадстве: вельмі шмат хто, уключаючы службоўцаў, жадае атрымаць грамадзянства РФ. Неадназначныя настроі і ў вайскоўцаў. Надоечы Лукашэнка абрынуўся з крытыкай на аднаго з расійскіх губернатараў, які гасціў у Мінску, чаго раней сабе не дазваляў. Яму не спадабалася, як расійскія СМІ асвятляюць ваеннае супрацоўніцтва з Мінскам. Але ўсё ж супраць Пуціна Лукашэнка ў адкрытую не пойдзе, і яму давядзецца падтрымаць рэферэндум у Крыме.
«Сегодня» (Украіна)
Паколькі Украіна загразла ў глыбокім дзяржаўным крызісе, відавочна, надоўга, Еўрасаюзу ёсць сэнс прыцягнуць на свой бок «апошняга дыктатара Еўропы». Украіна, у якасці моста ў Расію, прагніла. І замест таго, каб замяніць газ з Расіі на арабскія пастаўкі, значна танней укласці сродкі ў «беларускі калідор». Тым больш, што ЕС (з падачы Германіі) не збіраецца змяншаць таваразварот з Расіяй. У сваю чаргу, Лукашэнка з задавальненнем будзе патрабаваць ад Еўропы даць грошай і на «дэмакратызацыю» Беларусі. Тым больш, што наступнай у чарзе на рассячэнне, пасля Грузіі і Украіны, варта лічыць менавіта Беларусь. У Крамлі не забыліся, што Лукашэнка сябраваў з Саакашвілі і замест прызнання незалежнасці Паўднёвай Асеціі і Абхазіі атрымаў шматмільярдныя крэдыты Захаду.
«24.UA» (Украіна)
Крымскія падзеі, найверагодней, прывядуць да імклівага распаду самой структуры СНД — для Украіны пасля 16 сакавіка заставацца ў гэтым аб'яднанні няма сэнсу, а яе магчымы выхад па чыста геаграфічных чынніках паставіць падобнае ж пытанне пра мэтазгоднасць далейшага сяброўства перад Малдовай. З еўрапейскіх удзельнікаў застаецца толькі Беларусь, але калі ў Крамлі разлічваюць, што А. Лукашэнка будзе жыць і ўчэпіста ўтрымліваць краіну ў сваіх руках яшчэ 30–40 гадоў, падобна, там «будуюць планы на пяску». Пра палітычны курс «пасля Бацькі» краіны з 30% каталіцкага насельніцтва, дзе выспявае апазіцыя прамаскоўскаму рэжыму Расіі, патрэбна б задумацца ўжо цяпер. Калі з СНД у будучыні выпадзе і Мінск, Садружнасць канчаткова страціць жыццяздольнасць.
«AVA» (Малдова)