Зоркі ў акопах. Артысты, што памянялі шоу-бізнес на службу ва УСУ

Акцёры, музыкі, рэжысёры, танцоры — многія зоркі ўкраінскага (і не толькі) шоу-бізнесу з пачатку поўнамаштабнага ўварвання Расіі ва Украіну сталі са зброяй у шэрагі Узброеных сіл Украіны, Нацгвардыі, тэрабароны, каб бараніць зямлю Украіны і жыцці сваіх суграмадзян.

Да Дня Незалежнасці Украіны РБК-Украіна распавядае, хто менавіта з селебрыціс прамяняў вялікую сцэну на фронт і ў акопах абараняе краіну ад агрэсара.

Макс Барскіх

Музыкант уступіў у шэрагі УСУ і прайшоў навучанне яшчэ ў пачатку красавіка.

Цяпер артыст вярнуўся да канцэртнай дзейнасці, збірае сродкі для ўкраінцаў па ўсім свеце.

Песня «Буде Вясна» стала яшчэ адным гімнам вайны за незалежнасць.

Андрэй Хлыўнюк, «Бумбокс»

Лідар гурта «Бумбокс», 42-гадовы Андрэй Хлыўнюк з першых дзён вайны служыць у Кіеве ў складзе асобнага падраздзялення сталічнага ўпраўлення патрульнай паліцыі.

Пасля таго як у Кіеве перад Сафійскім саборам музыка са зброяй у руках выканаў а капэла «Ой, у лузі червона каліна», яе пачалі спяваць, перапяваць і інтэрпрэтаваць ледзь не на ўсіх мовах.

А яшчэ музыкант атрымаў асколачнае раненне ў твар у сакавіку. Зрэшты, ён хутка аднавіўся і вярнуўся да службы.

Алег Сянцоў

Вядомы ўкраінскі рэжысёр і былы палітвязень, 46-гадовы Алег Сянцоў яшчэ ў першыя дні поўнамаштабнай вайны ўступіў у шэрагі тэрытарыяльнай абароны.

Неўзабаве ён далучыўся да атрада спецназа. Апошняя лакацыя Сянцова — адна з гарачых кропак, дзе ідуць цяжкія баі. Гэта Бахмут Данецкай вобласці.

А яшчэ рэжысёр падчас вайны паспеў ажаніцца з юрысткай Веранікай Вельч.

Сашко Палажынскі, «Тартак»

Былы лідар украінскага гурта «Тартак» ужо больш за тры месяцы ў акопах. 50-гадовы музыка распавёў, што яму з пабрацімамі давялося нават пабываць у паўакружэнні.

«Быў на фронце. Нават не на нулі — а яшчэ крыху далей. Фактычна ў паўакружэнні... Гэтым разам па мне валілі мэтанакіравана. З розных відаў цяжкага ўзбраення. Кругласутачна... І прылятала. Шмат. Адзін раз так, што прыйшлося потым смяротна знявечаныя целы двух маіх новых сяброў грузіць у эвакуацыйнае аўто», — пісаў пра ваенныя будні музыка.

Саша праходзіць службу ў 47-м асобным батальёне, адным з заснавальнікаў якога з'яўляецца ваенны, блогер і пісьменнік Валерый Маркус.

На фронце музыкант працягвае творчую дзейнасць, запісваючы песні на тэлефон.

Алег «Фагот» Міхайлюта, «Танок на майдані Конго»

Удзельнік гурта ТНМК 48-гадовы Алег «Фагот» Міхайлюта ўступіў у сілы тэрытарыяльнай абароны УСУ з першых дзён вайны.

Служыць пайшлі і іншыя ўдзельнікі гурта: бас-гітарыст Канстанцін Жуйкоў — у Нацгвардыю, гітарыст Яраслаў Вяроўкін — ва УСУ.

Цяпер у гурта адпачынак, падчас якога музыкі збіраюць сродкі на дабрачынных канцэртах. Месяц таму ТНМК прэзентавалі трэк «Энергодар — гэта Украіна!»

Тарас Таполя

Лідар гурта «Антыцелы» разам з іншымі ўдзельнікамі пайшоў служыць парамедыкам у 130-м батальёне тэрытарыяльнай абароны Кіева. Першыя месяцы вайны ён знаходзіўся ў Харкаўскай вобласці, дзе аказваў параненым байцам першую дапамогу і вывозіў іх для далейшага лячэння.

Цяпер 35-гадовы Тарас Таполя знаходзіцца ў Кіеве, адкуль працягвае натхняць украінцаў сваімі пастамі ў сацсетках. А таксама працягвае тварыць.

Yarmak

30-гадовы рэпер Аляксандр Ярмак ужо 24-лютага быў у ваенкамаце. Спачатку ён быў добраахвотнікам, а пасля афіцыйна трапіў у шэрагі Узброеных сіл Украіны.

Музыка, нягледзячы на жыццё ў акопах, працягвае пісаць. У прыватнасці, ён выпусціў трэк «Дзіка поле», які стаў сапраўдным хітом сярод вайскоўцаў.

Ахтэм Сеітаблаеў

З пачатку поўнамаштабнай вайны ўкраінскі 49-гадовы акцёр і кінарэжысёр Ахтэм Сеітаблаеў пайшоў у шэрагі тэрабароны.

Цікава, што ў 2020 годзе выйшаў яго серыял «Добраахвотнік», а ў 2022-м і сам пастаноўшчык стаў добраахвотнікам — прэс-афіцэрам 206-га батальёна ТРА Кіева.

Дзмітрый Дыкусар

Знакаміты 36-гадовы танцор і харэограф ужо праз тры дні пасля пачатку вайны ва Украіне папоўніў шэрагі ўкраінскай арміі.