Музыку Андрэя Макарэвіча ў Расіі зрабілі «замежным агентам»

Мінюст Расіі папоўніў адразу два рэестры «замежных агентаў» — фізічных асоб і СМІ, якія выконваюць функцыі замежнага агента. У першы трапіў знакаміты музыка, лідар культавага гурта «Машына часу» Андрэй Макарэвіч.


Кампанію Макарэвічу ў спісе фізічных асоб — «замежных агентаў» склалі пяць чалавек: украінскі журналіст Дзмітрый Гардон, тэлежурналістка Кацярына Гардзеева, паплечнік Аляксея Навальнага Іван Жданаў, бізнесмэн і дабрачынец Барыс Зімін, і екацярынбургскі палітолаг Фёдар Крашэнінікаў, піша руская служба ВВС.

Мінюст усіх іх звязаў з Украінай, сцвярджаючы тым самым, што гэта крыніца фінансавай або «арганізацыйна-метадычнай» дапамогі (так паказана ў законе). У якасці другой неабходнай падставы для ўключэння ў рэестр паказана «ажыццяўленне палітычнай дзейнасці».


У спіс СМІ — «замежных агентаў» дададзеныя таксама шэсць чалавек: актывіст Кірыл Фёдараў, галоўны рэдактар выдання «Новая газета. Еўропа» Кірыл Мартынаў, журналіст Сяргей Лойка, публіцыст Сяргей Мядзведзеў, былая маскоўская муніцыпальная дэпутатка Юлія Галяміна, а таксама гумарыст і папулярны ў мінулым тэлевядучы Міхаіл Шац. Былую жонку Шаца Таццяну Лазараву, якая выступала з ім дуэтам у сатырычных шоу, расійскі Мінюст уключыў у спіс фізічных асоб — «замежных агентаў» 22 ліпеня гэтага года. Прычыны пры абнаўленні гэтага рэестра міністэрства не паказвае.

Акрамя таго, у рэестр патрапіла ТАА «Навіны» — паводле дадзеных сістэмы СПАРК, так называецца юрыдычная асоба Краснаярскай тэлекампаніі ТВК.

«Зразумела, гэта павінна было адбыцца, — сказаў у эфіры «Дажджу» (таксама прызнаны СМІ — «замежным агентам») Макарэвіч. — Гэта ўжо такое ўмоўнае словазлучэнне, што ніякага першапачатковага сэнсу [не засталося]. Гэтыя людзі не “агенты”, і яны не “замежныя”. Гэта проста тыя, хто ўладзе не любы і не даспадобы. Гэта такое таўро. Можна зорку шасціканцовую жоўтую, можна вось гэта — сутнасці гэта не мяняе».

«Барыс Дзмітрыевіч, Андрэй Вадзімавіч, Фёдар Генадзевіч, Дзмітрый Ільіч, Кацярына Уладзіміраўна, для мяне вялікі гонар быць з вамі ў адным спісе», — напісаў Жданаў.




Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: