ААН выпусціла даклад аб ваенных злачынствах Расіі ва Украіне

Міжнародная камісія рэкамендуе расследаваць ваенныя злачынствы РФ на нацыянальным і міжнародным узроўнях.

Згодна з дакладам незалежнай міжнароднай камісіі па расследаванні парушэнняў ва Украіне пры СПЧ ААН, Расія здзейсніла мноства ваенных злачынстваў.

«Наступствы гэтых парушэнняў для цывільнага насельніцтва Украіны велізарныя. Гібель людзей вылічаецца тысячамі ахвяр. Разбурэнне інфраструктуры жудаснае», — паведаміў старшыня камісіі Эрык Мёсе.

Камісія выявіла сведчанні такіх злачынстваў, як наўмысныя забойствы, напады на цывільных асоб, незаконнае пазбаўленне волі, катаванні, згвалтаванні, а таксама гвалтоўныя перамяшчэнні і дэпартацыя дзяцей.

Таксама было ўстаноўлена, што атакі расійскіх вайскоўцаў па энергетычнай структуры Украіны могуць прыраўноўвацца да злачынстваў супраць чалавечнасці.

У рэзюмэ расследавання незалежная міжнародная камісія адзначыла: узброеныя сілы РФ здзяйснялі напады з ужываннем зброі выбуховага дзеяння ў населеных раёнах, відавочна грэбуючы шкодай і пакутамі, якія былі нанесены цывільнаму насельніцтву.

Задакументаныя выпадкі невыбіральных і несуразмерных нападаў, а таксама выпадкі непрыняцця мер засцярогі ў парушэнне міжнароднага гуманітарнага права.

Акрамя таго, камісія ўстанавіла, што серыі нападаў расійскіх узброеных сіл, пачынаючы з 10 кастрычніка 2022 года, на энергетычную інфраструктуру Украіны і прымяненне катаванняў расійскімі ўладамі могуць быць прыроўнены да злачынстваў супраць чалавечнасці.

Камісія рэкамендуе правесці далейшыя расследаванні, выявіць усе парушэнні і злачынствы і прыцягнуць вінаватых да адказнасці як на нацыянальным, так і на міжнародным узроўні.

Камісія заклікае да ўкаранення ўсёабдымнага падыходу да адказнасці, які ўключае як крымінальную адказнасць, так і права ахвяр на ўсталяванне ісціны, рэпарацыі і непаўтаральнасць трагедыі.

Паводле www.ohchr.org; «Настоящее время»