Беларускага добраахвотніка Эдуарда Лобава пахаваюць у Варшаве. Аб'яўлены збор сродкаў

Беларускага добраахвотніка Эдуарда Лобава, які загінуў 26 сьнежня пад Вуглядарам, пахаваюць у Варшаве. Дата разьвітаньня яшчэ не вядомая.

У Варшаве цяпер жыве маці Эдуарда Марына Лобава, паведаміў «Св*бодзе» паплечнік Эдуарда Аляксандар Малчанаў.

Як стала вядома, спачатку цела Эдуарда адвязуць у горад Белая Царква побач з Кіевам, дзе знаходзіцца ягоная вайсковая частка. У гэты час будуць рыхтаваць дакумэнты, каб транспартаваць цела ў Польшчу, і атрымаць месца на могілках у Варшаве.

Абвешчаны збор сродкаў на пахаваньне. Грошы можна перавесьці на рахунак маці Эдуарда. Рэквізыты:

Эдуард служыў у 72-й асобнай мэханізаванай брыгадзе. Удзельнічаў у вызваленьні Кіеўскай вобласьці і Чарнобыля ад расейскіх акупантаў. Апошнія некалькі месяцаў быў пад Вуглядарам.

Эдуард Лобаў нарадзіўся ў 1988 годзе. Да дзейнасьці «Маладога Фронту» далучыўся пасьля вяртаньня з войска. Службу праходзіў у 103-й асобнай гвардзейскай мабільнай брыгадзе ў Віцебску.

У 2011 годзе Эдуард Лобаў быў асуджаны на 4 гады пазбаўленьня волі паводле артыкула «Хуліганства» разам зь лідэрам «Маладога Фронту» Зьмітром Дашкевічам. Выйшаў на волю 18 сьнежня 2014 году.

Экс-палітвязня Эдуарда Лобава шукаюць міліцыя і АБЭП

У 2015 годзе Лобаў таемна пераехаў ва Ўкраіну і далучыўся да добраахвотнікаў, якія змагаліся супраць расейскай агрэсіі. Тады ён уваходзіў у склад добраахвотніцкага батальёна «Правага сэктару», які быў разьмешчаны пад Марыюпалем. У 2015 годзе ён наступным чынам тлумачыў свой удзел у баявых дзеяньнях: «Я не за свабоду Ўкраіны ваяваць ехаў, а за свабоду Беларусі. Бо калі Арда не атрымае па зубах тут, на Данбасе, яна пойдзе далей — і Беларусь, я абсалютна перакананы, будзе праглынутая, як і Крым, за пару сутак».

Нават пасля ад’езду Эдуарда з краіны яго не пакінулі ў спакоі лукашэнкаўскія сілавікі. У 2016 годзе ў мінскай кватэры былога палітзняволенага адбыўся ператрус.

«Я выходзіла выгульваць сабак, каля ліфта мяне чакалі тры высокія мужчыны ў цывільным. Яны прад’явілі пастанову на ператрус, падпісаную пракурорам у сувязі з тым, што супраць Эдзіка распачатая крымінальная справа за ўдзел у ваенных дзеяннях ва Украіне, — распавядала тады маці добраахвотніка. —

Мяне прымусілі вярнуцца ў кватэру. Зайшлі самі і прывялі панятых. Некалькі супрацоўнікаў засталіся ахоўваць уваход у кватэру.

Падчас ператрусу забралі два ноўтбукі — мой і майго мужа. Таксама працэсар (сістэмны блок) ад камп'ютара, некалькі флэшак і кнігу пра «Малады Фронт» і пазбаўлены рэгістрацыі праваабарончы цэнтар "В*сна"».

Тады ж у маці Эдуарда сілавікі сілай з кішэні забралі мабільны тэлефон і парвалі куртку.