У гомельскіх школах збіраюць грошы на «дзяцей Данбаса»
Правядзенне акцыі, як сцвярджаецца, рэалізуецца праз прафсаюзныя структуры і аддзелы адукацыі. Гэта можа сведчыць пра прымусовы і цэнтралізаваны характар ініцыятывы.
У гомельскіх школах распаўсюджваюць дакумент ад абласных афіцыйных прафсаюзнікаў з заклікам «дапамагчы дзецям Данбаса».
У паперы ўказана, што зборам сродкаў займаецца фонд спартоўца-паралімпійца Аляксея Талая. У суправаджальным лісце гаворыцца пра тое, што акцыя «Дапамажы дзецям Данбаса пайсці ў школу» ўзгоднена і падтрымана Лукашэнкам. Правядзенне акцыі рэалізуецца праз прафсаюзныя структуры і раённыя аддзелы адукацыі, што сведчыць пра прымусовы і цэнтралізаваны характар талаеўскай ініцыятывы, піша «Гомель Штодзень».
Аляксей Талай — інвалід-вазочнік, якога часта ў афіцыйнай прэсе параўноўваюць з вядомым хрысціянскім прапаведнікам Нікам Вуйчычам. Аднак, у адрозненне ад знакамітага папярэдніка, Аляксей Талай па факце займаецца прапагандай вайны, адкрыта падтрымлівае незаконныя тэрарыстычныя фарміраванні ДНР-ЛНР, часта наведвае акупаваныя ўкраінскія тэрыторыі, за што ўнесены ў базу «Міратворца» (сайт, на якім вядзецца ўлік асоб, якія здзяйсняюць злачынствы супраць нацыянальнай бяспекі Украіны).
