433-ці дзень вайны: Выбухі ў акупаваным Мелітопалі, у Расіі шукаюць «мужчыну ў чорным»

У акупаваным Мелітопалі Запарожскай вобласці блізу 6:45 гадзін 2 траўня прагучаў адзіночны выбух. Адзначаецца, што па характары гуку падобна на падрыў чарговага калабаранта.

«Па вуліцы Інтэркультурнай прамчалася паліцыя з мігалкамі і сірэнамі. Па горадзе таксама імчацца хуткія», — пішуць мясцовыя паблікі.

СМІ высвятляюць падрабязнасці.

Горад Мелітопаль быў акупаваны войскамі РФ яшчэ вясной 2022 года, цяпер там часта раздаюцца выбухі ў месцах збору захопнікаў і калабарантаў.

432-гі дзень на вайне. Папа Францішак рыхтуе мір, а расійцы ракетамі абстралялі жылыя дамы

Расійцы нібыта аднавілі рух цягнікоў на перагоне Унеча — Рассуха ў Бранскай вобласці, дзе напярэдадні сышоў з рэек састаў з 60 вагонамі, гружаны нафтапрадуктамі і піламатэрыяламі.

РФ задзейнічала 300 чыгуначнікаў і тры аднаўленчыя цягнікі. Усяго нібыта было нанова выкладзена каля 100 метраў чыгуначнага палатна.

Асобна губернатары Гомельскай і Бранскай абласцей абмеркавалі інцыдэнт. Адзначаецца, што беларуская лакаматыўная брыгада не пацярпела.

Паведамляецца, што ў выніку выбуху з рэек сышлі двухсекцыйны цеплавоз (згарэў), пяць вагонаў з дызелем і піламатэрыяламі. Выцекла 12 тон дызельнага паліва.

1 траўня ў адным з раёнаў Бранскай вобласці РФ на чыгунцы спрацавала бомба, і з рэек сышоў лакаматыў грузавога цягніка. Сцвярджалася, што ў выніку выбуху ніхто не пацярпеў. У выніку падрыву цягніка былі парушаны чыгуначныя зносіны паміж расійскімі населенымі пунктамі і Гомелем.

У Расіі нібыта ўстанавілі, што дыверсію зладзіў «мужчына ў чорным». Яму прыкладна 40 гадоў, рост каля 170 сантыметраў. У яго быў чорны заплечнік, мужчына перасоўваўся роварам.

Міністэрства абароны РФ актыўна распавядае аб выніках ракетных удараў па Украіне. Такі парадак дня павінен знізіць узровень турботы ў краіне-агрэсары праз контрнаступленне ўкраінскага войска. Такое меркаванне выказалі аналітыкі амерыканскага Інстытута вывучэння вайны (ISW).

Эксперты прааналізавалі паведамленні пра ўдар у ноч на 1 траўня. Так, у Генштабе УСУ паведамілі аб узлёце дзевяці стратэгічных бамбавікоў Ту-95 і двух Ту-160 у Мурманскай вобласці і блізу Каспійскага мора. Яны выпусцілі 18 крылатых ракет Х-101/555, з якіх 15 збіла сістэма СПА.

У сваю чаргу Мінабароны РФ заявіла, што ўдарылі па ўкраінскіх ваенна-прамысловых аб'ектах і паспяхова сарвалі вытворчасць. Пры гэтым расійскія «ваенкары» сцвярджалі, што ракеты нібыта знішчылі ўкраінскія сістэмы СПА і транспартны вузел у Паўлаградзе.

Аналітыкі паказалі, што, паводле геалакацыйных кадраў з Паўлаграда, адна з расійскіх ракет трапіла ў Паўлаградскі хімічны завод, у выніку чаго адбыўся магутны выбух.

«Нядаўна Мінабароны Расіі змяніла сваю рыторыку і шырока інфармуе аб сваіх ударных кампаніях, верагодна, спрабуючы паказаць праактыўны падыход на фоне турботы, якая павялічваецца ў расійскай інфармацыйнай прасторы ў сувязі з украінскім контрнаступленнем», — падсумавалі эксперты ISW.

За мінулыя суткі вайскоўцы Украіны адбілі больш за 40 нападаў расійцаў.

Як паведамляе Генштаб УСУ, на Северскім і Слабажанскім напрамках акупанты нанеслі авіяўдар кіраванымі авіябомбамі па населеным пункце ЛізуноўкаЧарнігаўскай вобласці. У выніку ўдару загінула дзіця. Расійцы абстралялі населеныя пункты Лявонаўка, Чырвоны Хутар, Карпавічы, Грымяч і Ноўгарад-Северскі Чарнігаўскай вобласці; Сярэдзіна-Буда, Шостка, Хадына, Іскрыскаўшчына, Волфіна і Садкі Сумскай вобласці, а таксама Уды, Гоптаўка, Стрэлка і Дамашняе Харкаўскай вобласці.

На Купянскім кірунку расійцы білі з артылерыі і мінамётаў па населеных пунктах Фігалоўка, Заходняе, Ліман Першы, Кіслаўка, Купянск, Крухмальнае і Бераставое Харкаўскай вобласці.

На Ліманскім кірунку захопнікі вялі беспаспяховы наступ у раёнах Навасёлаўскага і Белагораўкі. Расійцы ўдарылі з авіяцыі па Белагораўцы, Грыгораўцы і Спорным.

На Бахмуцкім кірунку РФ спрабуе весці наступ, а таксама працягваюцца баі непасрэдна ў Бахмуце. Пры гэтым расійцы спрабавалі наступаць у кірунку населенага пункта Прадцечына і нанеслі авіяўдар па Бахмуце і Белай Гары. Ад абстрэлаў пацярпелі Васюкоўка, Арэхава-Васільеўка, Навамаркава, Грыгораўка, Бахмут, Хромава, Часаў Яр, Іванаўскае, Канстанцінаўка, Дыліеўка і Южнае Данецкай вобласці.

На Аўдзееўскім кірунку расійцы вялі наступ у раёнах населеных пунктаў Севернае і Першамайскае, поспеху не мелі. Захопнікі нанеслі авіяўдар па Аўдзееўцы і абстралялі Ластаўчына, Севернае, Першамайскае і Карлаўку Данецкай вобласці.

На Мар'інскім кірунку акупанты працягваюць атакаваць украінскія пазіцыі і весці баі непасрэдна за Мар'інку. Пад варожы агонь трапіла Георгіеўка ў Данецкай вобласці.

На Шахцёрскім кірунку расійцы абстралялі Вугледар, Богаяўленку і Новаўкраінку Данецкай вобласці.

Паводле ўкраінскіх медыя