921-шы дзень вайны. Прынамсі 41 пацярпелы ў выніку расійскага ўдару па Харкаве

«Супернік цэліў выключна па грамадзянскай інфраструктуры». Распавядаем пра галоўныя падзеі чарговага дня поўнамаштабнай вайны Расіі супраць Украіны. 

Акупанты нанеслі каля 10 удараў па Харкаве. Прынамсі 41 пацярпелы

Пра новы абстрэл горада паведаміў кіраўнік Харкаўскай АДА Алег Сінягубаў.

«Сярод пашкоджанай інфраструктуры з прычыны варожых прылётаў – гандлёвы цэнтр, аб'ект спартовай інфраструктуры, жылыя дамы», — напісаў ён. 

Колькасць пацярпелых у Харкаве вырасла да 41, у тым ліку 5 дзяцей.

«Сярод пашкоджаных — аддзяленне «Новай пошты», крамы, спартыўны комплекс, гандлёвы цэнтр, аўтамабілі. Супернік цэліў выключна па грамадзянскай інфраструктуры», — удакладніў Алег Сінягубаў. 

Паводле папярэдніх дадзеных, па Харкаве ўдарылі «Іскандэрамі».

Уладзімір Зяленскі: «Расія зноў тэрарызуе Харкаў. Удары па грамадзянскай інфраструктуры, проста ў горадзе.

На дадзены момант больш за 30 параненых. Задзейнічаныя ўсе неабходныя сілы для правядзення выратавальнай аперацыі.

І трэба задзейнічаць усе неабходныя сілы свету, каб спыніць гэты тэрор. Для гэтага патрэбныя не надзвычайныя сілы, а дастатковая мужнасць лідэраў – мужнасць даць Украіне ўсё неабходнае для абароны».

3 чалавекі загінулі, 9 параненыя ў выніку расійскага абстрэлу Данецкай вобласці

Расійскія войскі абстралялі горад Курахава Данецкай вобласці з рэактыўных сістэм залпавага агню «Ураган»

Пра гэта паведаміў кіраўнік Данецкай аблдзяржадміністрацыі Вадзім Філашкін.

Расійскія войскі ўжылі «ўраганы», ударыўшы па прыватным сектары і шматпавярховым дамах у цэнтры горада, піша Hromadske.

На месцы працуюць прадстаўнікі ўлады, паліцыя, ратавальнікі. Дакладная колькасць ахвяр і маштабы разбурэнняў яшчэ ўстанаўліваюцца.

Над 16 рэгіёнамі Расіі — больш за паўтары сотні ўкраінскіх беспілотнікаў

Гэта найбуйнейшая атака з пачатку вайны. У Маскве з-за падзення абломкаў дрона адбыўся пажар на НПЗ, піша «Медуза».

Мінабароны РФ заявіла, што сродкі СПА за ноч у агульнай складанасці «знішчылі і перахапілі» 158 дронаў самалётнага тыпу над 15 рэгіёнамі. Па дадзеных ведамства, 46 беспілотнікаў збілі над Курскай вобласцю, 34 — над Бранскай, 28 — над Варонежскай, 14 — над Белгарадскай.

Расія пад наймагутнейшай атакай беспілотнікаў. Што вядома на гэты час

Сярод згаданых рэгіёнаў аказаліся таксама Тамбоўская, Смаленская, Арлоўская і Іванаўская вобласці. Да гэтага часу з пачатку поўнамаштабнай вайны аб атаках дронаў на гэтыя рэгіёны не паведамлялася. Таскама адзін дрон быў збіты на падлёце да Яраслаўля, паведамілі мясцовыя ўлады. У зводцы Мінабароны гэты рэгіён не згадваецца.

 Мэр Масквы Сяргей Сабянін заявіў, што над горадам былі збітыя два беспілотнікі — абодва ў раёне НПЗ у Капотні. У выніку падзення абломкаў аднаго з іх адбыўся пажар, Сабянін падкрэсліў, што загарэўся тэхнічны будынак, які стаіць асобна.

Праз атаку ўначы і раніцай прыпынялася праца маскоўскіх аэрапортаў Унукава, Дамадзедава і Жукоўскі. Як паведаміла Расавіяцыя, на вылет затрымалі 74 рэйсы, на запасныя аэрадромы пайшлі 43 самалёты.

У Цвярской вобласці ўлады зрабілі справаздачу аб пяці збітых беспілотніках у раёне горада Канакова, дзе знаходзіцца ДРЭС. Таксама пад атаку патрапіла Кашырская ДРЭС у Маскоўскай вобласці.

Аб пацярпелых ні ў адным з рэгіёнаў афіцыйна не паведамляецца. Украіна атаку не каментавала.