Лукашэнка знайшоў «гарматнае мяса» для верагоднага канфлікту з Украінай?
Беларускі дыктатар заявіў, што «недсцыплінаваных» грамадзян і чыноўнікаў трэба адпраўляць на ўкраінскую мяжу ў распараджэнне Сіл спецыяльных аперацый. Нібыта, для такіх «салдат» дастаткова тыдня падрыхтоўкі. У той жа час некаторыя ў ЕС лічаць, што Украіна перамагае ў вайне. Ідуць 1610-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
Агулам на працягу мінулых сутак ва Украіне зафіксавана 219 баявых сутыкненняў, паведамляе Генштаб УСУ ў ранішняй зводцы 22 ліпеня.
На Славянскім кірунку расійцы штурмавалі пазіцыі УСУ 27 разоў у раёнах Закітнга, Крывой Лукі, Рэзнікоўкі і ў бок Піскуноўкі, Мікалаеўкі, Малінаўкі, Арахаваткі і Рай-Аляксандраўкі.
На Канстанцінаўскім і Пакроўскім кірунках расіяне здзейснілі па 26 атак на кожным.
На Ліманскім кірунку армія РФ 15 разоў спрабавала уклініцца ў абарону УСУ, атакуючы ў раёнах Зарэчнага, Навасёлаўкі і ў бок Шыйкаўкі, Лімана, Ставак і Азёрнага.
На Паўднёва-Слабажанскім і Гуляйпольскім кірунках зафіксавана па 12 боесутыкненняў на кожным.
* * *
У ноч на 22 ліпеня Расія атакавала Украіну 1 балістычнай ракетай «Іскандэр-М», 3 кіраванымі авіяцыйнымі ракетамі Х-59/69 і 216 ударнымі БпЛА тыпу Shahed (у т. л. рэактыўнымі), «Гербера», «Італмас» і дронамі-імітатарамі тыпу «Пародыя». Супрацьпаветранай абаронай збіта/задушана 3 кіраваныя авіяцыйныя ракеты Х-59/69 і 204 БпЛА.
Раніцай 22 ліпеня расіяне атакавалі дом у вёсцы Чайкі пад Кіевам, у выніку пацярпелі 5 чалавек, уключаючы дзяцей.
У ноч на 22 ліпеня беспілотнікі атакавалі часова акупаваны Крым. Работу СПА чулі ў Феадосіі, Ялце і Алушце. У Алушце пад удар трапіла энергетычная інфраструктура. Па даных мясцовых жыхароў, там адключылася электрычнасць.
У расійскіх Краснадары і Нявіннамыску Стаўрапольскага краю ў выніку атакі беспілотнікаў у ноч на 22 ліпеня загарэліся буйныя лагістычныя цэнтры Wildberries.
Выбухі таксама гучалі ў расійскім Армавіры. Там, верагодна, атакавалі нафтабазу.
* * *
* * *
Прэзідэнт Украіны Уладзімір Зяленскі пасля 6 дзён мітынгаў абвясціў аб адстаўцы галоўнакамандуючага УСУ Аляксандра Сырскага і анансаваў прызначэнне на яго месца Міхаіла Драпатага.
«Факт — Аляксандр Сырскі забяспечыў поспехі Украіны ў абароне Кіева, у Харкаўскай наступальнай аперацыі, у Курскай аперацыі. Пройдзены значны шлях, абарона Украіны працягваецца, і неабходна дастойнае стаўленне да кожнага воіна. Я ўдзячны Аляксандру Сырскаму і кожнаму нашаму воіну за моцныя франтавыя пазіцыі Украіны. Я ўдзячны Міхаілу Драпатаму за менавіта такі погляд. Сёння з Аляксандрам Сырскім мы абмяркоўвалі далейшыя фарматы службы і правільную перадачу спраў», — паведаміў Зяленскі.
* * *
Амерыканскі вытворца ўпершыню пачне выпуск марскіх дронаў, распрацаваных і выпрабаваных у баі Украінай. Здзелку заключылі кампаніі ReconCraft з Портлэнду, якая вырабляе лодкі для спецназа, і ўкраінская Uforce, стваральнік дронаў Magura, піша The Wall Street Journal.
Мемарандум аб узаемаразуменні падпісалі на тым тыдні ва ўкраінскім пасольстве ў Вашынгтоне. Здзелку разглядаюць як «партнёрскае пагадненне», па якім абедзве кампаніі будуць надаваць матэрыялы, абсталяванне і работнікаў.
Па словах сузаснавальніка ReconCraft Джо Сілкоўскі, мэта — вырабляць сотні ці нават тысячы дронаў Magura штогод на магутнасцях у Арэгоне і Паўднёвай Караліне. Пентагон гатовы патраціць дзясяткі мільярдаў долараў на аўтаномныя сістэмы ў бліжэйшыя гады — вайна з Іранам, якая знішчыла запасы дарагіх амерыканскіх боепрыпасаў, паказала неабходнасць у больш таннай зброі.
Па словах гендырэктара Uforce Алега Рагінскага, дазвол Украіны вырабляць Magura ў ЗША з’яўляецца «абсалютна ключавым», паколькі дазволіць амерыканцам скарыстацца тактыкамі і канцэпцыямі, адточанымі за гады вайны ва Украіне.
Дроны-камікадзэ Magura ў значнай ступені прымусілі расійскія ваенныя караблі адысці з Чорнага мора, паражалі нафтавыя танкеры, масты, а некаторыя нават транспартавалі ракеты для збівання самалётаў і ўдараў па наземных мэтах.
* * *
Украіна ўжо атрымала галоўную перамогу ў вайне, паколькі Расіі не ўдалося рэалізаваць свой першапачатковы план уварвання, заявіў у інтэрв'ю Il Sole 24 Ore міністр абароны Італіі Гвіда Кразетта.
Ён нагадаў, што ў пачатку поўнамаштабнага ўварвання большасць экспертаў прагназавалі, што расійскія войскі захопяць Кіеў праз некалькі дзён, а ЗША нават падрыхтавалі самалёт для магчымай эвакуацыі прэзідэнта Украіны Уладзіміра Зяленскага.
Чатыры гады спачатку сітуацыя кардынальна змянілася. Па словах кіраўніка Мінабароны Італіі, Расія «загразла на лініі фронту», губляючы 30 тысяч ваенных у месяц. А Украіна не толькі захавала сваю дзяржаўнасць, але і змяніла падыходы да вядзення сучаснай вайны.
«Украіна ўсё яшчэ існуе; яна моцная і з кожным днём ускладняе вайну для Пуціна. З яе пункту гледжання, яна ўжо перамагла, таму што ніколі не збіралася ўварвацца ў Расію — яна толькі абараняецца», — дадаў міністр.
Кразетта перакананы, што як толькі Расія перастане абстрэльваць Украіну хаця б на 24-48 гадзін, вайна закончыцца. З пачатку ўварвання ў 2022 годзе такога не адбылося ні разу.
Заяву італьянскага міністра падтрымаў яго брытанскі калега Вес Стрытынг. Ён назваў вайну Расіі супраць Украіны «прыніжэннем для Пуціна».
* * *
Лукашэнка палохае сваіх грамадзян гвалтоўным пераводам з грамадзянскіх у ваенных. Выдуманы нават падставы для гэтага кроку, піша РБК-Украіна са спасылкай на заяву беларускага дыктатара «Пулу Первого» у Telegram.
Лукашэнка заявіў, што ёсць некалькі «праступкаў» для грамадзян Беларусі, за якія могуць адправіць на ваенную службу: гэта невыкананне сваіх абавязкаў і парушэнне працоўнай дысцыпліны падчас жніва. Прычым гэта тычыцца як звычайных работнікаў, так і чыноўнікаў усіх узроўняў.
Дыктатар паабяцаў адпраўляць сваіх грамадзян менавіта ў падраздзяленні, якія нясуць службу на мяжы з Украінай. «Перадайце маё даручэнне міністру абароны Віктару Хрэніну: усіх, хто не ўмее працаваць, — у армію і на паўднёвую мяжу. У лес. Там нашы хлопцы, Сілы спецыяльных аперацый, па маім загадзе размеркаваныя ўздоўж украінскай мяжы», — заявіў Лукашэнка.
Ён лічыць, што ўжо пасля тыдня падрыхтоўкі такіх людзей можна накіроўваць у ССА ў якасці звычайных салдат. «Тыдзень падрыхтоўкі – гранатамёт, кулямёт – і туды, у распараджэнне Сіл спецыяльных аперацый», — сказаў ён, і адзначыў, што Беларусь нібыта не плануе нападаць на суседнія дзяржавы.
«Гэта не значыць, што мы на кагосьці збіраемся нападаць. Мы ні на каго не нападаем, мы забяспечваем сваю бяспеку», — заявіў Лукашэнка.