Расстрэл мабілізаваных пад Белгарадам у Расіі. Асноўнае
Не даехалі да фронту. На вайсковым палігоне ў Белгародскай вобласці 15 кастрычніка адбыўся масавы расстрэл. Мінабароны РФ сцвярджае, што загінулі 15 чалавек і 11 атрымалі раненні, выданне Sota са спасылкай на відавочцаў здарэння піша аб 22 загінулых і 16 параненых.
Мінабароны Расіі заявіла, што ў суботу падчас заняткаў па агнявой падрыхтоўцы з удзелам добраахвотнікаў двое грамадзян «адной з краін СНД» адкрылі агонь па асабовым складзе. Тыя, хто стралялі, паводле версіі Мінабароны Расіі, былі забітыя. Крыніца Sota сцвярджае, што тых, хто страляў, было трое і аднаму з іх нібыта ўдалося збегчы. Па неафіцыйных даных, забойства адбылося ў першай палове дня. Расійскае мінабароны аб'явіла аб ім толькі ўвечары.
Расійскія «патрыятычныя» тэлеграм-каналы пішуць, што стралкі, як мяркуецца, былі ўраджэнцамі Таджыкістана. Афіцыйна гэта не пацверджана. У верасні ўлады вырашылі надаваць расійскае грамадзянства ў спрошчаным парадку замежнікам, якія заключылі кантракт на службу ва ўзброеных сілах РФ.
Мінабароны Расіі ахарактарызавала тое, што адбылося, як тэракт. Следчы камітэт афіцыйна аб узбуджэнні справы не паведамляў (у адрозненне ад расследаванняў «новых злачынстваў» украінскіх вайскоўцаў). Паводле інфармацыі «Коммерсанта», ведамства ўзбудзіла справу па артыкуле «забойства»; артыкул аб тэракце «можа дадацца», піша газета.
Губернатар Белгарадскай вобласці Вячаслаў Гладкоў назваў тое, што здарылася, «страшнай падзеяй» і сказаў, што «загінулі і паранены многія ваеннаслужачыя». Ён падкрэсліў, што жыхароў Белгарадскай вобласці сярод ахвяр няма.
На палігоне Солаці знаходзяцца многія мабілізаваныя з Бранскай вобласці — і раней яны скардзіліся на праблемы. Са слоў суразмоўцы Sota, які прысутнічаў на стрэльбішчы падчас расстрэлу, вынікае, што жыхары Бранскай вобласці ёсць і сярод пацярпелых. У пачатку кастрычніка Sota пісала, што больш за сто мабілізаваных жыхароў Бранскай вобласці з палігона Солаці адмаўляюцца ехаць ва Украіну, нягледзячы на пагрозы з боку начальства; сцвярджалася, што іх хочуць адправіць у наступ на страчаны УС РФ у пачатку кастрычніка Ліман.
15 кастрычніка быў апублікаваны відэазварот да Уладзіміра Пуціна семярых жанчын з Фокіна Бранскай вобласці, сваякі якіх былі мабілізаваны і, паводле іх слоў, без падрыхтоўкі адпраўлены на перадавую — хаця яны «падпісваліся» не на гэта, а на абарону «сваёй Бранскай вобласці». У відэазвароце згадваюцца і афіцэры з вайсковай часткі ў Солаці, якія, як вынікае са слоў адной з жанчын, пагражаюць мабілізаванай крымінальнай адказнасцю за адмову «быць гарматным мясам».