Скандал ва Украіне. Затрыманы ваенкам, у якога знайшлі нерухомасць у Іспаніі на мільёны еўра

Пячэрскі раённы суд Кіева выбраў былому начальніку Адэскага абласнога тэрытарыяльнага цэнтра камплектавання і сацыяльнай падтрымкі Яўгену Барысаву меру стрымання ў выглядзе ўтрымання пад вартай да 22 верасня з магчымасцю ўнясення закладу сумай у 150 мільёнаў грыўняў. Пра гэта паведамляе «Суспільне».

Адзначаецца, што ў выпадку ўнясення закладу экс-ваенкаму будзе забаронена выязджаць за межы Адэсы, неабходна здаць дакументы, з'яўляцца па патрабаванні следчага і выконваць іншыя абавязацельствы.

Як паведамілі падчас судовага паседжання пракуроры, са снежня 2022 года па снежань 2023 года Барысаў, атрымаўшы медыцынскую даведку для лячэння, з'ехаў у Іспанію. Зрэшты, паводле іх слоў, падазраваны не лячыўся, а адпачываў. У гэты перыяд у былога ваенкама з'явілася нерухомая маёмасць, у прыватнасці, у Іспаніі, якая запісана на яго сваякоў. Таму бок абвінавачвання ў судзе прасіў строгую меру стрымання для Барысава — утрыманне пад вартай без права ўнясення закладу.

Затое адвакаты гэта адмаўлялі і назвалі абвінавачванне экс-ваенкама неабгрунтаваным. Абарона прасіла Пячэрскі суд адпусціць былога ваенкама Адэскага абласнога ТЦК на парукі, або абраць меру стрымання, якая не прадугледжвае арышт.

Сёння — Міжнародны антыкарупцыйны дзень. Як у Беларусі карупцыя стала сістэмнай?

Справа Барысава

Увесну 2023 года ў СМІ з'явілася інфармацыя, што сям'я адэскага ваенкама падчас поўнамаштабнага ўварвання набыла дарагую нерухомасць у Іспаніі. Кошт новага маёнтка складае больш за тры мільёны еўра, яго зарэгістравалі на маці Барысава. Акрамя таго, у жонкі ваенкама з'явілася офіснае памяшканне на адной з галоўных вуліц Марбельі, а таксама сям'я купіла новае аўто — Mercedes Gelendvagen. Даход сям'і такіх выдаткаў не пакрывае.

Следчыя Дзяржаўнага бюро расследаванняў высветлілі, што Барысаў прасіў падначаленых не прызываць пэўных асоб у войска за ўзнагароджанне. Тады ж яго адхілілі ад выканання службовых паўнамоцтваў. Ужо ў канцы чэрвеня Барысава звольнілі з пасады.

22 ліпеня работнікі ДжБР паведамілі аб падазрэнні былому начальніку Адэскага абласнога тэрытарыяльнага цэнтра камплектавання і сацыяльнай падтрымкі Барысаву. Адзначалася, што ён падазраецца ў незаконным узбагачэнні на сотні мільёнаў грыўняў і наўмысным ухіленні ад нясення службы.

Падчас дасудовага расследавання Бюро сабрала велізарны ўласны масіў доказнай базы. Аднак для паўнавартаснага і бесстаронняга расследавання вывучаліся і паведамленні СМІ. Таксама будуць даследаваны матэрыялы Нацыянальнага агенцтва па пытаннях прадухілення карупцыі, якое таксама выявіла прыкметы незаконнага ўзбагачэння ў былога адэскага ваенкама больш чым на 188 млн грн.

Барысава затрымалі 24 ліпеня. Ён спрабаваў схавацца ад следства, пры гэтым выкарыстаў элементы канспірацыі — мяняў нумары тэлефонаў, аўтамабіляў і месцазнаходжанне. Два дні працягваліся актыўныя пошукі і ў выніку комплексных аператыўна-следчых мерапрыемстваў мужчыну знайшлі і затрымалі ў Кіеве. Яму пагражае да 10 гадоў пазбаўлення волі.