Шольц: Украіна будзе адноўлена як будучы сябра ЕС
Канцлер Германіі Олаф Шольц заклікаў планаваць аднаўленне Украіны як будучага сябра Еўрасаюза.
Фота з тэлеграм-канала Уладзіміра Зяленскага
Пры аднаўленні Украіны неабходна браць пад увагу, што гэтая краіна ў будучыні павінна стаць сябрам Еўрапейскага Звязу. Гэтак заявіў канцлер Олаф Шольц на нямецка-ўкраінскім эканамічным форуме ў Берліне, піша «Нямецкая хваля».
Шольц запэўніў Кіеў, што ўкраінскі энергетычны сектар, які стаў ахвярай маштабных расійскіх нападаў, будзе адноўлены такім чынам, каб Украіна стала эфектыўным пастаўшчыком электрычнасці ў ЕС. Нямецкі канцлер падкрэсліў, што вайна, развязаная кіраўніком Расіі Уладзімірам Пуціным, згуртавала Германію і Украіну.
