У «Арэшніку» знайшлі беларускія кампаненты. Ці прыляціць дрон у «Інтэграл»?
Украіна даследавала рэшткі расійскага «Арэшніку», і адзначыла, што ідэнтыфікаваныя кампаненты выраблены выключна расійскімі і беларускімі прадпрыемствамі. Прычым падкрэсліваецца, што прадукцыя беларускіх заводаў «Транзістар» і «Інтэграл» сустракаецца ў ракетах РФ «рэгулярна». Украіна вызначыла мэты на тэрыторыі РБ? Ідуць 1606-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 276 баявых сутыкненняў, паведамляе Генштаб УСУ ў ранішняй зводцы 18 ліпеня.
На Пакроўскім кірунку абаронцы Украіны спынілі 43 атакі расіян у кірунках Навапаўлаўкі, Сафіеўкі, Тарэцкага, Біліцкага, Новага Данбаса, Белазёрскага, Шаўчэнкі, Грышына, Мірнага, Васільеўкі, Сяргееўкі, Удачнага і Маладзецкага.
На Гуляйпольскім кірунку расійцы 31 раз атакавалі ў кірунках Косіўцава, Верхняй Тэрсы, Цвятковага, Гіркага, Аленаканстанцінаўкі, Уздвіжаўкі і Чарыўнага.
На Славянскім кірунку армія РФ здзейсніла 23 штурмы ў раёнах Крывой Лукі, Закітнага і Рызнікаўкі, а таксама ў кірунку Рай-Аляксандраўкі.
На Ліманскім кірунку расійцы 21 раз атакавалі ў раёнах Лімана і Азёрнага, а таксама ў кірунках Навасёлаўкі, Дробышава і Ямпаля.
На Канстанцінаўскім кірунку зафіксавана 19 атак у раёнах Канстанцінаўкі, Іванаполля і Іллінаўкі, а таксама ў кірунках Малачаркі і Русіна Яра.
На Паўднёва-Слабажанскім кірунку ўкраінскія падраздзяленні адбілі 17 атак расіян, якія спрабавалі прасунуцца ў раёнах Вільчы, Казачай Лапані і Лімана, а таксама ў кірунках Ізбіцкага і Сінельнікава.
* * *
Украінскія ваенныя праводзяць контрдыверсійныя мерапрыемствы і паступова выцясняюць расійскіх захопнікаў з раёнаў Купянска Харкаўскай вобласці, дзе яны яшчэ захоўваюць прысутнасць, паведаміў галоўнакамандуючы УСУ Аляксандр Сырскі ў Telegram.
«Праціўнік працягвае атакаваць малымі пяхотнымі групамі і спрабуе пранікаць у гарадскую забудову. Сілы абароны праводзяць контрдыверсійныя мерапрыемствы, знішчаюць варожыя групы і паступова выцясняюць акупантаў з раёнаў, дзе яны яшчэ захоўваюць прысутнасць.
Менавіта ўзгодненыя дзеянні падраздзяленняў дазваляюць своечасова выяўляць праціўніка і наносіць яму страты», — напісаў генерал.
Сырскі паведаміў, што працаваў на Харкаўшчыне з групоўкамі войскаў і часцямі, якія выконваюць баявыя задачы на Купянскім кірунку. Разам з камандаваннем 10-га армейскага корпуса і камандзірамі падраздзяленняў ён абмеркаваў далейшыя дзеянні для паляпшэння сітуацыі ў Купянску і вакол горада.
* * *
У ноч на 18 ліпеня ў Кіеве і некаторых абласцях двойчы за ноч аб’яўлялі паветраную трывогу з-за пагрозы балістычных ракет.
Вечарам 17 ліпеня расійскія войскі нанеслі ракетны ўдар па партовай інфраструктуры Адэскай вобласці. У выніку атакі пацярпела грамадзянскае судна пад сцягам Маршалавых астравоў, чацвёра членаў экіпажа пацярпелі.
Вечарам 17 ліпеня расійскія войскі атакавалі Ноўгарад-Северскі ў Чарнігаўскай вобласці, БпЛА трапіў у жылы дом, пацярпела сям’я: трое дзяцей і іх бацькі.
Часова акупаваны Крым атакавалі дроны ў ноч на 18 ліпеня. Зафіксаваны пажар на аэрадроме «Гвардзейскі», паведамляе маніторынгавы Telegram-канал «Крымскі вецер».
* * *
* * *
Паспяховыя ўдары ўкраінскіх дронаў па расійскіх НПЗ нанеслі сур’ёзны ўдар па нафтавай інфраструктуры РФ. Наступствы гэтага крызісу ўжо выйшлі на глабальны ўзровень, справакаваўшы падаражанне паліва ў ЗША, піша Axios.
На фоне пастаянных атак беспілотнікаў Расія была вымушана ўвесці забарону на экспарт свайго паліва. Гэта рашэнне разам з напружанасцю з-за вайны з Іранам прывяло да росту сусветных цэн на энерганосьбіты.
У ЗША наступствы сталі прыкметныя ўжо на гэтым тыдні — цэны на дызельнае паліва перавысілі адзнаку ў 5 долараў за галон. Прычынай такога скачка стала змяненне лагістыкі: традыцыйныя пакупнікі расійскага дызеля (у тым ліку Бразілія і іншыя краіны, што развіваюцца) пачалі актыўна шукаць альтэрнатыўныя крыніцы і звярнуліся да ЗША. Гэты дадатковы знешні попыт стымулюе рост цэн для амерыканскіх спажыўцоў.
Як адзначае выданне, рашэнне Масквы забараніць экспарт паліва з’яўляецца выразным сігналам аб маштабах унутраных узрушэнняў. Хоць РФ спрабуе старанна хаваць ці карэкціраваць эканамічную статыстыку, схаваць наступствы ўдараў становіцца ўсё цяжэй.
* * *
Паліўны крызіс у Расіі з-за ўдараў украінскіх дронаў па НПЗ і баявых дзеянняў у Азоўскім моры істотна ўскладнілі працу фермераў на поўдні РФ, піша Reuters.
Рабочыя ферм у Растоўскай вобласці стаяць у гадзінных чэргах, каб проста заправіць машыну і дабрацца да працы.
Міністэрства сельскай гаспадаркі Расіі заявіла, што перспектывы ўраджаю гэтага года добрыя, аднак прызнала непакой з палівам ва ўсіх рэгіёнах, паабяцаўшы фермерам, што дзяржава забяспечыць неабходнае паліва.
Сітуацыя дэманструе маштаб перабояў для фермераў Расіі — найбуйнейшага ў свеце экспарцёра пшаніцы — з-за ўзмоцненай кампаніі ўдараў Украіны па энергетычнай інфраструктуры і абвастрэння марскіх баявых дзеянняў у Азоўскім і Чорным морах. Азоўскае мора — асноўны выхад для экспарту збожжа з Растоўскай вобласці. З-за абмежавання суднаходства прапановы купіць збожжа практычна зніклі.
Па ацэнцы аналітыкаў даследчай кампаніі SovEcon, калі ваеннага рашэння для адкрыцця Азоўскага мора не будзе, а сітуацыя зацягнецца на большую частку другога паўгоддзя, Расія можа не даставіць на сусветны рынак 5-10 мільёнаў тон пшаніцы.
Летась Расія экспартавала больш за 61 мільён тон збожжа, уключаючы 46 мільёнаў тон пшаніцы.
Па ацэнках, фермеры ўжо губляюць каля 1000 рублёў за тону збожжа з-за росту цэн на дызель, а абмежаванні ў Азоўскім моры фактычна падвойваюць гэту суму. Фінансавы ціск можа прымусіць фермераў яшчэ больш скараціць плошчы пасеваў збожжа, працягваючы тэндэнцыю, якая ідзе з 2022 года.
* * *
Даследаванні расійскіх ракет «Іскандэр-М» і «Арэшнік» сведчаць, што РФ працягвае вырабляць новыя ракеты, выкарыстоўваючы як сучасную замежную электроніку, так і кампаненты ўласнай і беларускага вытворчасці, паведаміў упаўнаважаны прэзідэнта Украіны па пытаннях санкцыйнай палітыкі Уладзіслаў Уласюк, перадае «Інтэрфакс-Украіна».
«У даследаваным "Арэшніку" ўсе ідэнтыфікаваныя кампаненты выраблены выключна расійскімі і беларускімі прадпрыемствамі. Асабліва паказальнай з’яўляецца роля беларускіх вытворцаў, перш за ўсё "Інтэграла" і завода "Транзістар", прадукцыя якіх рэгулярна сустракаецца ў сучасных расійскіх ракетах», — сказаў ён.
Па словах Уласюка, у касетным «Іскандэры-М» былі выяўлены кампаненты вытворчасці ЗША, Тайваня, Швейцарыі, Японіі, Кітая і Беларусі, прычым частка электронікі выраблена ў 2024-2025 гадах.
«Гэта азначае, што, нягледзячы на санкцыі, сучасныя кампаненты працягваюць трапляць у расійскі ваенна-прамысловы комплекс. Санкцыі працуюць, але іх выкананне патрабуе істотнага ўзмацнення», — адзначыў упаўнаважаны прэзідэнта Украіны.