Зяленскі: Пуцін баіцца смерці — і гэта трэба скарыстаць
Прэзідэнт Уладзімір Зяленскі лічыць, што забарона на выдачу віз расійскім грамадзянам можа прывесці да таго, што народ Расіі пачне ціснуць, каб Уладзімір Пуцін вырашыў хутчэй скончыць вайну.
Зяленскі ў інтэрв'ю The Washington Post падкрэсліў, што ў "візавым бане" няма нічога, што "адымала б права на жыццё", і назваў такія санкцыі "вельмі добрымі і мірнымі".
"Заходнія краіны могуць увесці забарону на ўезд усіх грамадзян РФ у краіны Еўрасаюза... Я з самага пачатку сказаў, што лічу самымі важнымі санкцыямі закрыццё меж, таму што яны [расіяне] адбіраюць чужую тэрыторыю. Што ж, хай жывуць у сваім свеце, пакуль не зменяць сваю філасофію. Такім чынам, краіны закрываюць межы і ўводзяць эмбарга на энергарэсурсы. Асабіста маё меркаванне, што ўсе астатнія варыянты — слабейшыя. Поўнага эмбарга на пастаўкі энергарэсурсаў няма, межы не закрытыя", — канстатаваў Зяленскі.
Зяленскі заклікаў адправіць у Расію ўсіх расіян без выключэння.
"Якімі б ні былі грамадзяне Расійскай Федэрацыі, ёсць тыя, хто падтрымлівае вайну, і тыя, хто не падтрымлівае: іх дзеці вучацца за мяжой, у школах, ВНУ і гэтак далей. Хай едуць у Расію. Нічога страшнага ў гэтым няма, хай едуць туды. Не назаўжды, калі ласка, хай яны вернуцца. Яны проста зразумеюць тады", — заявіў Зяленскі.
Забарону на
выдачу віз расійскім грамадзянам Зяленскі лічыць адзіным спосабам паўплываць
непасрэдна на самога Пуціна.
"Гэта адзіны спосаб паўплываць на Пуціна. Таму што ў гэтага чалавека няма іншага страху, акрамя страху за сваё жыццё. І яго жыццё залежыць ад таго, пагражае яму яго насельніцтва або не. Больш яму нічога не пагражае. Таму, калі яго насельніцтва будзе ціснуць на яго рашэнні, тады будуць і вынікі. І вайна скончыцца. Гэта вельмі зразумелыя санкцыі, яны вельмі простыя. Справа не ў грашах, не ў газе або трубах, і не ў тым, што ўзімку ў немцаў не будзе цяпла. Проста закрый межы на год — і ўбачыш вынік", — дадаў Зяленскі.
Нагадаем, Эстонія, Літва, Чэхія, Фінляндыя і Данія, як і Украіна, настойваюць на тым, каб усе еўрапейскія краіны забаранілі выдачу шэнгенскіх віз расійскім грамадзянам. Чэхія, якая цяпер старшынюе ў Савеце Еўрасаюза, мае намер прапанаваць краінам ЕС спыніць выдачу віз расіянам на пасяджэнні ў канцы жніўня.
