Падаражэлі ацяпленне і электрычнасць, абновяць Працоўны кодэкс. Што змяняецца ў чэрвені

У Беларусі з 1 чэрвеня павысілі субсідаваныя тарыфы на ацяпленне і падагрэў вады і некаторыя іншыя жыллёва-камунальныя паслугі. Выраслі таксама некаторыя тарыфы на электрычнасць. Пацяжэлыя жыроўкі ў гэтым месяцы таксама атрымаюць тыя, каго чыноўнікі аднеслі да «дармаедаў» (для іх з траўня паднялі тарыфы на ацяпленне і газ), распавядае TUT.BY.

У канцы чэрвеня запрацуе абноўлены Працоўны кодэкс: няўгодных работнікаў звальняць стане прасцей. Акрамя таго, у чэрвені паднялі цэны на асобныя маркі цыгарэт. А бюджэтнікам трэба падрыхтавацца да змен у заробках, якія ўвядуць з ліпеня, але ўжо цяпер на месцах спрабуюць «не дапусціць напружанасці ў калектывах» і запэўніваюць работнікаў, што праз новаўвядзенні не будзе зніжэння выплат.

Як змяніліся тарыфы за жыллёва-камунальныя паслугі

Субсідаваныя тарыфы на цеплазабеспячэнне — ацяпленне і падагрэў вады — павысілі з 1 чэрвеня. Яны павялічыліся з 20,6216 рубля да 21,9245 рубля за 1 Гкал. Рост — на 6,3%.

Да прыкладу, у двухпакаёвай кватэры ў Мінску на 50 «квадратаў» за ацяпленне (спажыты аб'ём 1,0163 Гкал) паводле новага тарыфу трэба будзе заплаціць 22,28 рубля, а паводле старога тарыфу выйшла б на 1,32 рубля менш. Для параўнання: калі ў гэтай кватэры ніхто не зарэгістраваны, то разлік будзе па эканамічна абгрунтаваным тарыфе (107,31 рубля за 1 Гкал, яго падвышалі з 1 студзеня), да аплаты будзе 109,06 рубля.

На тэхнічнае абслугоўванне тарыф з 1 чэрвеня складае 0,1238 рубля за 1 квадратны метр (быў раней — 0,1322 рубля). Льготны тарыф прымяняецца пры ўмове, што ў кватэры ёсць зарэгістраваныя.

З чэрвеня ў некаторых жыроўках можа з'явіцца такі радок, як «кіраванне агульнай маёмасцю сумеснага домаўладання». Тарыф — 0,0165 за адзін квадратны метр. Гэта плата за паслугу па кіраванні агульнай маёмасцю сумеснага домаўладання, якая павінна штомесяц ўносіцца плацельшчыкамі жыллёва-камунальных паслуг сумеснага домаўладання.

У чэрвені атрымаюць пацяжэлыя жыроўкі тыя, каго ўключылі ў базу незанятых у эканоміцы і ў каго ёсць ва ўласнасці жыллё. Нагадаем, з 1 мая з гэтых людзей пачалі спаганяць плату па эканамічна абгрунтаваных тарыфах за газазабеспячэнне і ацяпленне.

Падаражэла электрычнасць

З 1 чэрвеня павысілі некаторыя тарыфы на электраэнергію. Гаворка пра тарыфы для абагравання жылля электрычнасцю — як прыватных дамоў, так і кватэр у шматкватэрных жылых дамах. Да прыкладу, тарыф, які ў народзе называюць «тры капейкі», вырас з 1 чэрвеня да 0,0398 рубля 1 кВт·г (быў — 0,0374 рубля). Гэты варыянт для тых, хто хоча абаграваць жыллё электрычнасцю, — усталяваць дадатковы, спецыяльны лічыльнік, які цяпер лічыць выдаткаваную электраэнергію на ацяпленне па гэтым тарыфе. Гэта значыць, па факце ён ператворыцца ў «чатыры капейкі».

Запрацуе абноўлены Працоўны кодэкс

З 30 чэрвеня запрацуе абноўлены Працоўны кодэкс. Да прыкладу, яго дапоўняць новай падставай для звальнення — «адсутнасць на працы з-за адбыцця адміністрацыйнага арышту». Пазбавіцца працы можна будзе таксама за «зліў» інфармацыі пра арганізацыю. Чыноўнікі таксама ўводзяць новаўвядзенні па забастоўках. Да прыкладу, звольніць работніка-страйкоўца змогуць без папярэдняга паведамлення або згоды прафсаюза. Пры гэтым анансаваныя раней новаўвядзенні ў працоўнае заканадаўства, якія сапраўды могуць палепшыць становішча работнікаў (да прыкладу, урэгуляваць пытанні пераводу работнікаў на «дыстанцыёнку»), да гэтага часу не ўвялі.

Змяніліся цэны на некаторыя цыгарэты

З 1 чэрвеня падаражэлі некаторыя цыгарэты, а асобныя — патаннелі. Да прыкладу, цыгарэты «Kent Feel Vibe» Гродзенскай тытунёвай фабрыкі «Нёман» патаннелі на 20 капеек (да 3,5 рубля), а «Vogue Menthe» падаражэлі да 4,3 рубля (+10 капеек). У продажы з'явіліся «Kent Crystal Duo» (3,75 рубля).

Паглядзець увесь спіс цыгарэт і як на іх змяніліся цэны з 1 чэрвеня, можна па спасылцы на сайце МПЗ.

Паспець заплаціць падаходны падатак

Беларусам, якія ў 2020 годзе атрымалі даходы, што падлягаюць дэклараванню і па якіх налічылі падаходны падатак, трэба заплаціць яго да 1 чэрвеня (уключна).

Пратэрміноўка па выплаце падатку, калі памер нявыплаты перавышае адну базавую, цягне за сабой штраф у памеры 15% ад нявыплачанай сумы падатку, але не менш за 0,5 базавай (14,5 рубля).

Лёс цэн на малако, мяса і яйкі

29 чэрвеня заканчваецца цэнавае рэгуляванне на 18 груп сацыяльна значных тавараў, у тым ліку малака, мяса, яек (поўны спіс можна паглядзець па спасылцы).

Бюджэтнікаў рыхтуюць да заробкавых новаўвядзенняў

З 1 ліпеня для бюджэтнікаў увядуць чарговыя змены па заробках. Яны датычацца, сярод іншага, прэмій і надбавак работнікам. Цяпер чыноўнікі, прафсаюзы тлумачаць бюджэтным арганізацыям, як будзе працаваць новая схема аплаты працы, пры гэтым каб «не дапусціць і папярэдзіць сацыяльную напружанасць у калектыве» і выключыць выпадкі зніжэння заробкаў. Нагадаем, папярэднія істотныя змены ў заробках бюджэтнікаў, якія ўвялі з 2020 года, суправаджаліся шматлікімі памылкамі ў налічэнні і выплаце заробкаў бюджэтнікам, скаргамі бюджэтнікаў, калектыўнымі зваротамі.