Ці ведаў Васіль Жарко аб карупцыі ў Міністэрстве аховы здароўя?

Некалькі важных пытанняў у справе затрыманых за хабар медыцынскіх функцыянераў.

КДБ апублікаваў новыя падрабязнасці гучнай справы медыцынскіх чыноўнікаў, затрыманых за хабар. Сталі вядомыя імёны і пасады фігурантаў, названыя памеры незаконных узнагарод. Разам з тым, справа, якая атрымала ў прэсе назву «Мінздраў-гейт», пакідае шэраг пытанняў, на якія нядрэнна было б атрымаць адказы.
Па словах кіраўніка Камітэта дзяржбяспекі Валерыя Вакульчыка, сама па сабе існуючая сістэма закупак медыцынскага абсталявання і лекаў стварала ўмовы для карупцыйных праяў:
— Фактычна механізм допуску лекаў і медабсталявання на рынак краіны быў настолькі забюракратызаваны, што хаджэнне па кабінетах медыцынскіх чыноўнікаў і валакіта займалі месяцы і нават больш. Як следства, медустановы не маглі своечасова атрымаць патрэбнае абсталяванне або запчасткі да яго.
Ці наўмысна ствараліся такія ўмовы ці гаворка ідзе пра банальную некампетэнтнасць адказных чыноўнікаў? У любым выпадку, сам па сабе факт стварэння цяплічных умоў для карупцыі ў медыцынскім ведамстве выклікае пытанні як да кантралюючых органаў, якія гадамі не заўважалі праблему, так і да кіраўніцтва Міністэрства аховы здароўя. І тут дарэчы будзе ўзгадаць пра тое, хто кіраваў міністэрствам менавіта ў тыя гады, калі, па дадзеных следства, злачынныя схемы прыносілі медыцынскім функцыянерам дзясяткі і сотні тысяч даляраў хабару.
Затрыманы за вырашэнне пытанняў па дзяржрэгістрацыі лекаў дырэктар Цэнтра экспертыз і выпрабаванняў у ахове здароўя Аляксандр Сталяроў быў прызначаны на гэтую пасаду ў 2007-м. Да таго моманту пасаду міністра аховы здароўя год як займаў Васіль Жарко.
Ён жа кіраваў ведамствам, калі ў 2011-м быў прызначаны дырэктарам «Белмедтэхніка» Аляксандр Шарак, у якога ў гаражы ў тайніку выявілі каля $ 620 тысяч.
У снежні 2010-га пасаду начальніка ўпраўлення аховы здароўя Гродзенскага аблвыканкама атрымаў Андрэй Стрыжак, затрыманы за арганізацыю правядзення тэхнічнага абслугоўвання і рамонту медыцынскага абсталявання.
Васіль Жарко займаў пасаду кіраўніка Міністэрства аховы здароўя з мая 2006-га па снежань 2016 га. Ці ведаў ён пра тое, што адбываецца ў яго ведамстве? Ці можна было гадамі не заўважаць скаргі на дарагія лекі і бюракратычныя перашкоды? Пра гэта мы можам толькі здагадвацца. Аб маштабах праблемы кажа наступны факт.
Агучваючы скандальныя падрабязнасці, кіраўнік КДБ нагадаў пра тое, што старт справе даў Аляксандр Лукашэнка, які даручыў ураду перагледзець кошт лекаў.
— Пры гэтым, што па зразумелых прычынах засталося за кадрам, Камітэту дзяржаўнай бяспекі было даручана глыбока і ўсебакова разабрацца ў прычынах завышэння кошту лекаў і медыцынскага абсталявання. Гэтая праца камітэтам была праведзена, — зрабіў важнае ўдакладненне Вакульчык.
Сам факт таго, што цэнаўтварэннем на лекі па прамым даручэнні кіраўніцтва краіны заняліся спецслужбы, кажа пра многае. Напрыклад, пра тое, што праблема даўно выйшла за межы ведамства, усярэдзіне якога яе ўласнымі сіламі вырашыць не змаглі (ці не захацелі).
Паводле gazetaby.com