Змагары з прапагандай: горш за ўсё на скаргі рэагуюць Тэлеграм і Ютуб

Беларускія прапагандысты асвойваюць сацыяльныя сеткі, а неабыякавыя беларусы з імі змагаюцца. Як піша «Еўрарадыё», з пераменным поспехам. Якія пляцоўкі хутчэй за ўсё рэагуюць на шматлікія скаргі і выдаляюць фэйкі і кантэнт з адкрытай агрэсіяй?

15social_superjumbo.jpg

«Больш за ўсё цяпер выдаляе ЦікТок, — расказваюць у суполцы «Стоп Пропаганда». — Далей па выніковасці Інстаграм. З астатнімі досыць складана. Ютуб магчыма забаніць толькі страйкамі, ну і санкцыямі, але да іх гэта праз месяцы даходзіць. З Твітарам і Фэйсбукам тое самае, але зрэдку прастрэльвае».

Суразмоўцы нагадваюць, што ў самым пачатку здолелі дамагчыся выдалення фэйкавага акаўнта Святланы Ціханоўскай, акаўнтаў супрацоўніцы «Беларусь сегодня» Людмілы Гладкай і іншых прапагандыстаў у Фэйсбуку. Былі і парламентарыі, і беларускія «зоркі».

«Перадапошняе гучнае выдаленне на Ютубе санкцыйных таварышаў — гэта наша сумесная праца з НАУ. Апошняе выдаленне "пакаянных відэа" і пары акаўнтаў — гэта ўжо Офіс Святланы Ціханоўскай без нас зрабіў», — дадаюць у супольнасці. 

Але праца «Стоп Пропаганды» заключаецца не толькі ў тым, каб збіраць спасылкі на прапагандыстаў і заклікаць беларусаў скардзіцца на іх. Напрыклад, яны робяць рассылкі.

«Для "Libereco" [міжнародная праваабарончая ініцыятыва, якая ў тым ліку заклікае заходнія брэнды адмаўляцца ад рэкламы ў дзяржСМІ. — Заўв. рэд.] робім пастаянны маніторынг рэкламы на "Гебельс-ТБ". Гэта таксама дае свой плён», — расказваюць суразмоўцы.

Стараюцца прыцягнуць у «Стоп Пропагандзе» да сваёй дзейнасці больш людзей, для гэтага часам настройваюць і рэкламныя кампаніі, але прызнаюцца, што ў невялікіх аб'ёмах: увесь час працавалі на асабістыя грошы, толькі ў апошнія месяцы пачалі збіраць данаты.

Адна з актуальных мэт: паспрабаваць прымусіць тэлеграм заблакаваць прапагандысцкія каналы, якія публікуюць «пакаяльныя відэа» і асабістыя звесткі беларусаў. Паўплываць на адміністрацыю месенджара, паводле іх слоў, можна толькі праз Google і Apple. Так, нядаўна карпарацыі запатрабавалі абмежаваць доступ да двух апазіцыйных каналаў, якія публікуюць звесткі пра сілавікоў і чыноўнікаў.

«Мы таксама стараемся націснуць па гэтай схеме ўжо даўно. Пару тыдняў таму перадалі свае напрацоўкі Офісу Ціханоўскай і НАУ, каб яны афіцыйна звярнуліся да Google і Apple. Пакуль чакаем вынікаў», — сказалі на заканчэнне ў супольнасці.

Дарэчы, сярод іншага ініцыятыва збірае подпісы пад петыцыяй з заклікам да адміністрацый сацыяльных сетак выдаліць прапагандысцкія рэсурсы.