Уладальніка гродзенскага блога «S13» асудзілі на 3,5 гады калоніі. Хронікі рэпрэсій 31 кастрычніка

 У Беларусі працягваюцца палітычныя рэпрэсіі: рэдактара гродзенскага блога S13 Сяргея Чабоцьку асудзілі на тры з паловай гады калоніі, а ў «экстрэмісцкія спісы» ўнеслі яшчэ некалькі дзясяткаў грамадзян, у тым ліку пастара.

Гродзенскі абласны суд асудзіў палітвязня Сяргея Чабоцьку паводле арт. 361-1 КК (стварэнне экстрэмісцкага фармавання). Рэдактару прызначылі тры гады і шэсць месяцаў пазбаўлення волі ў калоніі ва ўмовах узмоцненага рэжыму і штраф 1000 базавых велічыняў.

Паведамляецца, што ў судовым пасяджэнні мужчына віну не прызнаў.

Паводле матэрыялаў справы, Сяргей Чабоцька «сумесна з іншымі асобамі стварыў сайт S13 і аднайменныя рэсурсы, дзе публікаваліся заклікі да гвалтоўнай змены канстытуцыйнага ладу, абраза прадстаўнікоў улады і паклёпніцкі сведчанні адносна прэзідэнта Беларусі».

У «Спіс экстрэмістаў» дадалі яшчэ 26 прозвішчаў — цяпер у ім 5942 чалавекі

31 кастрычніка МУС зрабіла традыцыйнае пятнічнае абнаўленне «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі гомельскага пастара Алега Лойку, а таксама пяць чалавек, якіх асудзілі паводле «народнага» арт. 342 КК, але вызвалілі ад адказнасці «ў сувязі з выхадам тэрміну прыцягнення».

«Вясна» публікуе апошнюю версію спіса. 

Палітвязень Сяргей Раманаў трапіў у шпіталь

Стала вядома, што нядаўна Сяргей Раманаў трапіў у бальніцу, дзе яму зрабілі аперацыю. Аперацыя была планавай і прайшла без ускладненняў. Неўзабаве яго зноў павінны перавесці ў калонію. Пра гэта, не называючы сябе і не ўдакладняючы дыягназ Сяргея, тг-каналу Права на паўстанне паведаміў чалавек, які выпадкова сустрэў яго ў бальніцы. Мяркуецца, што анархіста аперавалі ў бальніцы для асуджаных у Калядзічах.

Пра праблемы са здароўем Сяргея было вядома даўно, але ніякіх падрабязнасцяў праз турэмную цэнзуру мы не атрымлівалі. 

Сяргей — таленавіты мастак, але ў калоніі яго малюнкі знішчаюць. На Сяргея пастаянна аказваецца як фізічны, так і псіхалагічны ціск.

Нагадаем, што агульны тэрмін зняволення анарха-партызана складае 24,5 года.

Падтрымаць вязня:

Раманаў Сяргей Аляксандравіч

ПК № 9, вул. Дабралюбава, 16

г. Горкі, 213410

58‑гадовую лагістку асудзілі па палітычных артыкулах і назвалі «тэрарысткай»

Юліі Зароўскай 58 гадоў. Яна мінчанка. У апошнія гады Юлія працавала лагістам у фірме, якая оптам вырабляла і прадавала вырабы са скуры. Вядома, што ў жанчыны ёсць дзеці і ўнукі.

Мяркуючы, па сацсетках, Юлія падтрымала рух за свабодныя выбары ў 2020‑м і выступала за мір ва Украіне. Рэпосціла яна і звычайныя рэчы — прыгожыя кветкі, фота сваіх сяброў і сваякоў, здымкі з розных мерапрыемстваў, піша «Наша Ніва».

Увосень 2025‑га Юлію асудзілі ў Мінскім гарадскім судзе па трох палітычных артыкулах — «распальванне варожасці» (ч. 1 арт. 130 КК), «абраза прадстаўніка ўлады» (арт. 369 КК) і «ўваходжанне ў склад экстрэмісцкага фармавання» (ч. 3 арт. 361‑1 КК).

Зароўскай пагражала да шасці гадоў калоніі, але і прысуд невядомы. За апошні тыдзень яе імя дадалі ў спісы «экстрэмістаў» і «тэрарыстаў».