СМАЧНА З «НОВЫМ ЧАСАМ»: Лазанкі — беларуская лазання

У беларускай кухні лазанкі вядомыя з XVI стагоддзя. Яны нарадзіліся менавіта з лазанні, якую прывезла на беларускія землі каралева Бона Сфорца, жонка вялікага князя літоўскага і караля польскага Жыгімонта Першага Старога.

Наогул падчас праўлення Боны Сфорца да нас многае прыйшло з італьянскай кухні. У рэцэптах з’явіліся аліўкавы алей, лімоны, лаймы, апельсіны, розныя спецыі.

Каралева любіла смачна паесці сама і з задавальненнем навучала рэцэптам кухараў. А яшчэ дзякуючы ёй пры двары навучыліся правілам этыкету і манерам падчас трапезы, пачалі слаць абрусы на сталы і есці відэльцамі. Бона Сфорца таксама ўвяла культуру спажывання віна. Праўда, тут каралева мела сваю камерцыйную цікавасць: віном гандлявалі з італьянскіх зямель. Нягледзячы на сваю асабістую выгаду, італьянка навучыла беларусаў правільна спалучаць віно з ежай. Але ж нашыя лазанкі будуць смачныя і без віна!

На нашых сталах відэльцы з’явіліся куды хутчэй, чым у іншых краінах. Мы другія пасля італьянцаў, хто сталі есці гэтым сталовым прыборам. Цікавы факт, што ў Францыю відэльцы трапілі з нашых зямель: вялікі князь літоўскі і польскі кароль Генрых Валуа прабыў на троне ўсяго некалькі месяцаў, а потым збег дадому, у Парыж, прыхапіўшы відэльцы.

Беларусы, канечне, перайначылі італьянскую лазанню на свой лад. Існуюць розныя спосабы падачы гэтай стравы: за аснову бярэцца сфармаванае і адваранае цеста, а падаваць можна яго не толькі з мясным соусам, а проста са сметанковым маслам ці смятанай. У посныя дні  — з ягадамі, мёдам. Таксама лазанкі можна запякаць у духоўцы ў керамічным посудзе, пераклаўшы слаямі. Я вам пераказваю менавіта мой улюбёны рэцэпт.

ІНГРЭДЫЕНТЫ:

Для цеста нам спатрэбяцца:

400 г мукі;

150 мл вады;

2 ст. л. алею;

соль і цукар — на смак.

Пададзім  з салам і каўбаскамі.

А яшчэ нам спатрэбяцца:

2 невялікія цыбуліны;

50 г цвёрдага сыру;

50 мл вяршкоў.

ГАТАВАННЕ:

Пачынаем з цеста. Замешваецца вельмі падобна як да пельменяў. Прасейваем праз сіта муку. Дадаем соль, цукар. Усярэдзіне робім невялікую выемку, туды ўліваем алей (з алеем цеста стане больш пластычным). Дадаем ваду, замешваем. Цеста павінна атрымацца тугое. Раскатваем таўшчынёй 3 міліметры і наразаем невялікія прастакутнікі. Калі ёсць час, то можна на 1,5 гадзіны пакінуць прастакутнікі прасушвацца. Калі часу няма, можна абысціся проста духоўкай — нагрэць яе да 150 градусаў і на пергаментнай паперы на 7 хвілін адправіць лазанкі прасушвацца. Даць ім астыць.

Тым часам адварыць 300 г «пальцам піханай» каўбасы. Крыху абсмажыць на патэльні дробна накрышаную цыбулю, да яе дадаць 100 г нарэзанага кавалачкамі несалёнага сала. Калі сала і цыбуля абсмажацца, дадаць каўбасу, нацёрты цвёрды сыр і вяршкі, уліць 50 мл вады, у якой варыліся каўбаскі.

Лазанкі варым у падсоленай вадзе на працягу 7 хвілін, а потым далучаем іх да мясной поліўкі. Тушым яшчэ 5 хвілін. Традыцыйная беларуская страва гатовая.

Прыйшлі вестачкі, што хочацца естачкі! Вось лакшыны і гатовы. Гатуйце  разам з намі.

СМАЧНА ЕСЦІ! 

СМАЧНА З «НОВЫМ ЧАСАМ»


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: