Ігар Кізім: Пры Лукашэнку Беларусь стала крыніцай пагроз для суседзяў, краінай-суагрэсарам
Што чакаць украінцам і іншым краінам нашага рэгіёна ад знаходжання ва ўладзе Лукашэнкі яшчэ наступныя пяць гадоў? Украінскі спецамбасадар Ігар Кізім выказаў асцярогі наконт далейшага праўлення Лукашэнкі ў Беларусі.
Асцярогі наконт далейшага праўлення Аляксандра Лукашэнкі выказаў амбасадар па асаблівых даручэннях МЗС Украіны па Беларусі Ігар Кізім у каментары пра прызначаныя на 26 студзеня 2025 года прэзідэнцкія выбары ў Беларусі, піша «Позірк».
“Лукашэнка ідзе на выбары, калі так можна назваць у цяперашніх беларускіх рэаліях, — напісаў дыпламат на сваёй старонцы ў “Фэйсбуку”. — Ён сказаў пра гэта ўчора ў інтэрв’ю расійскаму тэлеканалу. Відавочна, што сёмы раз ён выйдзе “пераможцам”.
Кізім адзначыў, што гэта магло б тычыцца выключна беларускага грамадства, “калі б Беларусь не стала саўдзельнікам расійскай узброенай агрэсіі супраць Украіны і не стварыла міграцыйны крызіс на межах з ЕС”.
“Менавіта падчас яго цяперашняга тэрміну Беларусь, якая лічылася больш-менш нейтральнай краінай у цэнтры Еўропы, стала крыніцай пагроз, перш за ўсё для суседзяў, краінай-суагрэсарам, краінай, з тэрыторыі якой гучаць ядзерныя пагрозы, а таксама краінай з цяжка прадказальнай і не самастойнай знешняй палітыкай, якая цалкам залежыць ад капрызу Крамля”, — падкрэсліў ён.
Глядзіце таксама
Кажучы пра тое, чаго можна далей чакаць Украіне ад цяперашняга рэжыму ў Мінску, украінскі спецамбасадар прывёў словы Лукашэнкі з інтэрв’ю журналісту ВПС Стыву Розенбергу пра расійска-ўкраінскую вайну: “Гэта я яшчэ па мінімуму ўцягнуты ў гэты канфлікт. А можна сказаць увогуле не ўцягнуты”.
“Праўда, вельмі падобна на пуцінскае “мы яшчэ не пачыналі”, — адзначыў Кізім.
А мбасадар па асаблівых даручэннях МЗС Украіны па Беларусі Ігар Кізім. Фота: БелаПАН
Яшчэ больш цікавай ён назваў заяву Лукашэнкі пра напад РФ на Украіну з тэрыторыі Беларусі ў лютым 2022 года. “Ну вярталіся сабе расійскія войскі да сябе з вучэнняў на поўдні Беларусі, а потым раз — і павярнулі на Кіеў, — інтэрпрэтаваў словы палітыка дыпламат. — Але неяк не тлумачыць, чаму адначасова паляцелі ракеты і бомбы па ўкраінскай тэрыторыі з беларускіх аэрадромаў і чаму гэтае ўварванне цягнулася не адзін месяц. Хоць не, тлумачыць, — “спытайце ў Зяленскага”. Нармальна”.
“Знаходзячыся ў той час у Мінску, я памятаю тыя “бляянні ягнят” (ці іх маўчанне), якімі тлумачылі тамтэйшыя дыпламаты і чыноўнікі відавочны факт расійскай агрэсіі і яе падтрымкі беларускай уладай. Прынамсі да таго, як іх кіраўніку не падрыхтавалі адпаведныя тэзісы, якія ён дагэтуль выкарыстоўвае падчас такіх інтэрв’ю”, — дадаў ён.
Паводле слоў Кізіма, Лукашэнка “наогул мала што мяняе ў сваіх ацэнках і тлумачэннях (якія яму ўпіхнулі ў галаву КДБ і СВР), хіба што ў бок нагнятання і дадавання “жахлівых” прыкладаў”.
“Так, у адказ Розенбергу на пытанне, чаму ён не падтрымаў Украіну, ён зноў панёс такую лухту, што нават я здзівіўся… Прычынай называюцца і санкцыі, і захоп вагонаў, і арышт аўтамабіляў з кіроўцамі (якіх ён нібыта вызваліў, правёўшы спецаперацыю), і пяцёра забітых беларусаў, целы якіх нібыта “расчлянілі, каб мы не зразумелі, як яны загінулі”, — звярнуў увагу спецамбасадар.
Глядзіце таксама
Кізім нагадаў, што “першыя санкцыі супраць Беларусі ў адказ на яе саўдзел у расійскай агрэсіі Украіна ўвяла толькі ў лістападзе 2022 года”, сітуацыя з вагонамі і аўтамабілямі таксама адбылася “ўжо пасля пачатку агрэсіі” і стала “апраўданай рэакцыяй з украінскага боку”.
“Аперацыя “па вызваленні” — гэта было банальнае выкарыстанне сітуацыі з абменам украінскіх кіроўцаў, якія вярталіся з Расіі праз Брэст на расійскіх, якія ехалі ў Расію, — падкрэсліў ён. — Беларусь патрабавала дадаць сваіх кіроўцаў (іх і так планавалі аддаць пазней) у спісы расіян. Але самым цікавым у “тлумачэннях” выглядае павелічэнне колькасці беларусаў, якіх “расчлянілі”. У папярэдніх інтэрв’ю, я памятаю, гаворка ішла пра двух, а зараз ужо пра пяцярых”.
“Што будзе далей? Кажу гэта без асаблівага сарказму, а тым больш самаздаволення. Мой каментарый, перш за ўсё, для таго, каб зразумець, чаго чакаць не толькі беларусам, але і нам, украінцам і іншым краінам нашага рэгіёна ад знаходжання ва ўладзе гэтага чалавека яшчэ наступныя пяць гадоў”, — падсумаваў Кізім.
Глядзіце таксама
