Магда пра новую пасаду Кізіма: Адносіны з дэмсіламі будуць прыярытэтным кірункам

Дырэктар Інстытута сусветнай палітыкі (Украіна) Яўген Магда ў каментары «Салідарнасці» — аб прызначэнні Ігара Кізіма паслом па асаблівых даручэннях па Беларусі.

— Гэта рашэнне не азначае, што Ігар Кізім будзе займацца выключна адносінамі з беларускімі дэмакратычнымі сіламі, — адзначае палітолаг. — Але гэты кірунак будзе прыярытэтам, паколькі дыпламатычныя стасункі Украіны з Беларуссю практычна замарожаныя, хоць і захоўваюцца.

Я думаю, што паўнамоцтвы Кізіма будуць прадугледжваць магчымасць адносін з афіцыйнымі беларускімі ўладамі, паколькі ён пасол па асаблівых даручэннях па Беларусі.

Гэта прызначэнне азначае, што ў Кіеве прызналі існаванне трохкутніка: Кіеў, Мінск, беларускія дэмсілы. І ў гэтым трохкутніку Ігар Кізім як вопытны спрактыкаваны дыпламат будзе ўзаемадзейнічаць.

Магда адзначае, што без дэмакратычнай Беларусі не можа быць бяспечнай Еўропы.

— Імкненне Расіі выкарыстоўваць беларускі балкон моцна прыкметнае і на многае ўплывае. З гэтым трэба працаваць, у першую чаргу — з дэмсіламі. Яны могуць быць нашымі партнёрамі для дыялогу. Але чакаць, што пройдзе месяц пасля прызначэння Ігара Кізіма і Святлана Ціханоўская прыедзе ў Кіеў і сустрэнецца з Уладзімірам Зяленскім, я б не стаў.

Ігар Кізім можа быць прызначаны спецпрадстаўніком Украіны па Беларусі

Ва ўкраінскага боку шмат пытанняў, якія можна вырашаць з беларускімі дэмакратычнымі сіламі, адзначае палітолаг.

— Гэта статус і павелічэнне колькасці беларускіх добраахвотнікаў, імкненне быць максімальна эфектыўнымі ў дачыненнях з беларускімі эмігрантамі, якія сёння застаюцца ва Украіне, агульнаеўрапейская бяспека. А таксама культурныя ўзаемадзеяння, таму што нам неабходна ствараць антыімперскі наратыў Балта-Чарнаморскага рэгіёну. Сярод іншага, гэта можа быць трансляцыя ўкраінскага досведу. Украіна знаходзіцца бліжэй за ўсё да Беларусі з усіх краін рэгіёну па ўзроўні рэфармаванасці.

Пры гэтым, калі разглядаць стратэгіі стасункаў Кіева і афіцыйнага Мінска, то яны абсалютна супрацьлеглыя, падкрэслівае Магда.

— Кіеў імкнецца не абвастраць адносіны з Мінскам. І тое, што дыпламатычныя адносіны яшчэ захоўваюцца, — лічу, заслуга Кіева. А Мінск ідзе на абвастрэнне адносін: не заўсёды па ўласнай волі, часта падпарадкоўваючыся патрабаванням Масквы. Калі ў Растове будзе адкрытае консульства Беларусі, якое будзе распаўсюджваць сваю дзейнасць і на акупаваныя тэрыторыі Украіны, дыпламатычныя адносіны з Беларуссю будуць разарваныя, — падсумоўвае эксперт.