За кошт адпускных. Беларускім настаўнікам навязваюць пуцёўкі ў акупаваны Крым
Беларускім настаўнікам прапануюць летам адпачыць у акупаваным Расіяй Крыме.
Крым летам мінулага года. Фота з сацсетак
Адметнасць сітуацыі ў тым, што зараз на анексаваным паўвостраве неспакойна, ён падвяргаецца атакам украінскіх артылерыі і партызан, турыстычны сезон там можна загадзя лічыць праваленым. Але некаму прыйшла ў галаву ідэя зрабіць гешэфт за кошт настаўнікаў з Беларусі. А што, яны на ўсё пагаджаюцца — што выбары фальсіфікаваць у складзе мясцовых камісій, што адправіцца на курорт пад пагрозай «бавоўны».
Зрэшты, магчыма, усё пакуль не так драматычна. Прынамсі, як распавядае «Н*ша Ніва», пакуль гаворка ідзе толькі пра адну са школ Наваполацка. Там настаўнікаў індывідуальна выклікаюць да дырэктара і настойліва прапануюць набыць пуцёўкі ў Крым.
Прычым, як стала вядома выданню, абяцаюць, што грошы за пуцёўкі потым аднімуць з адпускных
і нават кампенсуюць 30% іх кошту.
Такія
прапановы настаўнікам адбываюцца на фоне заяў украінцаў аб хуткім контрнаступе,
адным з кірункаў якога можа быць і Крым. Інструкцыі, як дзейнічаць у
выпадку ваенных дзеянняў, да прапановы не выдаюцца.
Ад самага пачатку акупацыі паўвыспы ля берагавой лініі
пачалі расці гатэлі. Іх колькасць дасягнула амаль паўсотні. А гэта каля чатырох
тысяч месцаў. Да гэтага трэба дадаць яшчэ афіцыйна зарэгістраваныя 364 аб'екты,
у якіх таксама размяшчаюць турыстаў. Да таго ж і колькасць пляжаў вырасла з 260
да 455.
Колькі каштуе пуцёўка ў Крым? Згодна з прэйскурантам на
сайтах турагенцтваў, 14 начэй у маі-чэрвені абыдзецца ад 130 да 550 даляраў у
залежнасці ад разраду гатэля. Сярэдні кошт пуцёўкі з пераездам, пражываннем у
гатэлі з трохразовым харчаваннем будзе складаць прыкладна 230 даляраў.
Для параўнання: толькі пяць дзён у звычайным двухпакаёвым
нумары айчыннага адносна таннага санаторыя «Нарач» абыдзецца беларусам у 242
даляры.
Пуцёўкі ў Крым для беларусаў таннейшыя, чым для расіян. Але ці гатовы хтосьці з педагогаў да такіх экстрэмальных прыгод пасярод вайны і напярэдадні яе кульмінацыі?