899-ты дзень вайны. Расіі можа спатрэбіцца год, каб адбіць тэрыторыі ў Курскай вобласці
Сабралі апошнія звесткі з франтоў расійска-украінская вайны, развязанай Крамлём пры падтрымцы рэжыму Лукашэнкі.
Фота УСУ
У Бранскай вобласці РФ уведзены «рэжым контртэрарыстычнай аперацыі ў сувязі з павышэннем ўзроўню дыверсійна-тэрарыстычных пагроз з боку Украіны», паведамляе расійскі Нацыянальны антытэрарыстычны камітэт.
Такі ж рэжым уведзены таксама ў Курскай вобласці, распавёў выконваючы абавязкі губернатара Аляксей Смірноў.
Той жа антытэрарыстычны камітэт крыху пазней заявіў пра «рэжым КТА» ў Белгародскай вобласці.
Такім чынам расійскія ўлады адрэагавалі на уварванне УСУ ў Курскую вобласць.
Рэжым КТА мае на ўвазе ўзмацненне аховы грамадскага парадку, часовае адсяленне грамадзян, абмежаванне руху транспарту, праверку дакументаў і кантроль тэлефонных перамоваў грамадзян.
Яго перыядычна ўводзяць у розных рэгіёнах Расіі. 22 траўня 2023 года яго абвясцілі ў Белгародскай вобласці пасля таго, як мяжу перайшлі байцы легіёна «Свабода Расіі» і «Рускага добраахвотніцкага корпуса» — узброеных фарміраванняў, якія змагаюцца на баку Украіны.
Таксама НАК абвясціў аб увядзенні рэжыму «контртэрарыстычнай аперацыі» на тэрыторыі Масквы, а таксама Маскоўскай і Варонежскай абласцей летась 24 чэрвеня. Гэта здарылася неўзабаве пасьля таго, як Яўген Прыгожын выступіў супраць Міністэрства абароны і пачаў узброены мяцеж супраць дзейнай улады.
Глядзіце таксама
Праз чатыры дні пасля пачатку ўварвання Украіны ў Курскую вобласць колькасць пацверджаных украінскіх брыгад у зоне ўварвання і вакол яе вырасла як мінімум да пяці: чатыры вайсковыя механізаваныя брыгады і адна брыгада са складу незалежных штурмавых авіяцыйных сіл.
Як піша Forbes, у агульнай складанасці гэтыя падраздзяленні могуць уключаць да 10 000 вайскоўцаў і 600 адзінак бронетэхнікі.
«За чатыры дні пяць брыгад часткова або цалкам занялі каля 400 квадратных міль Курскай вобласці і ўзялі ў палон дзясяткі расійскіх вайскоўцаў. Магчыма, што брыгады не збіраюцца заставацца ў Расіі, але цяпер няма ніякіх прыкмет таго, што яны запавольваюць свае атакі», — піша Forbes.
Як нагадваецца ў артыкуле, у першыя гадзіны ўкраінскага наступу быў пацверджаны непасрэдны ўдзел трох брыгад: 22-й і 88-й механізаваных брыгад, а таксама 80-й дэсантна-штурмавой брыгады УСУ.
Аднак у чацвер 116-я механізаваная брыгада размясціла відэа, знятае беспілотнай групай «Хорн», на якім бачныя танкі і бронетранспарцёры брыгады, якія рухаюцца да Курска. А днём пазней 61-я механізаваная брыгада таксама абвясціла пра сябе ў відэа з расійскага горада Суджа.
Акрамя таго, 49-Я артылерыйская брыгада знаходзіцца прыкладна ў 30 мілях ад месца Курскай бітвы. Таксама ў гэтым раёне знаходзіцца 27-я артылерыйская брыгада, якая з'яўляецца адзіным аператарам HIMARS, адзначаюць у Forbes.
Так, у пятніцу было апублікаванае відэа, на якім HIMARS атакуе калону расійскіх войскаў, якія рухаюцца да Курска. На здымках, зробленых пасля атакі, бачныя сем знішчаных грузавікоў і мноства загінулых салдат.
Гэты абстрэл дапамагае растлумачыць, як украінцам удалося прасунуцца так далёка і так хутка. Падобна на тое, што артылерыя не дазваляе свежым расійскім войскам дабрацца да поля бою, адзначаюць у Forbes.
Пры гэтым у артыкуле падкрэсліваецца, што артылерыйская блакада памяншае адну з галоўных небяспек для ўкраінскай аперацыі — рызыку таго, што Расія ізалюе ўкраінскія часткі.
«Але расійцы не змогуць ізаляваць украінцаў, калі яны не змогуць прарвацца праз украінскую артылерыю, каб атакаваць лініі забеспячэння асноўных украінскіх сіл. І кожны дзень затрымкі замацоўвае поспехі украінцаў, паколькі ў Курск прыбываюць усё новыя падраздзяленні», — адзначае выданне.
Глядзіце таксама
Паспяховая аперацыя УСУ на расійскай тэрыторыі — пасля больш чым двух гадоў баёў амаль выключна на тэрыторыі Украіны — мела псіхалагічную каштоўнасць для Кіева, падымаючы маральны дух украінскіх войскаў і мірных жыхароў, паказваючы Пуціна і яго вайскоўцаў як нямоглых і неэфектыўных.
У артыкуле The Washington Post паведамляецца, што раптоўны прарыў УСУ — самы сур'ёзны выклік для дыктатара Пуціна з часоў паўстання вагнераўцаў. Поспехі Кіева падымаюць маральных дух украінскіх войскаў і мірных жыхароў, але пры гэтым моцна б'юць па рэпутацыі расійскай улады і вайскоўцаў.
Падкрэсліваецца, што калі расійскія войскі будуць наступаць з той жа хуткасцю, што і на іншых кірунках, ім спатрэбіцца год, каб адбіць страчаныя тэрыторыі ў Курскай вобласці.
Больш за тое, як паказвае выданне, Узброеныя сілы Украіны занялі ўжо больш за 20 памежных расійскіх вёсак і часткова як мінімум адзін горад, а цяпер прасоўваюцца да Курскай АЭС. У артыкуле адзначаецца, што ва ўкраінскіх брыгад будзе час акапацца на ўмацаваных пазіцыях, што патэнцыйна дасць Кіеву магутны козыр у выпадку будучага спынення агню або мірных перамоваў.
«Украінскія сілы відавочна прасунуліся даволі далёка ў Курскай вобласці, але колькі тэрыторыі яны кантралююць або на самай справе маюць намер кантраляваць, застаецца невядомым», — сказаў старшы навуковы супрацоўнік Фонду Карнегі за міжнародны мір Майкл Кофман.
Глядзіце таксама
Уварваннем у Курскую вобласць Украіна можа пераследаваць яшчэ адну мэту — захапіць у палон як мага больш расійцаў, каб потым выкарыстоўваць іх для абмену на сваіх ваеннапалонных.
Пра гэта піша Bild, адзначаючы, што ўкраінскае кіраўніцтва ўсё яшчэ прама не пракаментавала прасоўванне УСУ на расійскай тэрыторыі.
Аднак у сваім вячэрнім відэазвароце 9 жніўня прэзідэнт Украіны Уладзімір Зяленскі падзякаваў салдатам, якія ўзялі расійскіх вайскоўцаў у палон, заявіўшы, што гэта надзвычай важна і за мінулыя трое сутак асабліва вынікова, адзначае выданне.
«Калі абменны фонд будзе папоўнены, можна будзе вызваліць яшчэ больш украінскіх палонных. З пачатку наступу ў Курскай вобласці з'явілася некалькі відэазапісаў, на якіх паказаныя групы расійскіх жаўнераў, якія здаліся ў палон, сярод якіх, у прыватнасці, памежнікі», — адзначае Bild.
Глядзіце таксама
Разгромленая расійская калона ў Курскай вобласці ўначы 9 жніўня магла перавозіць асабісты склад 44-га армейскага корпуса Паўночнай групоўкі расійскіх войскаў (Ленінградская вайсковая акруга) або брыгады «Пятнашка», гаворыцца ў справаздачы амерыканскага Інстытута вывучэння вайны (ISW) са спасылкай на расійскія крыніцы.
Паведамляецца, што калону расійскай вайсковай тэхнікі ўдалося ўразіць на ўсход ад Рыльска каля пасёлка Акцябрскае Курскай вобласці.
Таксама паказваецца, што калона змяшчала 14 крытых грузавікоў «Урал» і КамАЗ, якія перавозілі расійскія рэзервы, прызначаныя для ўзмацнення расійскіх войскаў у Курскай вобласці.
Што тычыцца зброі, якой быў нанесены такі ўдар, у ISW не пракаментавалі.
Нагадаем, раней паведамлялася, што каля Рыльска ў Курскай вобласці разнеслі калону расійскіх вайскоўцаў. Расія магла страціць да паўтысячы жаўнераў у выніку гэтага ўдару.
Разам з тым знішчана больш за дзесяць ваенных грузавікоў з пяхотай.
«Паводле ацэнак, кожны з такіх грузавікоў можа перавозіць да 35 цалкам экіпіраваных вайскоўцаў. На відэа відаць 14 знішчаных транспартных сродкаў, што дазваляе выказаць здагадку, што ў выніку ўдару расійскае войска магло страціць ад 200 да 490 жаўнераў за адну ноч... Гэта можа стаць адной з найбуйнейшых разавых страт для расійскага войска з пачатку поўнамаштабнай вайны», — гаварылася ў адным з паведамленняў.
Глядзіце таксама
У Расіі заявілі, што за ноч 10 жніўня «перахапілі і знішчылі» 32 дроны над двума абласцямі.
Паводле звестак Мінабароны РФ, 26 украінскіх беспілотнікаў збілі над Курскай вобласцю і 6-над Яраслаўскай.
Губернатар Яраслаўскай вобласці РФ Міхаіл Еўраеў заявіў, што дроны спрабавалі атакаваць адно з прадпрыемстваў рэгіёну. На месцы падзення разбурэнняў і пацярпелых нібыта няма.
«У зоне выяўлення працуюць экстранныя службы. На тэрыторыі рэгіёну могуць заставацца фрагменты беспілотнікаў, якія важныя для следства. Пры іх выяўленні не набліжайцеся да іх», — напісаў ён.
Глядзіце таксама
За мінулыя суткі на фронце ва Украіне зафіксавалі 90 баявых сутыкненняў. Найбольш актыўна войскі РФ наступалі на Пакроўскім кірунку. На мяжы з Чарнігаўскай і Сумскай абласцямі Расія захоўвае вайсковую прысутнасць, паведамляе Генштаб УСУ.
«Па ўдакладненай інфармацыі, за ўчора праціўнік нанёс па пазіцыях украінскіх падраздзяленняў і населеных пунктах два ракетныя ўдары з ужываннем двух ракет, а таксама 71 авіяўдар, скінуўшы 91 КАБ. Акрамя гэтага, здзейсніў больш за 4800 абстрэлаў, з іх 170 — з рэактыўных сістэм залпавага агню», — гаворыцца ў паведамленні.
Авіяцыя, ракетныя войскі і артылерыя Сіл абароны Украіны нанеслі чатыры ўдары па раёнах засяроджвання асабістага складу расійскіх войскаў, а таксама пабілі чатыры пункты кіравання, тры сродкі СПА, сем артылерыйскіх сістэм, склад боепрыпасаў і тры іншыя важныя аб'екты.
Паводле даных Генштаба, на асобных напрамках фронту сітуацыя была наступная.
На Харкаўскім напрамку ішлі чатыры баі. Сілы абароны адбівалі штурмавыя дзеянні праціўніка паблізу Ваўчанска.
На Купянскім напрамку адбылося два боесутыкненні, у прыватнасці, у Калеснікоўцы і Табаеўцы.
На Ліманскім кірунку акупанты атакавалі 15 разоў непадалёк Макееўкі, Неўскага і Серабранскага Лесу.
На Северскім напрамку адбылося 11 баявых сутыкненняў. Украінскія абаронцы адбівалі штурмавыя дзеянні расійскіх захопнікаў паблізу Белагораўкі, Верхнекаменскага, Івана-Дар'еўкі, Выемкі і Спірнага.
На Краматорск кірунку ішлі дзевяць баёў у раёнах Ступачак, Часавага Яра і Іваноўскага.
На Тарэцкім кірунку расійцы атакавалі 14 разоў непадалёк Белай Гары, Дыліеўкі, Тарэцка і Нью-Ёрка.
На Пакроўскім напрамку УСУ адбілі 28 штурмавых дзеянняў.
На Курахоўскім напрамку сілы абароны адбівалі пяць атак ля Параскавіеўкі, Аляксандраўкі і Канстанцінаўкі.
На Урэмаўскім кірунку наступальнае дзеянне расійцаў у бок Вадзянога не мела поспеху.
На Арэхаўскім кірунку расійскія войскі здзейснілі штурм пазіцый украінскіх падраздзяленняў паблізу Малой Такмачкі.
Глядзіце таксама
Расійскія захопнікі 10 жніўня атакавалі Краматорск і шэраг населеных пунктаў Харкаўскай вобласці, ёсць загінулыя і параненыя.
Старшыня Данецкай абласной ваеннай адміністрацыі Вадзім Філашкін напісаў у «Тэлеграме», што сёння раніцай расійцы патрапілі ракетай па аб'екце крытычнай інфраструктуры ў Краматорску.
«Адзін работнік загінуў, яшчэ некалькі атрымалі раненні. Будынкі аб'екта атрымалі сур'ёзныя пашкоджанні. Аб'ёмы нанесенай шкоды ўстанаўліваем», — адзначыў ён.
Старшыня Харкаўскай вобласці Алег Сінягубаў паведаміў, што ў выніку абстрэлу вёскі Першамайскае загінулі два чалавекі.
«У выніку абстрэлу з РСЗА разбураны жылы дом. Паранены 58-гадовы мужчына. Загінулі 80-гадовая жанчына і 24-гадовы мужчына», — напісаў Сінягубаў.
Акрамя гэтага, акупанты нанеслі ўдар па населеным пункце Золачаў — у выніку абстрэлаў з РСЗА «Ураган» пашкоджаныя восем прыватных жылых дамоў, фасад лякарні, пацярпеў 35-гадовы мужчына. У вёсцы Івашкі ў выніку артабстрэлу быў пашкоджаны дах двухпавярховага шматкватэрнага дома, пацярпеў 32-гадовы мужчына.
Таксама старшыня АГА паведаміў, што на Харкаўскім кірунку ішлі чатыры баі. Сілы абароны адбівалі штурмавыя дзеянні праціўніка паблізу Ваўчанска.
Глядзіце таксама
Сярод загінулых пасля ўдару Расіі па гандлёвым цэнтры ў Канстанцінаўцы Данецкай вобласці 9 жніўня ідэнтыфікавалі дваіх дзяцей, гэта дзяўчынкі 9 і 11 гадоў, паведамілі ў Офісе генеральнага пракурора Украіны.
«Працягваюцца экспертызы па ўсталяванні асоб яшчэ шасці чалавек, у тым ліку, верагодна, 1 дзіця», — гаворыцца ў паведамленні.
Паводле апошніх звестак, колькасць загінулых у выніку абстрэлу складае 14 чалавек, параненых — 43.
Нагадваецца, што 9 жніўня а 11:05 Расія ўдарыла папярэдне ракетай Х-38 па горадзе Канстанцінаўка Данецкай вобласці. Трапленне адбылося па мясцовым гандлёвым цэнтры, дзе знаходзіліся харчовыя і гаспадарчыя крамы.