«Звон плывёт над Россиею». СБУ завяла справу за ўхваленне «рускага свету» ў Кіева-Пячорскай лаўры (відэа)
Служба бяспекі Украіны завяла крымінальную справу за ўхваленне «рускага свету» ў Кіева-Пячорскай лаўры. У адной з цэркваў манастыра, які падпарадкоўваецца Маскоўскаму патрыярхату, днямі падчас малітвы спявалі «Звон плывёт-плывёт над Россиею, пробуждается матушка Русь».
Як піша unian.net, расследаванне распачата ў рамках вытворчасці паводле ч.1 арт. 436-2 Крымінальнага кодэкса («Апраўданне, прызнанне правамернай, адмаўленне ўзброенай агрэсіі РФ супраць Украіны, услаўленне яе ўдзельнікаў»).
Нагадаем, 12 лістапада ў адным з храмаў Кіева-Пячорскай лаўры падчас набажэнства гучалі прапагандысцкія песні са словамі «Звон плывёт над Россиею».
Варта дадаць, што ў самой Расіі, як і на акупаваных ёй тэрыторыях, караюць за ўкраінскія песні.
Адметна, што і ў Беларусі, якая падтрымлівае РФ у вайне, спяваць па-ўкраінску небяспечна. Летам за песню гурта «Акіян Эльзы» на мінскай вуліцы Зыбіцкай была затрымана спявачка Мэрыем Герасіменка. З таго часу дзяўчына за кратамі. Яна прызнана палітзняволенай.
