АФН: Прэм’ер Беларусі заклікаў у госці дэвальвацыю

Прэм’ер Беларусі Раман Галоўчанка наступіў на любімыя граблі экс-прэм’ера Міхаіла Мясніковіча, які ў 2014 годзе адным подпісам прывёў краіну да 40% дэвальвацыі.


Галоўчанка вырашыў: «Чым я горш?» — і падпісаў пастанову №100 ад 23 лютага 2021 года «Аб часовых мерах па стабілізацыі цэн на сацыяльна значныя тавары першай неабходнасці», якім дэ-юрэ ўвёў дзяржаўнае рэгуляванне коштаў 62 таварных пазіцый (у асноўным, ежа) па пераліку №1 і 50 найменняў лекаў па пераліку №2, паведамляе Агенцтва фінансавых навін (АФН).

Асаблівую ўвагу трэба звярнуць на той факт, што «ваеннае становішча» ў коштах уводзіцца адразу на год, каб «спакойна і без гвалту» дацягнуць да мясцовых выбараў і магчымага рэферэндуму па Канстытуцыі.

«Юрыдычным асобам усіх форм уласнасці і індывідуальным прадпрымальнікам, якія ажыццяўляюць вытворчасць (увоз) і (або) рэалізацыю на ўнутраны рынак сацыяльна значных тавараў першай неабходнасці па пераліках згодна з дадаткамі 1 і 2 (далей — сацыяльна значныя тавары першай неабходнасці), не дапускаць павышэння цэн з даты ўступлення ў сілу гэтай пастановы па 28 лютага 2021 г. у параўнанні з цэнамі, якія дзейнічалі на 24 лютага 2021 г., а ў выпадку адсутнасці тавараў на гэтую дату — на папярэднюю дату», — гаворыцца ў дакуменце.

«З 1 сакавіка 2021 г. змяненне цэн на сацыяльна значныя тавары першай неабходнасці не можа перавышаць 0,2 працэнта ў месяц да кошту гэтых тавараў, які склаўся на апошні дзень папярэдняга месяца...», — таксама сказана ў дакуменце.

«Павышэнне цэн вышэй за мяжу ... дапускаецца толькі па ўзгадненні з Камісіяй па пытаннях дзяржаўнага рэгулявання цэнаўтварэння пры Савеце Міністраў Рэспублікі Беларусь», — абвяшчае пастанова (каму належыць, таму падвысяць на столькі, на колькі трэба).

Працоўны дзень 24 лютага ў арганізацыях гандлю пачнецца з масавага змянення цэннікаў на тавары. Прычым заднім чыслом будуць мяняць цэны на тавары, якія ўвайшлі ў пералікі Галоўчанкі. Сёння пачнуць рэзка задзіраць цэны на ўсе астатнія тавары на столькі, на колькі палічаць патрэбным — з улікам палітычных і эканамічных рызык у краіне.

Па-сутнасці, прэм’ер Галоўчанка адчыніў дзверы і афіцыйна запрасіў у краіну Яе Вялікасць дэвальвацыю, якая ўжо добра засумавала па Сінявокай (раней перапынкі паміж дэвальвацыямі былі меншымі).

Рэзкае павышэнне цэн на тавары, не ўключаныя ў спіс, прывядзе да рэзкага ўсплёску інфляцыі — з усімі вынікаючымі наступствамі, мяркуе АФН.



Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: