«Аўтаматам ставяць роднай рускую мову»: Людзі абураюцца перапісам, у Белстаце не бачаць праблемы
«Яны проста робяць план», — так некаторыя з тых, хто прайшоў перапіс, ацэньваюць яго арганізацыю, бо роднай мовай запісваюць рускую, піша «Свабода».
Толькі ў адзін Telegram-канал «Беларусь головного мозга» прыйшло 79 скаргаў наконт мовы.
У Telegram-канале «Беларусь головного мозга» сабралі скаргі ад перапісаных. Усяго скаргаў 79, і ўсе яны тычацца пытання пра родную мову. Калі перапісчыкі прыходзяць да людзей, то аўтаматычна запісваюць роднай мовай расейскую.
«На маю заўвагу перапісчыца закаціла вочы»
«У нас ва ўстанове праводзілі перапіс на працоўным месцы. І каб акрамя мяне хто-небудзь абураўся тым, што аўтаматычна ставяць рускую мову, я не бачыў. Пры тым, што на маю заўвагу, што родная мова беларуская, дзяўчына, якая запаўняла анкету, паказальна закаціла вочы», — паведаміў у Telegram-канал адзін з удзельнікаў перапісу.
Таксама перапісчыкі кажуць, што руская мова запісаная роднай па змоўчванні і змяніць гэта нельга.
«Пацешны ўсё ж такі перапіс у нас у краіне. Учора прыходзіла жанчына, перапісчык. Задавала самыя простыя пытанні, хто пражывае, колькі, імя, прозвішча. Заняло гэта літаральна 5 хвілін. Пасля таго як яна збіралася сыходзіць, я спытаў, а што наконт мовы? У анкеце на сайце трэба было ўказваць родную мову. На што яна мне адказала: у нас у анкеце ўжо ўпісана руская мова як родная, я не магу выправіць. Пасля таго як я абурыўся і запатрабаваў выправіць на беларускую, атрымаў толькі хуткія выбачэнні і фразы: “Мне трэба ісці, шмат каго трэба абысці яшчэ”».
«Пра мову проста не спыталі»
Людзі скардзяцца і на тое, што перапіс праходзіць вельмі хутка, а важных пытанняў проста не задаюць.
«Сёння мая мама распавяла, што прыйшоў хлопец з планшэтам і запытаўся толькі месца прапіскі і ў шлюбе ці не ў шлюбе. Маіх бацькоў „перапісалі“ толькі па гэтых пытаннях і пашпарце, ніхто не пытаўся пра нацыянальнасць і мову. Мне шкада, што мама на гэта павялася, але постфактум», — піша абураны ўдзельнік перапісу.
«Гэта проста ўкіды, усё праходзіць добра»
У Белстаце, куды звярнулася Свабода, адказваюць, што «праблемы няма», а «аўтаматычна ставіць рускую мову не могуць».
«Я назірала, як перапісваюць людзей, і ў іх адразу запытваюць, на якой мове перапісваць, і пра родную мову запытваюць. Не разумею, каму патрэбныя гэтыя ўкіды, бо праблемы абсалютна няма. Калі я размаўляю па-беларуску, я і кажу пісаць па-беларуску. Мы даносілі праз СМІ, што чалавек мае права, калі ўжо раптам сутыкнуўся з такой сітуацыяй, каб перапісчык правёў перапіс на беларускай мове. Пакуль анкета не адправілася ў Белстат, чалавек можа ўносіць карэкціроўкі, паглядзець, якія дадзеныя перапісчык унёс у планшэт», — упэўнівае прэс-сакратарка Белстату Тацяна Лапкоўская.
Прэс-сакратарка дадае, што «перапісчыкі добрыя, і яны намагаюцца патлумачыць сутнасць пытанняў людзям».
У перапісе ўжо ўзялі ўдзел амаль 5 мільёнаў чалавек. Яны перапісаліся праз інтэрнэт. З 21 кастрычніка пачаўся этап, калі перапісчыкі ходзяць па кватэрах і офісных будынках, каб перапісаць астатніх.