Валанцёры адкрылі бясплатную школу замежных моваў

Ці ведаеце вы, што існуе Еўрапейская праграма міжнародных абменаў, якая арганізуе валанцёрскія паездкі, у тым ліку для ўдзельнікаў з Беларусі? Хаця межы Еўропы цяпер закрытыя, валанцёры вырашылі дапамагчы тым, хто рыхтуецца да падарожжаў.

Вядома ж, без ведаў замежнай мовы ніяк не абыйсціся. Таму на адной з валанцёрскіх сустрэчаў дамовіліся адкрыць анлайн-школу замежных моваў. Маўляў, прыйдзе час, межы адчкрыюцца, і мы адразу будзем у поўным узбраенні, гатовыя да новых вандровак.
Каманда выкладчыкаў атрымалася вельмі разнастайнай.
Валанцёрка з Італіі Дэбора д'Амато — бакалаўр лінгвістыкі. Дэбора любіць падарожнічаць і размаўляць на замежных мовах. Для ўдасканалення сваёй мовы яна жыла два месяцы ў Мінску. «У Беларусі мне пашанцавала сустрэцца з выдатнымі людзьмі, якіх я палюбіла. Я вельмі шчаслівая, што магу вучыць італьянскай мове беларускіх валанцёраў»,— кажа Дэбора.

Ганна Голікава — выкладчыца англійскай мовы ў групе паглыбленага вывучэння. У сваёй працы яна кіруецца прынцыпам з Евангелля: «Радасней даваць, чым атрымліваць». На самай справе, калі дорыш нешта і бачыш, як чалавек радуецца, атрымліваеш масу станоўчых эмоцый. «У выкладанні гэтак жа сама — калі аддаеш студэнтам часцінку сябе, наўзамен атрымліваеш моцны зарад добрага настрою і пачуццё задавальнення ад таго, што мог камусьці дапамагчы развіцца, стаць лепшым», — кажа Ганна.

Ганна Голікава
Эмілія Зелянкевіч навучае англійскай мове пачаткоўцаў. «Калі ты вучыш іншых, то ў першую чаргу вучышся сам», — лічыць яна. Ты вучышся і разумець людзей, і арганізоўваць, і камунікаваць. Гэты навык заўсёды запатрабаваны, ў любой справе.

«Вельмі крута тое, што мы ўжо пачалі сябраваць, не гледзячы, што паміж намі сотні кіламетраў», — распавядае Наталля Казлова з Жабінкі. Ёй вельмі падабаюцца выкладчыкі — і як яны даюць матэрыял, і хатняя практыка замацавання.
Курс іспанскай мовы з удзелам выкладчыка з Калумбіі арганізавала Дарына Швядоўская з польскай валанцёрскай асацыяцыі YMCA. Па прафесіі Дарына лагапед. Акрамя вывучэння мовы яна яшчэ кансультуе анлайн дзяцей з беларускіх шматдзетных і прыёмных сем'яў.

Па словах выкладчыцы італьянскай мовы Ірыны Русецкай, за тыя два месяцы, што працуе школа, ёсць бачны вынік. Пачыналіся заняткі з вывучэння алфавіта, а цяпер вучні ўжо могуць коратка сказаць пра сябе і ведаюць асновы граматыкі.

«Цяпер мы разам вывучаем мову, а пасля разам паедзем у замежную валанцёрскую паездку. Мы вельмі чакаем, каб хутчэй адкрыліся межы», — кажа Вера С. з Мінска.
Заняткі арыентаваныя менавіта на засваенне гутарковай мовы. Вера лічыць, што выкладчыкі не даюць нічога лішняга, усё без «вады», толькі тыя веды, якія спатрэбяцца ў размовах з італьянскімі сябрамі. 
У хуткім часе заняткі будуць праводзіць сябры-валанцёры з Італіі. Двое з іх — Сільвія з Цьены і Сара з Віцербо — выкладаюць музыку. Цікавы факт: падчас валанцёрскай сустрэчы ў Цьене ў мінулым годзе Сільвія спявала на беларускай мове паланез Агінскага «Развітанне з радзімай». Цяпер беларускія вучні разам з італьянскімі выкладчыкамі збіраюцца вывучыць некалькі старых італьянскіх спеваў — «Blue canary», «L'italiano» і песню італьянскіх партызанаў «Bella, ciao».

У школу прымаюцца ўсе жадаючыя, хто хоча быць валанцёрам і ўдзельнічаць у валанцёрскіх абменах.На дадзены момант раз на тыдзень праходзяць заняткі па англійскай, італьянскай, польскай мовах, а таксама іспанскай (сумесна з арганізацыяй YMCA з Польшы і валанцёрамі з Калумбіі). Вывучэнне італьянскай, польскай і іспанскай мовы ідзе з нуля, а для англійскай ёсць тры ўзроўні — для пачаткоўцаў, сярэдні і профі. Акрамя таго, студэнты групы профі самі вядуць заняткі для пачаткоўцаў. Дапамагаць згадзіліся валанцёры з Італіі, Польшы, Канады, Кітая. Кіруе анлайн-школай таленавітая выкладчыца Глорыя Заляціла.
Адкрыццё анлайн-школы замежных моваў падаравала магчымасць навучацца ўсім тым, хто знаходзіцца на самаізаляцыі, ці ў дэкрэтным адпачынку, ці жыве ў далёкай вёсцы, ці проста тым, хто не мае грошай для навучання, але мае вялікае жаданне раскрыць свой патэнцыял.
У планах — адкрыць групы французкай і нямецкай мовы, але для іх пакуль што недастаткова выкладчыкаў.
Школа запрашае навучэнцаў і выкладчыкаў-валанцёраў. Прыходзьце, будзе крута!


Фота з архіва аўтара