Велапераездамі ў выкананні брэсцкіх будаўнікоў немагчыма карыстацца (фота)

У апошнія гады ў Брэсце пачынаюць ствараць умовы для раварыстаў, але часам прагрэс у гэтым кірунку можна ўбачыць толькі на паперы.

Прыклад — роварны пераезд на вуліцы Янкі Купалы.

Сёлета ў Брэсце на буйных пераходах праз дарогу пачалі з’яўляцца роварныя пераезды, дарожнікі абазначаюць іх зялёным колерам. Як заяўляе ДАІ, пры пераездзе праз іх раварыст можна не злазіць з ровара. У іншым выпадку, згодна з часткай 1 артыкула 18.23 Кодэксу аб адміністрацыйных правапарушэннях, прадугледжаны штраф ад 23 да 69 рублёў.

Але на некаторых пераходах дарожныя будаўнікі толькі «фармальна» пафарбавалі асфальт у зялёны колер і пакінулі (як бачым на фота) бардзюры, на якія цяжка заехаць і зʼехаць не злазячы з ровара. Гэта парушае будаўнічыя нормы: бардзюр у зоне перасячэння з праезнай часткай павінен быць «нулявым».

Каардынатар кампаніі «За вела-Брэст» Уладзімір Красько кажа, што з падобнымі праблемамі яго арганізацыя сутыкаецца нярэдка:

— Відавочна, што будаўнікі парушаюць існуючыя будаўнічыя нормы, нам даводзіцца фіксаваць дадзеныя парушэнні і пісаць скаргі. Пасля іх будаўнікі вымушаныя ўсё прыводзіць у норму.

“Белсат” звярнуўся ў Брэсцкае дарожна-эксплуатацыйнае прадпрыемства, каб даведацца, што перашкаджае з першага разу зрабіць пераезды зручнымі. Але адказваць на нашы пытанні кіраўніцтва адмовілася.


Рэканструкцыя вуліцы Янкі Купалы ў Брэсце доўжыцца з 2011 года, і пакуль да завяршэння яшчэ далёка, але на адным з адцінкаў менавіта на гэтай вуліцы адкрылі першую ў Брэсце роварную сцежку, размешчаную на праезнай частцы.

belsat.eu

 

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: