Рукапісы не гараць, а арыштоўваюцца? У «спіс экстрэмісцкіх выданняў» дадалі адразу 12 кніг

Улада праводзіць чарговую рэвізію гісторыі, і першымі ад яе пакутуюць кнігі. Паводле звестак праваабаронцаў, адразу 12 кніг па гісторыі ўнесеныя ў «спіс экстрэмісцкіх матэрыялаў».

Нацыянальная бібліятэка Беларусі. Фота Дзмітрыя Дзмітрыева

Нацыянальная бібліятэка Беларусі. Фота Дзмітрыя Дзмітрыева


Перад Новым годам Рэспубліканскі савет па гістарычнай палітыцы пастанавіў правесці «чысткі» кніжных крамаў на прадмет «шкоднай літаратуры». І распараджэнне гэтае тут жа памчаліся выконваць: усё, што не адпавядае «лініі партыі», вымаецца з дзяржаўных кнігарняў. Па ўсім відаць, на гэтым памагатыя рэжыму спыняцца не збіраюцца. Як стала вядома праваабаронцам, 9 студзеня так званы «спіс экстрэмісцкіх матэрыялаў» папоўніўся ажно дванаццаццю новымі пазіцыямі. І ўсё гэта — кнігі па гісторыі:

«Беларусь превыше всего!: (О национальной беларусской идее)», Анатоль Тарас;

«Год 1942 — учебный», Уладзімір Бешанаў;

«Забытая Беларусь», Вадзім Дзеружынскі;


«Запiсы таварыства аматараў беларускай гiсторыi iмя Вацлава Ластоўскага. Выклiкi "рускага свету" i Беларусь. Выпуск. 6», Анатоль Тарас;

«Большая кровь: Как СССР победил в войне 1941 — 1945 гг.», Сяргей Захарэвіч;

«Нацыянальна-культурнае жыццё на Беларусi ў часы вайны (1941 — 1944 гг.)», Леанід Лыч;

«Постсоветский транзит: между демократией и диктатурой: Сборник статей», Анатоль Тарас;

«Праблемы гуманiтарнай бяспекi Беларусi: Матэр’ялы навукова-практычнай канферэнцыi»;

«Тень Победы», Віктар Сувораў;

«Страницы прошлого: статьи по истории Беларуси», Анатоль Тарас;

«Трансфармацыi ментальнасцi беларусаў у XXІ ст. — Матэр’ялы навукова-практычнай канферэнцыi»;

«Кто, как и зачем убил Вильгельма Кубе», Алег Усачоў.

Раней былі прызнаныя «экстрэмісцкімі» кнігі Анатоля Тараса «Кароткі курс гісторыі Беларусі IX — XXI стст.» і «Беларусь на распутье», навуковая манаграфія Святланы Казловай «Аграрная палiтыка нацыстаў у Заходняй Беларусi: Планаванне. Забеспячэнне. Ажыццяўленне» і інш.


Яшчэ раней «экстрэмісцкімі» ў Беларусі сталі: кніга геральдыста Віктара Ляхара «Военная история Беларуси. Герои. Символы. Цвета», прысвечаная ваеннай сімволіцы ў Беларусі ў розныя гістарычныя перыяды; «Айчына: Маляўнiчая гісторыя» Уладзіміра Арлова — кніга па гісторыі Беларусі для дзяцей і падлеткаў; антыўтопія Альгерда Бахарэвіча «Сабакі Эўропы», «Беларуская нацыянальная ідэя» аўтарства Змітра Лукашука і Максіма Гарунова і «Балада пра маленькі буксір» Іосіфа Бродскага.
Які лёс чакае забароненыя і вынятыя кнігі, пакуль застаецца пытаннем.