Як шукалі радыеактыўную мініяцюрную капсулу на дарозе ў 1400 кіламетраў. І знайшлі!
У Аўстраліі два тыдні на 1400-кіламетровым участку дарогі шукалі згубленую капсулу з радыеактыўным цэзіем-137. Страта небяспечнага кантэйнера памерам 6 на 8 міліметраў прымусіла пачаць пошукавую аперацыю тытанічных маштабаў.
У Заходняй Аўстраліі знайшлі радыеактыўную капсулу з цэзіем-137, якую горназдабыўная кампанія «Rio Tinto» згубіла ў сярэдзіне студзеня пры перавозцы з рудніка ў горад Перт. Пра гэта паведамляе «ABC News».
Капсула была памерам 6 на 8 міліметраў. Яе шукалі на 1400-кіламетровым участку дарогі. І самае дзіўнае — знайшлі, недалёка ад горада Ньюман, за два метры ад узбочыны. Капсула змяшчае невялікі аб'ём радыеактыўнага ізатопа цэзій-137, які пры кантакце можа прывесці да апрамянення і выклікаць сур'ёзныя захворванні.
Міністр экстранных службаў Заходняй Аўстраліі Стывен Досан назваў вынікі пошуку «экстраардынарнымі». Ён падкрэсліў, што пошукавыя каманды «літаральна знайшлі іголку ў стозе сена».
У сваю чаргу кіраўнік «Rio Tinto» Сайман Трот падзякаваў усім, хто прыняў удзел у пошуках, а таксама папрасіў прабачэння за тое, што яны згубілі капсулу. І паабяцаў пакрыць дзяржаве выдаткі на пошукавую аперацыю. Пры гэтым ён дадаў, што рашэнне аб кампенсацыі шкоды павінны прыняць улады штата.
Кампанія паабяцала правесці ўнутранае расследаванне прычын знікнення.
Капсула з цэзіем-137 была згублена ў сярэдзіне студзеня, аднак вядома пра гэта стала толькі пад канец месяца. Пошукі занялі некалькі дзён, хоць першапачаткова аўстралійскія ўлады асцерагаліся, што маленечкая капсула магла патрапіць у шыну любога з аўтамабіляў, што праязджалі па шашы. Тым не менш гэтага не здарылася, а эксперты і наогул лічаць, што капсула не зрушылася з месца пасля таго, як выпала з грузавіка.
Сама па сабе капсула ўяўляла сур'ёзную пагрозу для грамадзян. У прыватнасці, кантакт скуры з цэзіем-137 пагражае апёкам і прамянёвай хваробай, а выпраменьванне ад капсулы эквівалентна 10 рэнтгенам у гадзіну, што пры працяглым уздзеянні можа выклікаць рак.
GOVERNMENT OF WESTERN AUSTRALIA
Адкуль узялася гэтая капсула?
Кантэйнер з'яўляецца часткай прыбора для вымярэння шчыльнасці парод, які шырока ўжываецца ў горназдабыўной прамысловасці. Прыбор да нядаўняга часу выкарыстоўваўся на рудніку «Rio Tinto» Гудай-Дары, дзе здабываецца жалезная руда.
«Rio Tinto» наняла субпадрадчыка з належным узроўнем вопыту і сертыфікацыяй для надзейнай упакоўкі прыбора пры падрыхтоўцы яго да адпраўкі з аб'екта і дастаўкі на прадпрыемства ў Перце, — гаворыцца ў заяве кампаніі. — Перад адпраўкай прыбора быў выкарыстаны лічыльнік Гейгера, каб пераканацца ў наяўнасці капсулы ўнутры ўпакоўкі».
Гэта не першы скандал з удзелам «Rio Tinto» ў Аўстраліі. У верасні 2020 года кіраўніцтва кампаніі з мэтай расшырэння рудніка прыняло рашэнне ўзарваць комплекс пячор узростам 46 тысяч гадоў у цясніне Джуукан-Гордж. Гэтыя пячоры шанаваліся мясцовымі першабытнымі людзьмі як святыні, і з-за грамадскага абурэння рэпутацыі кампаніі быў нанесены сур'ёзны ўрон, а частка кіраўніцтва была вымушана падаць у адстаўку.