Мова коцікаў, прусакі на падлодках і аргазмы супраць насмарку. Хто сёлета атрымаў Шнобеля?

У Гарвардскім універсітэце адбылося абвяшчэнне і ўручэнне 31-й Шнобелеўскай прэміі — галоўнай навуковай антыўзнагароды. Трансляцыя мерапрыемства вялася анлайн на YouTube. Пераможцам уручаюць «грашовую прэмію» ў выглядзе банкноты ў 10 мільярдаў зімбабвійскіх долараў.

Біялогія

Шведская вучоная атрымала прэмію за аналіз кацінай «гутаркі» з чалавекам. Каты могуць з дапамогай вуркатання, мяўкання, шыпення і рыкання размаўляць з гаспадаром.

Фізіка

Група навукоўцаў з Нідэрландаў, Італіі, ЗША і Тайваня атрымала прэмію за эксперыменты з пешаходамі. Яны высветлілі, чаму пешаходы падчас руху не сутыкаюцца з іншымі пешаходамі.

Кінетыка

Атрымалі навукоўцы, якія даказалі зваротны эфект — чаму пешаходы ўсё ж часам сутыкаюцца.

Медыцына

Даследчыкі з Германіі, Турцыі і Вялікабрытаніі даказалі, што сексуальныя аргазмы ствараюць супрацьцечны эфект, які паляпшае насавое дыханне. Асабліва добра гэты сродак працуе пры насмарку.

Экалогія

Група навукоўцаў з Іспаніі і Ірана правяла генетычны аналіз і вызначэнне розных відаў бактэрый у жавальнай гумцы на тратуарах розных краін свету.

Хімія

Калектыў навукоўцаў з Германіі, Вялікабрытаніі, Новай Зеландыі, Грэцыі, Кіпра і Аўстрыі атрымаў прэмію за калектыўнае даследаванне паветра ад гледачоў у кінатэатрах на прадмет узаемазалежнасці ад колькасці сцэн гвалту, сексу, антысацыяльных паводзін, ужывання наркотыкаў і нецэнзурных выказванняў на экране.

Эканоміка

Навукоўцы з Францыі даказалі ўзаемасувязь паміж узроўнем атлусцення ў палітыкаў з паказчыкамі карупцыі ў іх краінах.

Энтамалогія

Амерыканскія навукоўцы атрымалі прэмію за распрацоўку новага метаду барацьбы з прусамі на падводных лодках.

Транспарт

Калектыў з 13 навукоўцаў з Намібіі, ПАР, Танзаніі, Зімбабвэ, Вялікабрытаніі, ЗША і Бразіліі атрымалі прэмію за эксперымент па вызначэнні бяспекі транспарціроўкі насарога па паветры ў перагорнутым выглядзе. Аказваецца, так насарогаў транспартаваць больш бяспечна.

Прэмія свету

Навукоўцы з ЗША атрымалі ўзнагароду за тое, што праверылі гіпотэзу аб вырошчванні барады мужчынамі для змякчэння ўдараў па твары ў кулачных баях.
«Справа не ў тым, што барада забяспечвае надзейную абарону. Па-сапраўднаму моцны ўдар заўсёды будзе небяспечны. Але мы можам сказаць, што барада забяспечвае абарону костак і скуры», — распавёў кіраўнік даследавання Дэвід Кэры.
А ў 2013 і 2020 годзе Шнобелеўскую прэмію атрымліваў Аляксандр Лукашэнка: У 2013 годзе — за забарону публічных апладысментаў (разам з мінскай міліцыяй), а ў 2020 — за палітыку барацьбы з каронавірусам (разам з іншымі кіраўнікамі краін, дзе адмаўлялі кавід).